Read Sangtam Naga LIPOH 31 Bible Online

LIPOH 31 - Sangtam Naga bible

LIPOH 31

¹Laban tsurütinü “Jakobnü Uwa kohro lüpcho khyükhangko, ko abi kuthsi apüm tsü Uwa kuthsi due” pü chocho Jakobnü yuchicho.

²Adelü Laban-nü akhudi roh-i mümüirepü abinü rangchehcho.

³Hütsüde ABÜDONGBAnü abi te yocho, “Nüurü lih lang ko nü jünirü yang thali wüng. Ih nü te zeh linung.”

⁴Achotsü Jakobnü Rachel e Lea nyüh te rangmü la santi lichah ro abi shirünung yuva jücho.

⁵Abinü arüh te yocho, “Nüunü adelü akhulang roh-i mümüicho Ihnü rangchehko; ta I urü Tsingrang I te zeh lile.

⁶Ihnü I tase apümnü nüu dikehcho nühjüdingnü müdhele.

⁷Ta abinü Ih kihyochü I khyang angang jünung dhürepili mülihchire. Ta Ih thsakehjünung abi khyang Tsingrangbanü mümülacho.

⁸Khodederü Laban-nü, ‘Lapha kehcho miza tsü nü yoepü yonang,’ miza apümnü lapha kehpü mütrücho. Khode abinü ‘Amüdrimütrahti tsü nü yoepü yocho,’ miza apümnü amüdrimütrah du mütrücho.

⁹Hütsüta Tsingrangbanü nüu chahnü mizati tsü khyo I khyang jücho.

¹⁰“Tsingkang bekhyah tungta mükhongcho mizapungti tsü amüdri, lapha kehcho ko xubongyah kehchoti du I melang ngucho.

¹¹I melang tsü ninglang riwürünü I te chota yocho, ‘Jakob, Ihnü lalingcho, Ih hila lile.’

¹²Abinü mütozah yocho, ‘Tungtaba mizapung apüm tsü amüdri, lapha kehcho ko xubongyah kehchoti lile. Laban-nü nü chah bichicho apüm ngu Ihnü hi tikehsohre.

¹³Nü te Bethel la chüro ngusohba, khüi la nühnü amüdhethsa lung khyümcho, ko hütsü chah tuji tungkehcho ko khüi la nühnü I te yuchümcho, hütsü Tsingrang Ih lile. Ade nü suro lih lang thali wünung rungnüm.’ ”

¹⁴Rachel ko Lea nyühnü Jakob te yocho, “Uwa chahnü ihrü thsiking anguhnung tu müle.

¹⁵Abinü ihrü shirü kyo khichire. Abinü ihrü iko ko ade ihrü icho thsi apüm abinü pehko.

¹⁶Uwa chahnü Tsingrangbanü khyüba kuthsi hi apüm ihrü ko ihrü tsurüti yo lile. Tsingrangbanü nü te tu yocho hütsüta nguching.”

¹⁷Achotsü Jakobnü Kanan lang au yang wünung rungnümcho.

¹⁸Abinü atsurü nitpürü ut chah pümsohcho ko santi ko Mesopotamia la khyübülungcho kuthsi apüm hipü abi bekhu tsisohcho.

¹⁹Laban tsü san nbüh müjüpnung wüpü lide Rachelnü aurü yo kyothri kuh tsingrang fühcho.

²⁰Jakobnü abi tsiba tsü Laban khyang mümüdhesohcho.

²¹Abinü khyübülungcho apüm hipü dhsüthsa tsicho. Abinü Eufrates yongkhi kehcho ko Gilead azonglang shemüsucho.

²²Nyümong asang khanglang du Jakob rang tsiba tsü Laban te yocho.

²³Achotsü abinü anyitsarü nüpü nyümong dhünyeh Jakob iicho ko Gilead zong la wü iiphücho.

²⁴Ta hütsü romang Tsingrangbanü Laban te amelang yocho, “Jakob chah tu amütsa tünguchi.”

²⁵Jakobnü akhang chah müdongcho ko Laban-nü abi nyitsarü te Gilead zong chah müdongcho.

²⁶Ko Laban-nü Jakob te yocho, “Tuepü nühnü Ih kihyochü I tsularüti rothsala rangcho khingkurü kyo no tsiro?

²⁷Tuepü nühnü I te müyopü rang tsiro? Nühnü yorelang, Ihnü tbhang tii ko honglilah meh akünyang khi thsa nüh müyangyohchüba thsacho.

²⁸I shümtsurüti chah mii I khyang be mümüthsüpsoh, ko I tsularüti te aza yu mii müyosoh. Nühnü dee amüsithsa nguchiko!

²⁹Ihnü nührü chah amütsa nguchinung kohle, ta shomang nüurü Tsingrangnü nührü chah tu amütsa münguchinung I te yoko.

³⁰Nührü lih lang dee wünyücho Ihnü müdhele, ta tuepü nühnü I kuh tsingrang fühcho?”

³¹Jakobnü lalingcho, “Nühnü nü tsularüti thali khyüjükhang mütsapü Ihnü drüchoe.

³²Ta hila khürü khehla nührü tsingrang tsü zehkhang, abilü süsohng. Hila, I nyitsarünü yuzithsa, nü yo tu müzehnang dheng ko zehkhang khyüng.” Rachelnü Laban tsingrang fühcho tsü Jakobnü mümüdhecho.

³³Achotsü Laban-nü Jakob shükuh la; hütsüpü Lea shükuh la, ko kulilarü anyüh shükuh la yangchicho, ta abinü hütsü müngucho. Hütsüpü abinü Rachel shükuh la züdu yangchicho.

³⁴Ade, kuh tsingrang tsü Rachelnü khyo ut pümji pohki yohpü hütsü michah pümcho. Laban-nü shükuh la tsü longi yangchicho ta müngucho.

³⁵Rachelnü au te yocho, “Uwa, I te zii tüchüro, ta Ih nü bete yanung mükoh; tunüo Ih ayah role.” Hütsüta abinü yangchicho ta kuh tsingrang tsü müngucho.

³⁶Hütsüde Jakob azi chürocho. Abinü yocho, “Ihnü tu thsamehcho? Nühnü Ih iironungthsa Ihnü tu yuzeng thsangnyangcho?

³⁷Nühnü ade I kohro apüm la yangchiko, nü kukhi yo tu ngucho? Hila zangchehng, Ihjü nyitsarü bete ngusohng, ko Ihjü sü yujenang arühnü khasohng.

³⁸Ih nü yola adelü kang mükyü lirore; nü san ko miza khüdusü aza müpeh, mahkhang Ihnü nü yo lanü sanpung khüdusü mütsu.

³⁹Rangmü kanglungrünü mükahsehnye, hütsü Ipunü sahcho. Hütsü I mülang mah pü khodesü nü te müyo. Anyümong chahnye, mahkhang amala chahnye achahcho apüm I khyang münohsohcho.

⁴⁰Anyümong adhsanü ko aromang athsahchonü Ih adrongpi chongchako. Ko Ih müyüpmüso du licho.

⁴¹Hütsü roh-i du nü te kang mükyü liroko. Nü tsulatpü nyüh nengdang kang dhüre-müyü ko santi nengdang kang dhüroh nüh dikehko. Hütsüpü mii nühnü I nyükheh ngang dhürepili mülichicho.

⁴²I urü Tsingrang, Abraham ko Isak Tsingrang I te müzehlanglü, nühnü Ih khehshü iipehpü liba thsako. Ta Tsingrangbanü I chongchacho ko Ihnü nguchicho ngucho ko shomang Abinü nüh yübüko.”

⁴³Laban-nü Jakob te lalingcho, “Khingkurü hiri I tsurüe; arüh tsurüti I yo ko santi hiri I yo lile. Yoekhang, hila nühnü nguba apüm hi I yo lile. Ta Ihnü tsularüti ko arüh tsurüti ranglinung mükohchonü,

⁴⁴nü te azengtaba khüdu külüpnung Ih rungnüm lile. Ko Ihjü anyengchotaba lümkehnung shulüm lung zang khangnung.”

⁴⁵Achotsü Jakobnü lung khüdu hiro amüdhethsa khyümcho.

⁴⁶Abinü abi nyitsarü te lung zang bhümnung yocho. Hütsüpü arühnü lung zangcho shündhün tsü tsuyongcho.

⁴⁷Hütsüde Laban-nü Jegar Sahadutha, Ko Jakobnü Galeed aneng jücho.

⁴⁸Laban-nü Jakob te yocho, “Ihjüding nengdang hiba lungkhangcho hi alümkehnung linung.” Hütsünü hiba müdüm te Galeed dsicho.

⁴⁹Laban nüsü yocho, “Ihjü za lide ABÜDONGBAnü Ihjü nyah lieng.” Hütsünü hiba te Mizpa püsü dsicho.

⁵⁰Laban-nü mütozah yocho, “Nühnü I tsularüti mümüi-müthsümnye, ko Ihnü mümüdhepü nühnü khingkurü apa khyünye, Tsingrangbanü Ihsa dheng yalepü lümkehng.

⁵¹Ihnü Ihjü kahla khangba lung tsü ko amüdhethsa lung tsü hila lile.

⁵²Hiba lung khangcho ko amüdhethsa anyüding tsü alümkehnung thsanung. Ihnü nü te khatanung hiba lung zangcho khu müronung ko nühnüsü I te khatanung hiba amüdhethsa hi khu türo.

⁵³Abraham Tsingrang ko Nahor Tsingrangnü Ihjü kahla yu khaang.” Hütsüpü Jakobnü au Isak Tsingrang nengla anyengchotacho tsü yohpünung yuchümcho.

⁵⁴Abinü kanglungrü khüdu müpseh akhang chah tsü kangmübü jücho ko abi nyitsarüti tsuyongnung dsiyohcho. Arühnü tsuyongpü khanglang akhang chah tsü yüpcho.

⁵⁵Nyangnyü khüu mütoh Laban-nü ashümtsurüti chah be müthsüpcho ko atsularüti te aza yu yopü thali tsicho.