Read Sangtam Naga LIPOH 32 Bible Online

LIPOH 32 - Sangtam Naga bible

LIPOH 32

¹Jakob lang la tsi yade, ninglang riwürü khürünü abi shirücho.

²Khode abinü arüh ngucho, abinü yocho, “Hiba hi Tsingrangba müdongji;” hütsünü abinü hütsüba müdüm te Mahanaim pü dsicho.

³Hütsüpü Jakobnü Edom la amung yang yuhirü tsehleh müthehcho.

⁴Abinü arüh te yocho, “I büdongba Esau te nührünü hita young: Nü dikehrü Jakobnü hita yore, Ih Laban te liyachonü münu mürochoe.

⁵Ih misü, gadu, san, miza ko ayurüti lile. Ade I büdongba yang abi yanglilüm ngunyo yuva müthehre.”

⁶Khode yuhirü thali Jakob yanglang rocho, arühnü yocho, “Ihrünü nü mung Esau yang wücho ko abi nüh mütohnung langwüm la role. Abi yola nyitsarü thsih müyü zehle.”

⁷Jakob khütang nehnü lümtpahnahcho. Abinü abi yola nyitsarü ko san, miza, misü ko ut tsü chang anyüh kang changsahcho.

⁸Abinü lümcho, “Esaunü ro akhudiba mülung mahnye, akhüuba mülunglü tsichehnung.”

⁹Hütsüpü Jakobnü dangkhidangnangcho, “Imü Abraham Tsingrang ko Isak Tsingrang, I te nyieng. ABÜDONGBA, nühnü I te I lih lang ko I jümürü yanglang thali wüng ko I nengdang lüpcho tu müthsanungepü yocho.

¹⁰Nühnü nü dikehrü te amüi ko yuje ngusohcho Ihnü müdekheng. Jordan hi kehde I khehla ja du khüdu licho, ta adelü mülung anyüh yola Ih thali rore.

¹¹Imung Esau kheh lanü Ih khümchoungpü Ihnü kihchire. Abinü ro Ih ko khingkurü azarü zeh mahnung drüre.

¹²Nühnü Ih müwajünung ko I chahnü kihdi lihpi kyo mükhilong trahchosohnung nyengchocho tünbüchü.”

¹³Hütsü romang hütsüla yüp-pü, Jakobnü amung Esau khyang kanglungrü yolanü jiyünung throchehcho: miza atrüh thsih anyüh ko apung mükyü, ut atrüh aza nüpü sangre, misü atrüh yüre ko misüpung dhüre, gadu atrüh mükyü ko apung dhüre.

¹⁶Abinü atii atii changnahcho ko atii müipi la anyahrü yohpücho. Abinü arüh te yocho, “I bekhu tsieng ko atii atii kahla adukah zehsohng.”

¹⁷Abinü akhuba kulirü te yocho, “Khode Imung Esaunü nüh shiro, ‘Nührü abüdongba süo? ko nührü khüde würo ko nü bete kanglungrü hi sü yo-o?’ pü tsingdhengde;

¹⁸nühnü hita laling, ‘Hiri nü dikehrü Jakob yoe. Abinü abi büdongba Esau khyang jiyü mühehchüre. Jakob apusü ihrü khanglang tsehle.’ ”

¹⁹Abinü anyüuba, asanguba ko atii atii nyahrü atümung te hütsüroh-i du tsü yocho; “Nührünü Esau shirüde hita young.

²⁰Ho, nü dikehrü Jakobsü ihrü khanglang tsehlepü young.” Jakobnü lümcho, “Hiri jiyü khu Ihnü abi kihchonung ko Ihnü abi shirüde, kümüdeo abinü I khyang mülang pehjünung.”

²¹Hütsüta abinü jiyü tsü akhu müthehcho ko hütsü romang arüh müdongchah yüpcho.

²²Hütsü romang tsünü Jakobnü shemüsu anitpü anyüh, ashümtpü anyüh ko atsurü dhüre-kheh tsü nüpü Jabbok yongkhi kehcho.

²³Abinü arüh tsü yongkhi keh müthehko khanglang abi kuthsisü apüm müthehcho,

²⁴ta abi müleng aka nyehlicho. Hütsüpü nyitsarü khüdu ro abi te tsingse shutacho.

²⁵Khode nyitsarüba tsünü abinü mükoh pü müdhecho, abinü Jakob mütsurünah la shingjücho ko shutade hütsü lohchehcho.

²⁶Hütsüpü nyitsarüba tsünü yocho, “Ih tsisohng, tunüo tsingsele.” Jakobnü yocho, “Nühnü Ih mümüwajüde Ihnü nüh mümüthehnung.”

²⁷Nyitsarüba tsünü yocho, “Nü neng süo?” Abinü yocho, “I neng Jakob.”

²⁸Nyitsarüba tsünü yocho, “Adelü nü neng Jakob mah ta Israel pü dsinung, tunüo nühnü Tsingrangba ko nyitsarü te shutako ko nühnü kohko.”

²⁹Jakobnü yocho, “Yanglilüm I te nü neng young.” Ta abinü yocho, “Tuepü nühnü I neng müdhenyüro?” Hütsüpü abinü Jakob müwajücho.

³⁰Jakobnü yocho, “Ihnü Tsingrangba romih-e romih nyüh dhsükehta nguko, ta abinü I akang rikijüko”; hütsünü abinü hütsüba müdüm te Peniel pü dsicho.

³¹Nyü chürode Jakobnü Peniel pehjüpü athsenü mütsachonü thechi tsicho.

³²Hütsünü chünye yingcheh Israelrünü athseyüh tsü mütsure, tunüo Jakob phüm alohchiji chah tsü shingjücho.