Read Sangtam Naga LIPOH 33 Bible Online

LIPOH 33 - Sangtam Naga bible

LIPOH 33

¹Jakobnü dheng müthehde, Esau abi nyitsarü thsih müyü nüpü rochi ngucho, achotsü azarü tsü abinü Lea, Rachel ko ashümtpürü arüh khyang changnah jücho.

²Abinü abi ashümlarü ko atsurüti akhusohcho, hütsüpü Lea ko atsurüti ko Rachel e Josef nyüh akasohcho.

³Hütsüpü apu akhupü wücho ko khode amung shirücho, abinü alih la dhünyehpili mükhukehcho.

⁴Ta Esaunü abi mütohnung shang wücho ko khyahripü abi chah müthsüpcho. Ko anyüding tracho.

⁵Khode Esaunü dhengmükangcho ko khingkurü azarüti ngucho, abinü tsingdhengcho, “Nü yola hiri sürüo?” Jakobnü lalingcho, “Tsuzarüti hiri Tsingrangbanü achomangnü nü dikehrü khyang jücho lile.”

⁶Hütsüde ashümlarüti ko arüh tsurütinü ro mükhukehcho;

⁷hütsüpü Lea ko atsurüti rocho ko achangkathsa Josef e Rachel nyüh ro mükhukehcho.

⁸Esaunü tsingdhengcho, “Khang, Ihnü mütohba aparü mülungti tsü tu adüzüo?” Jakobnü lalingcho, “Nüh kihchonung nengdang.”

⁹Ta Esaunü yocho, “Ini, Ih kükyo lile. Hütsü nüpu nengdang yohpüng.”

¹⁰Jakobnü yocho, “Yanglilüm doh, Ih nü jingte yanglih ngukhang, I jiyü khyüchojüng. I nengdang nü romih nguba tsü Tsingrangba romih ngucho roh-ie, ko nühnü Ih hidoi tsa khyüchoko.

¹¹Hütsüeko Ihnü nü khyang hiroba jiyü hi yanglilümnü khyüchojüng; Tsingrangbanü Ih khütang müi thsütah lüpcho jüko.” Hütsüta Jakobnü khütang kihchichonü Esaunü hütsü khyüchocho.

¹²Esaunü yocho, “Zahnü shemüsunung. Ih nü bekhu woyanung.”

¹³Jakobnü yocho, “Azarüti tase müzehcho nühnü müdhele ko aza nüba san ko misü nengdangsü lümxüre. Nyümong khüdu minü arüh alaa kümkhang, atii shünü sünung.

¹⁴Hütsüeko yanglilüm nüh akhu tsieng ko Ihnü khainü kanglungrü ko azarü nüpü Edom la nüh mü-iiphüde akohchonü dhsüthsa ronung.”

¹⁵Esaunü yocho, “Khang Ihnü I nyitsarü khürü nü yola pehjonung.” Ta Jakobnü yocho, “Tu thsanung! Ih nüchahnü achomang du ngunyüre.”

¹⁶Achotsü hütsü nyümong Esaunü Edom lang thalicho.

¹⁷Ta Jakobnü Sukot lang wücho ko apu nengdang kuh khüdu ko kanglungrü nengdang mütpahvi kyühkehcho. Hütsünü hiba müdüm te Sukot pü dsicho.

¹⁸Abi Mesopotamia langnü thalide, Jakob tsü Kanan la Shekem yangdi tsa rochicho ko yangdi shündhün luh la amüdongchah thsacho.

¹⁹Abinü hütsüba luh tsü Shekem au Hamor tsurüti te taripi thsih khüdunü lihcho.

²⁰Hütsüla abinü bholu khüdu külüpcho ko Israel Tsingrang nengla El dsicho.