Read Sangtam Naga LIPOH 34 Bible Online

LIPOH 34 - Sangtam Naga bible

LIPOH 34

¹Nyümong khüdu Jakob tsulatpü Dina ko Lea nyüh Kananlarü khürü xodhengnung wücho.

²Khode Hivrü Hamor tsurü hütsüba lih la Yangthsaba Shekemnü abükyü ngucho, abinü abükyü nowü khing mükhongcho.

³Ta abinü abükyü tsü atsah tsara nguchonü abükyü müicho ko khyünyücho.

⁴Abinü au te yocho, “I khyang I nitpü thsanung hiba khingkurü hi khyüjüng.”

⁵Jakobnü atsulatpü Dina thsangnyangjükopü yuchicho, ta atsurüti lipilih lang kanglungrü nyahnung wüpü lichonü arüh müthalide abinü tu münguchicho.

⁶Ko Shekem au Hamornü Jakob te chotanung wücho.

⁷Hütsüde Jakob tsurüti rangmülangnü lungcho. Khode arühnü atikehcho tsü yuchicho, arühnü wahnü zichürocho, tunüo Shekemnü Jakob tsulatpü thsangnyangjü Israelrü ashah khyüsohcho.

⁸Hamornü abi te yocho, “I tsurü Shekemnü nü tsulatpü tsü müire; yanglilüm abi te kukangsohng.

⁹I nyitsarü ko nü nyitsarü khyütanung anyengchotaba khüdu külüpnung.

¹⁰Hütsükhang ihrü lih la nührü linyücho la lieng; thangchi shithsabhülehng, ko palu kuthsi kang.”

¹¹Hütsüpü Shekemnü Dina au ko amungrü te yocho, “Hi I khyang mülajüng, ko nührünü tu khyünyüro Ihnü jünung.

¹²Nührünü jiyü ko mii khütoi thseng khyünyüro I te young; azatpü du tsü I khyang khyüsohkhang, nührünü tu chingnang Ihnü jünung.”

¹³Arüh nirü Dina tsü Shekemnü ashah khyüsohchonü, Jakob tsurütinü Shekem e au Hamor nyüh te arahnü lalingcho.

¹⁴Arühnü abi te yocho, “Ihrünü ihrü nirü amümüjüp-pehrü khüdu te kukangsohnung mükoh, tunüo hütsü ihrü nengdang ashah lile.

¹⁵Nührünü nührü adhrerü apüm ihrü kyo müjüp-pehnung münyengchokhang, ihrünü hütsü nyengchonung mükoh.

¹⁶Hütsüpü du kuthri-yangthritanung nyengchonung ko nührü yola li nührü te khüdu kangnung.

¹⁷Ta ihrünü yoba tsü nührünü mükhyücho ko mümüjüp-pehkhang, ihrünü abükyü nüpü tsinung.”

¹⁸Arühnü yoba tsü Hamor e atsurü Shekem nyühnü khyüchocho,

¹⁹ko hütsü denü dhrezaba tsünü ayocho roh-i nguchicho, tunüo abinü Jakob tsulatpü tsü khura müicho. Abi tsü arüh kukhi la ayingba thsacho.

²⁰Hütsüpü Hamor e atsudhre Shekem nyühnü yangdi tbükhüm lang tsü arüh nyitsarü te chotanung wücho.

²¹Arühnü yocho, “Hiri nyitsarü hi Ihsa te dee lümkhale; arüh Ihsa lih la Ihsa te lisohng ko shithsabhülehsohng. Alih tsü arüh shulümsü kükyo lile. Ihsanü arüh tsularü khyünung ko Ihsa tsularüsü arüh kuhla xengsohnung.

²²Ta arüh kyo, Ihsa adhrerü atümung müjüp-pehpü du arühnü Ihsa yola Ihsa te khüdu kang linung yore.

²³Hütsütakhang, arüh kanglungrü ko arüh licho lüpcho tsü Ihsa yo kangnung mahrü ang? Hütsüeko arüh Ihsa yola linung tsü mülanung.”

²⁴Hütsüde yangdi la lirü shutsakhung atümungnü Hamor e Shekem nyühnü yoba tsü khyüchocho ko adhrerü atümung müjüp-pehcho.

²⁵Nyümong asang khanglang, müjüp-pehba tsünü adhrerü atümung mathsa mükyangepü tu mülüm lide, Jakob tsurü nyüh anyüh, Dina amungrüti, Simeon ko Levi nyühnü nohsheng bipü yangdi la tsü züdu adhrerü atümung,

²⁶Hamor ko atsurü Shekem nyüh zeh kyüsehcho. Hütsüpü arühnü Shekem kuh lanü Dina nücheh nüpü tsicho.

²⁷Arüh kingthrümpü khanglang Jakob tsurü aparüti tsünü arüh nirü ashah khyüsohcho ngang yangdi la kohro apüm zang khyücho.

²⁸Arühnü yangdi ko luh lanü san, misü, gadu ko lüpcho khyücho.

²⁹Arüh tside kohro apüm, khingkurü azarü apüm ko kuhla alicho lüpcho hitsicho.

³⁰Jakobnü Simeon e Levi nyüh te yocho, “Nühjünü I khyang chongcha hirojüre; adelü Kananrü, Perizrü ko hiba lih la lirü atümungnü Ih thrünyinung. I te nyitsarü adrong müle; arüh apüm yohrütapü Ih mahkhang, Ihsa kukhi apüm changnung.”

³¹Ta arühnü yocho, “Ihrünü ihrü nirü shutsa-irü khüdu kangsohnung mükoh.”