Read Sangtam Naga LIPOH 35 Bible Online

LIPOH 35 - Sangtam Naga bible

LIPOH 35

¹Tsingrangbanü Jakob te yocho, “Bethel lang wüng ko hütsüla lieng. Ko hütsüla nü mung Esau tenü rang tside chüro shirüba Tsingrang khyang bholu khüdu külüpm.”

²Achotsü Jakobnü abi kukhirü te ko arüh yola lirü atümung te yocho, “Nührünü yohpüba yangpirü tsingrangti tsü pehng, nührü jangjang müsachehng ko jengki amüsa yohng.

³Ihsa hilanü Bethel lang tsinung ko Ih chongchade rükuba ko Ih khüdederü licho apüm la I te zehba Tsingrang khyang bholu khüdu külüpnung.”

⁴Achotsü arühnü Jakob khyang yangpirü tsingrangti apüm ko arüh nangku la nangmüshi apüm jücho. Ko abinü hütsüri Shekem amünyeh langsing yingte juhrang pehcho.

⁵Khode Jakob ko atsurüti tsinung shemüsucho, mükangmüshü lirüti drüsehcho, hütsünü sünüsü arüh mü-iiwücho.

⁶Ko Jakob ko anyitsarüti tsü Kanan lih la ade Bethel dsiba Luz lang rocho.

⁷Hütsüla abinü bholu khüdu külüpcho ko abinü hütsü müdüm te El Bethel pü dsicho, tunüo hütsüla abi amung tenü rang tside Tsingrangbanü apu jangjang abi te mishacho.

⁸Ade Rebeka rükutpü Debora sücho ko Bethel kihjinglang lahpi langsing ying te dhrürangcho. Hütsünü hiba te “Traba langsing pü dsicho.”

⁹Khode Jakob Mesopotamia langnü thalicho, Tsingrangbanü abi te thali shiro abi müwajücho.

¹⁰Tsingrangbanü abi te yocho, “Nü neng Jakob lile, ta ade tinü Israel pü dsinung.” Hütsüta Tsingrangbanü aneng Israel dsijücho.

¹¹Ko Tsingrangbanü abi te yocho, “Ih Akohbong Tsingrang. Tsuzarü khütang suhng. Nü chahnü yuchoti trahcho tsinung ko nüh yangthsarüti jümürü kangnung.

¹²Ihnü Abraham ko Isak khyang jüba lih tsü nü khyang jünung ko adesü nü khanglangsü nü shümtsurü khyang jünung”.

¹³Hütsüpü Tsingrangbanü abi pehjo tsicho.

¹⁴Hütsüta, Tsingrangbanü Jakob te chotaba la tsü, abinü amüdhethsa lung khyümnü hütsü chah yongkha ko tuji tungkeh müsachehcho.

¹⁵Ko abinü hütsü te Bethel pü dsicho.

¹⁶Jakob ko arüh kukhi Bethel pehjücho, ko Efrath chihnung rüm-o lide, Rachel azarü suronung becho chihcho, ko mikhung küro dee khingchicho.

¹⁷Khode alaa khingchi thsacho, atrotpünü abükyü te yocho, “Tüdrü, Rachel; adesü adhrerüe.”

¹⁸Ta abükyü tsü so tsicho ko amüsi longde abükyünü abi neng Benoni dsicho, ta aunü abi neng Benjamin dsijücho.

¹⁹Hütsüta Rachel sücho ko abükyü tsü ade Bethlehem dsiba Efrath langjüp dhrürangcho.

²⁰Jakobnü hütsüla amüdhethsa lung khüdu khyümcho ko hütsü chünye yingcheh Rachel kong amüdhethsa lile.

²¹Jakobnü khü wüpü Eder rangrangkuh liba khüulang shükuh thsa müdongcho.

²²Jakob hütsüba lih la liyade, Reuben-nü au ashümtpü Bilha te mükhongcho ko hütsü Jakobnü yuchi azi chürocho. Jakob tsurü dhüre-anyüh licho.

²³Lea chahnü Reuben (Jakob tsurü aukhuba), Simon, Levi, Juda, Isakar ko Zebulun.

²⁴Rachel chahnü Josef ko Benjamin.

²⁵Rachel kulitpü Bilha chahnü Dan ko Naftali.

²⁶Lea kulitpü Zilpa chahnü Gad ko Asher. Tsuzarü hiri apüm Mesopotamia la nümüsucho.

²⁷Jakobnü au Isak yanglang Abraham e Isak nyüh liba Hebron amünyeh Mamre lang wücho.

²⁸Isak kang thsih khüdu-pü qure lipü

²⁹shiseh sücho; ko atsu nyüh Esau e Jakob nyühnü abi dhrürangcho.