Read Sangtam Naga LIPOH 39 Bible Online

LIPOH 39 - Sangtam Naga bible

LIPOH 39

¹Ade Ishmaelrünü Josef Ijip lang nowücho ko Farao pohki adirü khüdu, Yangthsaba kuhla thsazirü anüchiba Potifar khyang icho.

²ABÜDONGBA Josef te zehcho ko abi khyang kohsohcho. Abi Ijiprü abüdongba kuhla licho

³ko abi te ABÜDONGBA zeh abinü nguchicho apüm la akoh ngusohrepü müdhecho.

⁴Potifarnü abi chah longlangcho ko abi dikehrü kangsohcho; ko abi kuhla lüpcho michah abi adhengyehrü kangsohcho.

⁵Hütsütinü, Josef khyanglangnü ABÜDONGBAnü Ijipba kukhi la alicho ko luh la licho lüpcho la müwajücho.

⁶Potifarnü abi licho lüpcho Josef khyang müshosohcho ko abinü yangtsuba chah khu apa tu nengdangsü mülümxücho. Josef tsü trungdrong atsa ko adhengnung atsa thsacho,

⁷ko azachah lipü Potifar nitpünü Josef mürüpcho ko abükyü te mükhongnung tsingdhengcho.

⁸Abinü hütsü thsongli abükyü te yocho, “Dheng, Ih lichonü hiba kuhla I büdongbanü tu lirünang mii mümüdhe. Abi kangcho lüpcho Ih müshosohre.

⁹Hiba kuhla I tenü adiu sü müle. Abinü nü chah khu lüpcho I khyang jüko. Khang Ihnü khüta hitari amünyi nguchi Tsingrangba nyüm nguchinung?”

¹⁰Josef te nyümong mükhu abükyünü kihchinye abinü münyicho.

¹¹Ta nyümong khüdu Josef kuhla anguchi nguchinung züdude, kulirü süsü hütsüla mülicho.

¹²Abükyünü abi fükhümnü rangpü yocho, “Ro I te yüpm.” Ta abinü afükhüm mii abükyü khehla pehjüpü kuhbe te tsicheh tsicho.

¹³Ta khode abi fükhüm pehjüpü kuh lanü shangcheh tsicho,

¹⁴abükyünü kulirüti dsinü yocho, “Hi dheng! I niinü noroba Ibrirü hinü Ihsa mükhimüngure. Abinü I yüpji lang ro I te khing thsangnyangnung müküpcho, ta Ihnü zühde khongcho.

¹⁵Ihnü khongchonü abinü afükhüm mii pehjüpü shangcheh tsiko.”

¹⁶Abükyünü abi fükhüm tsü anii kuh lang müro yingcheh yohpücho.

¹⁷Hütsüpü abi te atikehcho tsü yocho: “Nühnü noroba Ibrirü ayurü tsünü I yüpji lang ro Ih mükhimünguko.

¹⁸Ta Ihnü khongcho khu afükhüm mii pehjo shangyoh tsicho.”

¹⁹Josef abüdongba tsü dee rihlong chürocho

²⁰ko Josef rangnü Yangthsaba arangyoh kuhla khangticho, ko abi hütsüla licho.

²¹Ta ABÜDONGBA Josef te zehcho ko abi müwajücho, hütsünü arangyohrü nyahbanü abi chah longlangcho.

²²Abinü Josef tsü arangyohrü apüm dhengyehsohcho ko akhangti kuhla nguchi-nguyang apüm michah anüchirü kangsohcho.

²³Josefnü dhengyehba lüpcho tsü anyahbanü dhengnung tu mülümxücho, tunüo ABÜDONGBA Josef te zehcho ko abinü nguchicho lüpcho la müwajücho.