Read Sangtam Naga LIPOH 4 Bible Online

LIPOH 4 - Sangtam Naga bible

LIPOH 4

¹Hütsüpü Adamnü anitpü Eve te mükhongcho ko abükyü afü müdeng kangcho. Abükyünü azarü khüdu nümüsucho ko yocho, “ABÜDONGBA arüku khu adhrerü khüdu nguko.” Achotsü abi neng Kain dsijücho.

²Akhanglang abükyünü adhrerü khüdu, Abel nümüsucho. Abel san nyahrü kangcho, ta Kain luthsarü kangcho.

³Azachah lipü, Kain-nü anguchicho lanü khürü hiro ABÜDONGBA khyang amübü jücho.

⁴Achotsü Abelnü abi san yola akhu mütrücho khüdu hiro müpsehcho, ko shuh atsauba tsü amübü jücho. ABÜDONGBAnü Abel ko abinü mübücho la künyangcho,

⁵ta Kain ko abi amübü mükhyüchocho. Hütsünü Kain rihlong chürocho ko aromih dhrüdhrücho.

⁶Achotsü ABÜDONGBAnü Kain te yocho, “Tuepü nüh rihlong chüroro? Tuepü nü romih dhrüdhrüro?

⁷Nühnü athsalang tsü nguchirelang nüh münyübae. Ta nühnü mütsa nguchichonü, amünyi tsü nü trahtri la jole. Abinü nüh kohnyüre, ta nühnü hütsü kohchehbae.”

⁸Hütsüde Kain-nü ani Abel te yocho, “Ihsanü luh lang wonung.” Ko khode anyüh luh chihcho, Kain-nü ani Abel nyüm shemüsu abi müpsehcho.

⁹ABÜDONGBAnü Kain te tsingdhengcho, “Nü ni Abel khülo?” Abinü lalingcho, “Ihnü mümüdhe. Ih Ini nyahrü do?”

¹⁰Achotsü ABÜDONGBAnü yocho, “Nühnü hi tu nguchicho? Nüni shühnü alih lanü I te züdeko.

¹¹Nüh chokehcholako ko adelü nühnü luh müthsanung. Nühnü abi müpsehde alihnü abe kapü nüni shüh tsü müthsüko.

¹²Nühnü luthsa nye alihnü tusü müchührojünung; nüh limih la atsikehchah müliba atsichirü thsanung.”

¹³Ko Kain-nü ABÜDONGBA te yocho, “Hiba akhingchi hi I nengdang dirale.

¹⁴Nühnü alih lanü ko nü tenü Ih iipehre. Ih limih la atsikehchah müliba atsichirü, ko sünü Ih ngunang Ih müpsehnung.”

¹⁵Ta ABÜDONGBAnü lalingcho, “Hütsüta mah. Khürünü nüh müpsehkhang, hütsü rühyang akang dhünyeh khyünung.” Hütsüpü sünü Kain shironang abi mümüpsehsohnung abi chah amüdhethsa khüdu Tsingrangbanü tühcho.

¹⁶Ko Kain-nü ABÜDONGBA tenü za tsicho ko Eden nyüchürolang “Atsichirü lih”, pü dsiba lih la licho.

¹⁷Kain ko anitpü nyüh azarü khüdu nümüsucho ko aneng Enok dsijücho. Hütsüpü Kain-nü yangdi khüdu thricho ko atsurü nengla hütsü “Enok” pü dsicho.

¹⁸Enok tsurü Erad ko abi Mehujal au, ko Mehujal tsurü Methushal ko abi Lamek au licho.

¹⁹Lamek anitpü anyüh licho, Ada ko Zilla.

²⁰Adanü Jabal nümüsucho, abi tsü shükuh la li kanglungrü kangrü jümürü kangcho.

²¹Ani Jubal licho, abi tbenglah ko honglilah khithsarü jümürü kangcho.

²²Zillanü Tubal Kain nümüsucho, abinü imüyeng ko idhsenü thsunohrü kengcho. Tubal Kain nitpü khingkurü Nama licho.

²³Lameknü anitpü nyüh te yocho, “Ada ko Zilla, I yu nyieng: I chah thsakehjüchonü Ihnü dhrezarü khüdu müpsehko.

²⁴Kain müpsehcho ngang akang dhünyeh khang-khang, Khürünü Ih müpsehkhang, akang nyührepü dhünyeh khangnung.”

²⁵Adam e anitpü nyüh azarü apa khüdu nümüsucho. Abükyünü yocho, “Kain-nü müpsehba Abel mülihnung Tsingrangbanü I khyang azarü khüdu jüko.” Hütsünü abi neng Seth dsijücho.

²⁶Seth chahnü atsurü khüdu Enosh licho. Hütsütinü nyitsarünü ABÜDONGBA nengla dsinung dikehcho.