Read Sangtam Naga LIPOH 40 Bible Online

LIPOH 40 - Sangtam Naga bible

LIPOH 40

¹Azachah lipü Ijip Yangthsaba yongkha shing biba ko abi hümthse külüprü ayingba nyühnü, arüh Yangthsaba nyüm mehshücho.

²Abinü abi dikehrü hinyi te zichürocho

³ko anyüh tsü anyahrü aziba kuhla Josef yohpüba la rangyohcho.

⁴Arüh arangyoh la tsü anyahli licho ko anüchibanü Josef tsü arüh dikehsohcho.

⁵Romang khüdu arangyoh la tsü yongkha shing biba ko hümthse külüprü ayingba anyüdingnü melang khüdu-khüdu melangcho, ko melang tsü adüzü papa licho.

⁶Khode nyangnyü khüu Josef anyüh yang rocho, abinü arüh mükünyang ngucho.

⁷Abinü arüh te tsingdhengcho, “Tuepü nühjü chünye hitoh-i mükünyang nguro?”

⁸Anyünü lalingcho, “Ihjüdingnü melang khüdu-khüdu melangko, ko melang adüzü müchehnung hila süsü müle.” Josefnü yocho, “Melang müchehchehba tsü Tsingrangbanü jüre. I te nühjü melang tsü young.”

⁹Achotsü yongkha shing bibanü yocho, “I melang I bete shükusishü khüdu

¹⁰ajengza asang kehpü nguko. Hütsü ava thümlangyeng api picho ko shükusih tsü nyicho.

¹¹Ihnü Yangthsaba shing biyacho; hütsünü Ihnü shükusih tsü laachonü shing la tsü yümyohcho ko abi khyang jücho.”

¹²Josefnü yocho, “Hütsü adüzü hiroh-i linung: Ajengza asang adüzü nyümong asang.

¹³Nyümong asang kahla Yangthsabanü nüh müthehnung ko nü mülang pehjüpü nüpu nguchi thali jünung. Akhudi nüh abi shing birü thsade kyo nühnü abi shing binung.

¹⁴Ta khode nüh lüpcho tsapehnang Ih lümchehng, ko yanglilüm Yangthsaba te I nengdangsü yojüng ko hiba arangyoh lanü Ih nüchehnung müipü Ih troung.

¹⁵Ibrirü lih lanü Ih rangropü ko Ijip hila Ih arangyoh kuhla yohpünungthsa Ihnü tusü münguchi.”

¹⁶Khode hümthse külüprü ayingba tsünü yongkha shing biba melang müchehba tsü tsa ngucho, abinü Josef te yocho, “Ihnüsü melang khüdu melangko; Ihnü I thah chah hümthse loh asang dhipü yacho.

¹⁷Amungthriba loh la tsü hümthse alang papa Yangthsaba khyang zehcho, ta I thah chah loh la tsünü hümthse tsü uzatinü tsucho.”

¹⁸Josefnü yocho, “Hütsü adüzü hi: Loh asang adüzü nyümong asang.

¹⁹Nyümong asang kahla Yangthsabanü nüh müthehnung, ko nü ku dengnung! Hütsüpü abinü nü fü sing chah tbengnung, ko uzatinü nü shuh tsunung.”

²⁰Nyümong asang khanglang abi suro nyümong la Yangthsabanü abi pohki adirüti atümung khyang thsüti jücho; abinü abi yongkha shing biba ko hümthse külüprü ayingba anyüding lehcheh abi thsazirü bete norocho.

²¹Abinü abi yongkha shing biba thali apu nguchi jücho, ko abinü Farao khyang ashing jücho,

²²ta hümthse külüprü ayingba tsü aku dengcho. Hi apüm Josefnü yocho roh-i du tikehcho.

²³Ta yongkha shing bibanü khodesü Josef nengdang mülümdhengcho ko abi nengdang nbüchopehcho.