Read Sangtam Naga LIPOH 42 Bible Online

LIPOH 42 - Sangtam Naga bible

LIPOH 42

¹Khode Jakobnü Ijip la fürü lilepü yuchicho, abinü atsurüti te yocho, “Nührülü lango nguching.

²Ijip la fürü lilepü yuchire; Ihsa akongchonü müsünung jowü hütsülangnü fürü lii hirung.”

³Achotsü Josef amungrü dhüre tsü Ijip lang fürü lihnung jowücho,

⁴ta Jakobnü Josef anikhung Benjaminlü dhsürü mütohnü mütsaekopü müwüsohcho.

⁵Hütsüta bürü yola Jakob tsurüti fürü lihnung wücho, tunüo Kanan la yangkong licho.

⁶Ijip yanglih la Josef tsü governor thsa, abinü limih apüm langnü rorüh khyang fürü icho. Ko Josef amungrü rocho ko abi jingte alih la arüh romih hapkeh mükhukehcho.

⁷Khode Josefnü amungrü ngucho, abinü arüh dhengchehcho, ta abinü arüh mümüdherü roh-i ngusohcho. Abinü arüh te kakonü tsingdhengcho, “Nührü khüdenü rocho?” Arühnü lalingcho, “Ihrü Kanan lanü fürü lihnung rochoe.”

⁸Josefnü arüh dhengchehnye, arühnülü abi müdhengchehcho.

⁹Abinü arüh nengdang abi melang lümcheh yocho, “Nührü füzathsarüe; ihrü yanglih chehdhengnung rochobae.”

¹⁰Arühnü yocho, “Adirü, mah! Ihrü nü yurü roh-i fürü lihnung rocho lile.

¹¹Ihrü hi amung ani due. Ihrü füzathsarü mah, adirü, ihrü yuje chorü nyitsarüti lile.”

¹²Josefnü arüh te yocho, “Mah! nührü hi ihrü yanglih chehdhengnung rochobae.”

¹³Arühnü yocho, “Kanan lih la au khüdu chahnü ihrü jünirü atümungnü dhüre-anyüh thsacho. Ihrü nirü khüdu süko achangba tsü ade Uwa te lile.”

¹⁴Josefnü lalingcho, “Hütsü Ihnü yoba tsü mado! Nührü hi füzathsarüe.

¹⁵Ko Ihnü nührü hita thsatsünung: Nührü ani achangba tsü hila münorode nührü khodesü mütsisohnung pü Ihnü Yangthsaba neng la yuchümre.

¹⁶Nührü yola nyüh khüdu wüng ko abi norung. Ko anyingcho tsü nührünü yoba tsü yuje a mahnang mütsüpde arangyoh la linung. Hütsü yuje müthsakhang, Ihnü Yangthsaba nengla yore, nührü füzathsarütie.”

¹⁷Hütsüta abinü arüh nyümong asang arangyoh la yohpücho.

¹⁸Asangu nyümong la Josefnü arüh te yocho, “Ih Tsingrangba drürü nyitsarü khüdue, hütsüeko nührünü hi nguchikhang Ihnü nührü müthehnung.

¹⁹Nührü yuje nyitsarüepü müdhenung shulüm nührü yola nyüh khüdu arangyoh la lieng; ko anyingcho kongseh liba kukhirüti nengdang fürü tsü hiwüng.

²⁰Ko nührü ani achangba tsü I yanglang norung. Hütsü khu nührü tsü yuje-epü yuzi jünung ko Ihnü nührü müsüsohnung.”

²¹Arühnü hütsü nyengchocho, ko khüdunü khüdu te yocho, “Ho, Ihsanü Ihsa nirü te tu nguchicho hütsü amii chünye Ihsa chongchare; abi chongcha amülah la lide abi troungpü kihchicho Ihsanü mütro. Hütsü khu chünye Ihsa chongchare.”

²²Reuben-nü yocho, “Azaba tsü tüthsakehjüpü Ihnü nührü te yochoe, ta nührünü münyi. Hütsünü abi sücho ngang ade Ihsa khyang thali jüre.”

²³Arühnü chotaba tsü Josefnü nyichehcho, ta hütsü arühnü mümüdhe, tunüo arühnü abi te yu thsamülarü khu chotacho.

²⁴Hütsüde Josefnü arüh pehjo wü tramüsucho. Ko khode abinü thali chotanung tsacho, abi thali rocho ko Simeon throcheh arüh betenü rahsohcho.

²⁵Hütsüpü Josefnü amungrü bha thsajünung, ko arüh thsi tsü thali arüh bha la yohjünung, ko lang nengdang tsangdhi rungnüm jünung yuzeng jücho, ko hütsüta nguchicho.

²⁶Hütsüpü arühnü palu gadu chah bha thsacho ko shemüsu tsicho.

²⁷Ko hütsü romang arüh lang la nyehkehcho, ko arüh yola nyüh khüdunü abi gadu yangtüpnung abha lehchehde, apu thsi tsü zeh ngucho.

²⁸Abinü amung aniti dsinü yocho, “I khyanglü I thsi thali yohjüko! I bha la hi zehle.” Arüh müsi kyühchopehcho, ko drüsehnü khüdunü khüdu te yocho, “Tsingrangbanü Ihsa te hi tu nguchicho?”

²⁹Khode arühnü ro Kanan la au chihcho, atikehcho apüm tsü arühnü abi te yocho:

³⁰“Ijip la governornü ihrü te dee kakonü chota ihrü arüh lih chehdhengnung rochoepü mülangjüko.

³¹‘Ta ihrünü ihrü füzathsarü mah,’ ihrü yuje nyitsarüepü yoko.

³²Au khüdu chahnü ihrü jünirü dhüre-anyüh thsacho. Khüdu süko, ko achangba tsü Kanan la Uwa te lilepü yoko.

³³Hütsüde abinü yocho, ‘Nührünü yoba tsü yuje a mahnang hita nguchi thsatsünung: Nührü yola nyüh khüdu I te linung; ko anyingchoti fürü hipü thali tsieng.

³⁴Ko nührü nirü achangba tsü I yanglang norung. Hütsüpü du ajüje nührü füzathsarü mah pü Ihnü müdhenung; ko nührü amung nührü khyang thali jünung, ko nührünü hila shithsabhüleh linung.’ ”

³⁵Hütsüpü arühnü arüh bha zangdhengde, arüh atümungnü arüh thsi zeh ngucho; ko hütsü ngu arüh ko arüh au Jakob müsi pehcho.

³⁶Arüh aunü arüh te yocho, “Nührünü I tsurü atümung changsohnyürü mah-o? Josef müle; Simeon müle; ko ade nührünü Benjamin hitsinyüre. Hi Ih du khingchire.”

³⁷Reuben-nü au te yocho, “Ihnü Benjamin thali münorokhang, I tsurü anyüh tsü nühnü müpseh pehng. Abi I chah nyümkehjüng; Ihnü abi thali noronung.”

³⁸Ta Jakobnü yocho, “I tsudhre nührü te müwünung; amung sopehko, ko abi du nying lile. Lang la abi chah lango tikehnung kohle. Ih ashirüe, ko alongrichonü Ih sünung.”