Read Sangtam Naga LIPOH 43 Bible Online

LIPOH 43 - Sangtam Naga bible

LIPOH 43

¹Kanan la yangkong tsü amütsau kangcho

²ko khode Jakobrü tsutpurü Ijip langnü hiroba fürü tsü tsukhangcho, Jakobnü atsurüti te yocho, “Thali wüng ko Ihsa nengdang fürü aza lirung.”

³Judanü abi te yocho, “Nyitsarüba tsünü ihrü te Ini tsü münükhang abi ashirünung mii tüshirüpü khahkhah yoko.

⁴Hütsüeko nühnü ihrü nirü tsü rosohkhang, ihrünü wü fürü tsü lihnung.

⁵Ta nühnü mümülakhang, ihrü müwünung; tunüo abi münükhang nyitsarüba tsü ashirü mii tüshirü pü yoko.”

⁶Jakobnü yocho, “Ih hidoi bhamülingsohnungba tu thsanung nyitsarüba te tsü nührü ani apasü lilepü yocho?”

⁷Arühnü lalingcho, “Nyitsarüba tsünü ihrü ko Ihsa kukhi nengdang dee tsingdheng yocho, ‘Nüu akang mülio? Nührü nirü adesü mülio?’ Hütsü khu ihrünü yonungthsa kangcho. Ko abinü ihrü te Ini norung pü yonung khüta müdhenung?”

⁸Judanü au te yocho, “Azaba tsü I yola müthehng, ko ihrü shemüsunung. Hütsükhang Ihsa süsü kongseh müsünung.

⁹Ihnü Ipu akangnü abi nengdang I bha thsanungepü nyengchore. Ihnü abi nüh yang münorokhang, hütsü Ih mütang.

¹⁰Ihrü hidoi mümünurelang, adelü anyüpili loli ropü liba thsako.”

¹¹Arüh aunü arüh te yocho, “Hütsütakhang, nührünü governor khyang Ihsa lih lanü chürocho atsauba kohro hiri jiyü hijüng: resin moi, thsakukih, axümlichi, Pistakio singtse, ko almond.

¹²Ko nührünü thsisü anyüshinü alaa hieng, tunüo nührü bha la yohjüba thsi tsü thali hiwü jünungbae. Kümüdeo hütsü thsameh yohjüpüsü thsanung.

¹³Nührü nirü nowüng ta zah thalieng.

¹⁴Nyitsarüba tsünü nührü müinü Benjamin ko nührü jünirü Simeon nyüh thali jünungthsa Akohbong Tsingrangbanü chomangsohng. I nengdanglü alongri tsü alongrie.”

¹⁵Achotsü amungrü tsünü jiyü ko anyüshinü alaa thsi tsü hipü arüh yola Benjamin nüpü Ijip lang shemüsucho. Hütsüla arühnü Josef te shirütacho.

¹⁶Khode abinü arüh yola Benjamin zeh ngucho, abinü abi kuhla khehthsithsaba te yocho, “Hiri I kuh lang nowüng. Arüh anyümong I yola tsuyongnung. Hütsüeko kanglungrü khüdu müpseh rungnüm.”

¹⁷Kulibong tsünü abinü yochonyi arüh tsü Josef kuh lang nowücho.

¹⁸Arüh tsü abi kuh lang norode arühnü drüseh lümcho, “Ihsa hila noroba hi akhudi Ihsa bha la thsi zehba nengdang tsü thsae. Dhrongyengnü arühnü Ihsa benung ko Ihsa gadu khyüjüpü Ihsa abi yurü kangsohnung.”

¹⁹Hütsünü trahtri la tsünü arühnü khehthsithsaba te yocho,

²⁰“Adirü, müngulang ihrü hila fürü lihnung rochoe.

²¹Ko ihrü aromang lang la nyehkehde, ihrünü ihrü bha lehcheh dhengcho, ko ihrü apüm bha la thsi abübü zehcho. Hütsü ihrünü thali hirojo lile.

²²Ko adesü fürü apa lihnungsü thsi hiro lile. Sünü ihrü bha la ihrü thsi thali yohjüchonang mümüdhe.”

²³Khehthsithsabanü yocho, “Tumüthsa. Nührü tüdrü. Nührü Tsingrang, ko nührü tpurü Tsingrangnü nührü bha la thsi tsü yohjücho thsanungnong. Ihnülü nührü thsi tsü khyüchoko.” Hütsüpü abinü arüh yanglang Simeon norojücho.

²⁴Hütsüpü khehthsithsabanü arüh tsü kuh lang nowücho. Abinü arüh jing thsüthohsohnung kih jücho, ko abinü arüh gadu yangtüpcho.

²⁵Arühnü Josef rode abi khyang jiyünung rungnüm yohpücho, tunüo arüh abi yola yangtsunungepü arüh te yocho.

²⁶Khode Josef kuh lang rocho, arühnü jiyü tsü abi kuh lang hiwücho ko ajingte mükhukehcho.

²⁷Abinü arüh khüta liro pü tsingpü khanglang yocho, “Nührünü I te yoba nüu ashibasü khüta liro? Abi ade yingcheh akang lirü mah-o ko tsayeng mülio?”

²⁸Arühnü lalingcho, “Nü dikehrü ihrü au ade yingcheh akang lile.” Ko arühnü abi jingte mükhukeh jengreng jücho.

²⁹Khode Josefnü ani Benjamin ngucho, abinü yocho, “Nührünü I te yoba nührü ani achangba tsü hie ang? I tsudhre, Tsingrangbanü nüh müwajüng.”

³⁰Hütsüde Josefnü ani nguchonü alasih la khütang thahpo atra mürang abi yüpji lang wünü tracho.

³¹Hütsüpü abinü aromih mütsah pehpü chüro, apu jangjang müshüli tsuyongnung küdangnung yocho.

³²Josef tsingthsang khüdu chah ko amungrü aparü khüdu chah müshojücho. Ko Ijiprü khyang pathsa müshojücho, tunüo Ibrirü yola tsuyongnung tsü arühnü apohki jingdrang roh-i lümcho.

³³Arüh jünirü tsü Josef lahpi pii tsingthsang chah tsü arüh kang chungnü aziba chahnü achangba chii achunglangnü pümsohcho. Ko arühnü arüh pümsohba tsü ngu arüh-e arührü dhengta nyemüyangcho.

³⁴Hütsüpü Josef tsingthsang chahnü tsuyongba tsü arüh khyang müshojücho, ko Benjamin khyang aparü tenü müngashinü alaa müshojücho. Hütsüta arühnü Josef yola longnyüp yangtsucho.