Read Sangtam Naga LIPOH 44 Bible Online

LIPOH 44 - Sangtam Naga bible

LIPOH 44

¹Josefnü abi kuhla khehthsithsaba te hita thülacho: “Arühnü khüdoi kohnang arüh bha thsajüng.

²Ko achangba bha la tsü apu thsi ko I taripi shing tsü yohjüng.” Achotsü abinü yocho kyo nguchicho.

³Ko nyangnyü khüu mütoh amungrü tsü arüh gadu chahnü tsisohcho.

⁴Ko arüh yangdi lanü shusheng mütsie Josefnü khehthsithsaba te tsü yocho, “Zah arüh iiwüng. Khode nühnü arüh iiphünang arüh te young. Tuepü nührünü atsa tsü amütsanü roliro?

⁵Tuepü nührünü I büdongba taripi shing fühcho? Abi hütsü lanü yongre, ko müchehmülohnungsü hütsü bichire. Nührünü hi dira thsameh nguchiko.”

⁶Khode abinü wü arüh iiphücho, yu hiri tsü yocho.

⁷Arühnü abi te yocho, “Adirü, nühnü yoba tsü tu khu o? Ihrünü hütsüta münguchi pü ihrünü yuchümre.

⁸Ihrü bha la zehcho thsi mii Kanan lanü nüh yang hirocho nühnü müdhele. Khang khütapü nü büdongba kuh lanü hon mahkhang taripi fühnung?

⁹Adirü, ihrü khürü khe la hütsü zehkhang, abi tsü süsohng ko ihrü anyingchoti tsü nü yurü kangnung.”

¹⁰Abinü yocho, “Nührünü yocho kyo thsaang; ta shing khyüba du tsü I yurü kangnung ko nührü aparülü tsinung kohnung.”

¹¹Hütsüpü arühnü zah arüh bha müdongcho ko arühnü palu bha lehchehcho.

¹²Josef khehthsithsabanü aziba chahnü dikeh achangba chii khütang müzah zangdhengcho ko shing tsü Benjamin bha la zehcho.

¹³Amungrü awahchonü arüh jengki rohnahcho ko arüh gadu chah bha zangkehpü yangdi lang tsü thalicho.

¹⁴Khode Juda e anirü thali Josef kuh yang rocho, hütsü yingcheh abi kuhla licho. Arühnü ajingte mükhukehcho,

¹⁵ko Josefnü yocho, “Nührünü hi tu nguchicho? I roh-i nyitsarü khüdunü zii-thsadheng rangchehrepü nührünü mümüdhe ang?”

¹⁶Judanü lalingcho, “Adirü, Ihrünü tu yonung? Ihrünü khüta ritanung? Ihrünü khüta alanglangepü yonung? Tsingrangbanü ihrü mülang mishajüko. Adelü shing rangchehba nyitsarü du tsü mah, ta ihrü atümung nü yurü kangba due.”

¹⁷Josefnü yocho, “Hütsüta mah! Hütsüta khodesü müthsanung! Sü bha la shing zehcho, abi du tsü I yurü thsanung. Nührü anyingchotilü nührü au yanglang atbachi la thali wüng.”

¹⁸Judanü Josef yang küdu yocho, “Adirü, yanglilüm nü te chotanung mülaang. I te nü zii tüchüro; nüh Farao apu kyo lile.

¹⁹Adirü, nühnü ihrü te ‘Nüu mülio mahkhang nührü ani apa mülio?’ pü tsingdhengcho.

²⁰Ihrünü yocho, ‘Ihrü au dee shipü lile ko abi ashilang nümüsucho ihrü ani achangba khüdu lile. Azaba amung tsü süko ko atpa chahnü adelü abi due; hütsünü aunü khura müire.’

²¹Adirü, nühnü abi dhengdhengnung abi hila norung pü yocho,

²²ta ihrünü nü te azaba tsünü au müpehjüchehnung, tunüo au tsü sopehnungepü yocho.

²³Hütsüde nühnü yocho, ‘Nührünü nührü ani achangba tsü münorokhang ihrü nü yanglang thali türo pü yocho.’

²⁴“Khode ihrü Uwa yanglang thali wücho ihrünü abi te nühnü yocho roh-i yocho.

²⁵Ko abinü adesü wü fürü aza lieng pü ihrü te yode, ihrünü yocho,

²⁶‘Ihrü nirü achangba tsü müzehde ihrü münüyohnunge ko ihrünü müwünung. Ihrü nirü achangba tsü nüpü du wünung.’

²⁷Hütsüde Uwanü ihrü te yocho, ‘I nitpü Rachel I khyang azarü anyüh du nümüsujücho nührünü müdhele.

²⁸Khüdu chahpehko. Abi rangmü kanglungrünü rehnah tsupü linung, tunüo ade yingcheh Ihnü abi müngure.

²⁹Ade nührünü hi mii I tenü notsipü abi chah lango tikehkhang, Ih ashirü tsü alongrichonü sopehnung.’

³⁰“Ko ade adirü,” “Ihnü azaba tsü münüko Uwa yanglang wükhang, I yola azaba tsü müzeh pü nguyeng abi sünung.

³¹Abi akang tsü azaba chah ngakeh lile, ko abi khura ashirü tsü ihrünü wahsohba tsünü abi sünung.

³²Ihnü Uwa te azaba nengdang tsü I akangnü khangko. Ihnü azaba tsü münüli rokhang, I kang ayung hiba bha tsü I chah khang pü yoko.

³³Hütsüeko adirü, azaba mülih Ih hila ayurü thsa lisohng, ko abi tsü amungrü yola wüsohng.

³⁴Azaba tsü müzehpü Ih khüta Uwa yanglang thalinung? Ihnü Uwa chah hiba bhamüling tikehsohnunglü mürang.”