Read Sangtam Naga LIPOH 45 Bible Online

LIPOH 45 - Sangtam Naga bible

LIPOH 45

¹Hütsütade, Josefnü akulirüti bete alümlong müranglicheh hütsü lanü tsinung yuzeng jücho. Hütsüla abi yola süsü mülide, Josefnü amungrü te abi sünang yocho.

²Abinü khütang zi tracho ko hütsü Ijiprünü yuchi Farao yanglang yusi tsü hiwü yocho.

³Josefnü amungrü te yocho, “Ih Josef e. Uwa akang mülio?” Ta arühnü hi yuchide, dira drümüyangchonü tusü mülalingchehcho.

⁴Hütsünü Josefnü arüh te yocho, “Yanglilüm I shündhün rung.” Ih nührünü Ijip lang iba nührü ani Josef e.

⁵Ade nührünü Ih hila icho shulüm tüwah, mahkhang nührübürü tümütangta. Hiba hi Tsingrangbanü nyitsarü khümchonung shulüm Ih tsehleh müthehchoba lile.

⁶Alih la yangkong hi kang anyüu due; Adesü kang münga ma müshunung mahkhang ma müxanung.

⁷Nührü ko nührü trah müchangsohnung ko hita thsayahiyanü nührü khümchosohnung Tsingrangbanü Ih tsehleh müthehchoba lile.

⁸Hütsüeko Ih hila müthehba tsü nührünü mah, ta Tsingrangbanü lile. Abinü Ih Yangthsaba chitung kangsohcho. Ih abi yanglih apüm xükümrü lile; Ih Ijip lih apüm la yangthsarü lile.

⁹“Ade zah Uwa yanglang thali wüng ko abi te atsudhre Josefnü hita yoreding: Tsingrangbanü Ijip apüm la Ih Yangthsarü kangsohko; tümünupü I yanglang rung.

¹⁰Nührü I shündhün linungthsa nührü, nührü tsurü, nührü shümtsurü, nührü san, nührü miza, nührü misü ko nührü licho lüpcho nüpü Goshen la ro lieng.

¹¹Nührü Goshen la likhang, Ihnü nührü xükümchehnung. Adesü kang münga yangkong linung; hütsünü Ihnü nührü, nührü kukhiti ko nührü kanglungrü mükongsohnyüre.”

¹²Josefnü mütozah yocho, “Ade nührü atümungnü ko Benjamin-nü mii Ih yuje Josef epü ngule.

¹³Ijip lih la Ih khüta tase liro ko nührünü ngucho lüpcho shulüm Uwa te young. Hütsüeko dhsüthsa wüng ko abi norung.”

¹⁴Hütsüpü abinü ani Benjamin chah khyahripü tranung dikehcho ko abinü khyahride Benjaminsü tracho.

¹⁵Hütsüpü abinü traanü amungrü müipi chah khyahri müthsüpcho. Hütsüpü khanglang amungrünü abi te chotamüsucho.

¹⁶Khode amungrü rocho yusi tsü Farao kuh chihcho, Yangthsaba ko abi chitungrünü künyangcho.

¹⁷Abinü Josef te yocho, “Nü mungrü te arüh bha thsapü Kanan lih lang thalinung young.

¹⁸Arühnü arüh au ko arüh kukhiti nüpü hila rosohng. Ihnü arüh khyang Ijip la alih atsauba jünung ko arüh turümükoh linung.

¹⁹Ko arüh tsurü nitpürü ko arüh au nünung Ijip lanü misü kari nüngpü arüh te young.

²⁰Arüh kuthsi pehjo ronung tülümxüding; tunüo Ijip lih apüm yola atsauba tsü arüh yo thsanung.”

²¹Jakob tsurütinü arüh te yocho kyo nguchicho. Yangthsabanü mülacho roh-i Josefnü arüh khyang misü kari ko lang nengdang tsangdhi jücho.

²²Abinü arüh khyang amülihnung shüsü jücho, ta Benjamin khyanglü taripi shekel thsih asang ko shü münga pii mülihnung jücho.

²³Abinü au khyang Ijiprü kohro atsaubati, fürü, hüm ko lang la tsangdhi gadu dhüre zang mühehcho.

²⁴Abinü amungrü müyangyohchücho ko abinü arüh zade yocho, “Lang la tüyübüta.”

²⁵Arühnü Ijip pehjüpü Kanan lang arüh au Jakob yang thali rocho.

²⁶Arühnü abi te yocho, “Josef ade yingcheh akang lile. Abi Ijip lih apüm la yangthsarü kangko!” Hütsü yuchi Jakob sütücho ko abinü arüh chah müyudsicho.

²⁷Ta khode arühnü abi te Josefnü yochücho apüm yocho ko abi Ijip lang nowünung misü kari müthehcho tsü ngucho, abi sütücho lanü chichehcho.

²⁸Abinü yocho, “I tsudhre Josef ade yingcheh akang lile! Ihnü khyünyücho apümnü hidu. Ih müsüdenü wü abi shirünung.”