Read Sangtam Naga LIPOH 46 Bible Online

LIPOH 46 - Sangtam Naga bible

LIPOH 46

¹Jakobnü alicho apüm zangcho ko au Isak Tsingrang khyang kangmübü jünung Bersheba lang wücho.

²Hütsü romang Tsingrangbanü abi te müngucheh la chota dsicho, “Jakob, Jakob!” Abinü lalingcho, “Ih hila lile.”

³Abinü yocho, “Ih Tsingrang, nüu Tsingrang! Ijip lang wünung tüdrü; Ihnü hütsüla nü trah yucho arangcheh kangsohnung.

⁴Ih nü te Ijip lang wünung, ko Ihnü nü hung hiba lih lang thali noronung. Nüh süde Josef nü te linung.”

⁵Jakobnü Bersheba lanü shemüsucho. Atsurütinü Ijip Yangthsabanü müthehba misü kari la tsü abi ko khingkurü azarü pümsohcho.

⁶Hütsüpü arühnü Kanan la khyübülungcho kuthsi ko kanglungrüti nüpü Ijip lang shemüsucho.

⁷Jakobnü abi chahnü trahchochoti, atsurüti, ashümtsurüti, atsularüti ko ashümlarüti atümung abi yola nücho.

⁸Jakobrü tsutpurü abi yola Ijip lang würüti tsü atsurü aukhuba Reuben ko Reuben tsurüti;

⁹Hanok, Pallu, Hezron, ko Karmi.

¹⁰Simeon ko atsurüti: Jemuel, Jamin, Ohad, Jakin, Zohar ko Kananlarü khüdu tsurü Shaul.

¹¹Levi ko atsurüti: Gershon, Kohat ko Merari.

¹²Juda ko atsurüti: Shela, Perez ko Zera. (Juda tsurü apa Er ko Onan nyüh Kanan la sücho.) Perez tsurü Hezron ko Hamul licho.

¹³Isakar ko atsurüti: Tola, Pua, Jashub ko Shimron.

¹⁴Zebulun ko atsurüti: Sered, Elon ko Jalel.

¹⁵Jakob khyang Leanü Mesopotamia la nümüsujücho khingkurü Dina chah lahkeh, adhrerüti tsü hiri licho. Lea chahnü abi khyang nümüsujücho atümungnü arüh sangrepü asang thsacho.

¹⁶Gad ko atsurüti: Zefon, Hagi, Shuni, Ezbon, Eri, Arod ko Areli.

¹⁷Asher ko atsurüti: Imna, Ishva, Ishvi, Beria ko arüh nilarü Sera. Beria tsurü Heber ko Malkiel licho.

¹⁸Hiri dhüre-dhüroh hi Laban-nü atsulatpü Lea khyang jüba kulilarü, Zilpa chahnü Jakob khyang nümüsujücho lile.

¹⁹Jakob nitpü Rachel chahnü adhrerü anyüh licho: Josef ko Benjamin.

²⁰Ijip la Josef nitpü Heliopolis la bebürü khüdu Potifera tsulatpü, Asenath chahnü adhrerü anyüh Manase ko Efraim licho.

²¹Benjamin tsurüti: Bela, Beker, Ashbel, Gera, Naman, Ehi, Rosh, Mupim, Hupim ko Ard licho.

²²Hiri dhüre-müyü hi Jakob khyang Rachelnü nümüsujücho lile.

²³Dan atsurü khüdu Hushim licho.

²⁴Naftali ko atsurüti: Jazel, Guni, Jezer ko Shilem.

²⁵Hiri dhünye hi Laban-nü atsulatpü Rachel khyang jüba kulilarü Bilha chahnü Jakob khyang nümüsujücho lile.

²⁶Ijip lang wüde Jakob chahnü trahchocho atsunyahlarüti mükhipü arüh atümungnü rohrepü dhüroh thsacho.

²⁷Ijip la Josef tsurü anyüh thsacho, hütsü yohpü Ijip lang jowürü atümungnü arüh nyühre thsacho.

²⁸Jakobnü Josef te ro Goshen la arüh shirüng pü yosohnung Juda tsehleh müthehcho. Khode arüh ro chihcho,

²⁹Josefnü abi nyübong kari la pümpü au shirünung Goshen lang wücho. Khode arüh shirütacho, Josefnü au hong la khyahripü anyahli tracho.

³⁰Jakobnü Josef te yocho, “Ade yingcheh nüh akang licho Ihnü nguko, ko müdheko, Ih sünye mülongri.”

³¹Hütsüde Josefnü amungrü ko aurü kukhirüti te yocho, “Ihnü ade wü Farao te Kanan lanü I mungrü ko Uwarü kukhi apüm I yanglang rochiko pü yonung.

³²Ihnü abi te nührü tsü san nyahrü e ko kanglungrü dhengyehre ko nührü kanglungrüti apüm noroko pü yonung.

³³Ko khode Yangthsabanü nührü te nührü nguchi tsingdhengnang,

³⁴nührü jümürü roh-i nührüsü akang ayung kanglungrü du xükümrepü yonung tünbüchü. Hütsütakhang abinü nührü Goshen la lisohnung.” Josefnü hi yoba tsü Ijiprünü san-nyanhrü tsü zong licho.