Read Sangtam Naga LIPOH 47 Bible Online

LIPOH 47 - Sangtam Naga bible

LIPOH 47

¹Hütsüpü Josefnü amungrü nyüh münga nüpü Farao yang wücho. Abinü yocho, “Uwa ko I mungrüti Kanan lanü arüh san ko kanglungrü ko arüh kohro apüm hipü roko. Arüh ade Goshen la lile.”

²Hütsüpü abinü amungrüti tsü abi te shirüsohcho.

³Yangthsabanü arüh te tsingdhengcho, “Nührü tu nguchiro?” Arühnü lalingcho, “Ihrü jümürü kyo ihrü san nyahrüe.”

⁴“Kanan lih la yangkong dirachonü san tsuyongchah müle, hütsünü ihrü nührü lih la linung rore. Yanglilüm ihrü Goshen la linung mülajüng.”

⁵Faraonü Josef te yocho, “Ade nüu ko nü mungrüti rochiko,

⁶Ijip lih tsü arüh yoe. Goshen ngah alih asu-u la tsü arüh lisohng. Ko arüh yola nguchi kohrü khürü zehkhang, I kanglungrü xükümsohng.”

⁷Hütsüpü Josefnü au Jakob noro Farao shirüsohcho. Jakobnü Yangthsaba müwajücho

⁸ko Yangthsabanü abi te tsingdhengcho, “Nüh kang khüdoi o?”

⁹Jakobnü lalingcho, “I akang rümchi lirocho kang thsih khüdu pü sangre. I jümürüti kang asheng rümchichote müjangdhengde, I akanglü akhikyah ko chongcha du.”

¹⁰Jakobnü Yangthsaba khyang aza amüwa jüpü tsicho.

¹¹Hütsüta Josefnü au ko amungrüti tsü Yangthsabanü mülacho kyo Rameses yangdi shündhün Ijip la alih atsauba la lisohcho.

¹²Josefnü au, amungrüti ko au kukhirü atümung achangba chii tsuyongnung chixicho.

¹³Yangkong tsü dirachonü khüdesü tsuyongnung müngucho ko Ijiprü ko Kananrü akongchonü re müzeh kangcho.

¹⁴Arühnü fürü icho thsi tsü khyübülungcho ko Josefnü Farao kuh lang hiwücho.

¹⁵Khode Ijip ko Kanan la thsi apüm pehkhangcho, Ijiprünü ro Josef te yocho, “Ihrü khyang tsuyongnung jüng! Ihrü tüsüsoh. Lango nguchi jüng! Ihrü thsi apüm thümko.”

¹⁶Josefnü lalingcho, “Nührü thsi apüm thümchokhang, nührü kanglungrü hirung ko hütsü mülih Ihnü tsuyongnung jünung.”

¹⁷Achotsü arühnü Josef yang arüh kanglungrü hirocho ko arüh kuri, san, miza, misü ko gadu ngang tsü abinü tsuyongnung jücho. Hütsü kang arüh kanglungrü mülih abinü arüh khyang tsuyongnung chixicho.

¹⁸Kang khüu tsü arühnü ro abi te yocho, “Adirü, ihrünü nü te mürahmütsanung, ihrü thsi apüm thümko ko ihrü kanglungrü apüm nüyo kangko. Adelü ihrü fü ko alih chah khu apa tu müle.

¹⁹Ihrü tüsüsoh! Lango nguchijüng! Ihrü luh tüpehsoh. Tsuyongnung jüng ko ihrü ko ihrü lih khyüng. Ihrü Yangthsaba yuhrü thsanung, ko ihrü lih abi yo thsanung. Ihrü akang linung fürü jüng ko ihrü luh la chisinung majüh jüng.”

²⁰Josefnü Yangthsaba khyang Ijip la alih apüm lihjücho. Ijiprü müipi arüh lih inungthsa kangcho, tunüo yangkong tsü diracho; ko alih apüm Yangthsaba yo kangcho.

²¹Josefnü Ijiprü khüulangnü khüulang chii ayurü kangsohcho.

²²Abinü mülihba tsü bebürü lih du thsacho. Arüh khyang Yangthsabanü arüh akang lisohnung arüh nohlüm jüchonü bebürünü arüh lih inung müdhsütahcho.

²³Josefnü müyurü te yocho, “Adelü Ihnü nührü ko nührü lih Yangthsaba khyang lihjücho nührünü müdhele. Hila nührü luh la chisinung majüh lile.

²⁴Maxade nührünü Yangthsaba khyang nohlüm münga la khüdu jüng. Anyingcho tsü nührünü majüh ko nührübürü ko nührü kukhi nengdang bichieng.”

²⁵Arühnü yocho, “Adirü, nühnü ihrü akang khümchoko; nühnü ihrü müiko ko ihrü Yangthsaba yuhrü kangnung.”

²⁶Hütsüta nohlüm münga la khüdu Yangthsaba khyang jünung tsü Ijip la yuzeng Josefnü külüpcho. Hiba yuzeng chünye yingcheh bichire. Bebürü lih du tsü Farao kuthsi mükangcho.

²⁷Hütsüta Israelrü tsü Ijip la Goshen ngah la alirü kang ko suhcheh licho.

²⁸Ijip la Jakob kang dhüre-dhünyeh lide, abi kang 147 azirü thsacho.

²⁹Abi asünung becho chii rode, abinü atsudhre Josef dsinü yocho, “I phüm pohki nü kheh tohyohchüng ko nühnü I me Ijip la müdhrürangnungepü yuchüm.

³⁰I urü licho la I merangsohnyüre; hütsüeko Ijip lanü Ih hiwü arüh dhrürangcho la Ih dhrürang. Josefnü lalingcho, Nühnü yocho kyo Ihnü nguchinung.”

³¹Jakobnü yocho, “Nühnü nguchinungepü yuchüm.” Josefnü yuchümcho, ko Jakobnü achongnong chahnü anengsejücho.