Read Sangtam Naga LIPOH 50 Bible Online

LIPOH 50 - Sangtam Naga bible

LIPOH 50

¹Josefnü au chah tbhakeh tranü aromih chah müthsüpcho.

²Hütsüpü abinü au fü la müsühnung moi jünung yuzeng jücho.

³Lede roh-i nyümong yüre müsühnung moi tsü jücho. Hütsüpü Ijiprünü nyümong nyühre abi meshücho.

⁴Khode meshükacho, Josefnü Yangthsaba chitung thsazirü te yocho, “Yanglilüm yusi hi Farao yanglang hiwüng:

⁵Uwanü abi sünungthsade, Kanan la abinü rungnüm yohpüba kongla tsü dhrürangsohnung I khyang yuchümsohko. Hütsüeko wünü Uwa me rangpü thali ronung mülajüng.”

⁶Yangthsabanü yocho, “Wüng ko nühnü nyengchocho kyo nüu me rang.”

⁷Achotsü Josefnü au me rangnung wücho. Josef yola Yangthsaba chitung thsazirü apüm, abi yangdi la azirü apüm ko Ijip lih la langnürü apüm wücho.

⁸Abi kukhi, amungrü ko aurü kukhi anyingcho apüm abi yola wücho. Azarü nümnüm, miza, san ko misü du Goshen la nying pehjücho.

⁹Adhrerüti nyübong kari la ko kuri chahnü abi yola wücho; ko arüh mülung arangcheh wücho.

¹⁰Khode arüh Jordan nyüchüro lahpi Atad la pungkhyang chii rocho, arühnü yuva chüro anyahli tracho ko Josefnü nyümong dhünyeh meshü-yahthsa mungcho.

¹¹Khode Kananrünü Atad la meshücho tsü ngucho, arühnü yocho, “Ijiprünü khüta athsalangnü mesho mungro!” Hütsünü hiba müdüm te Abel Mizraim pü dsicho.

¹²Hütsüta Jakob tsurütinü arüh te yuzengjücho kyo nguchicho;

¹³arühnü abi me tsü Kanan lang hiwü, Abrahamnü Hit-rü Efron te merangji thsanung lihba Mamre nyüchürolang Makpela lungkhi la tsü dhrürangcho.

¹⁴Josefnü au me rangpü khanglang, abinü amungrü ko meranglang rorüh apüm yola Ijip lang thalicho.

¹⁵Arüh au süpü khanglang, Josef amungrünü yocho, “Josefnü ade yingcheh Ihsa thrünyikhang ko Ihsanü abi chah amütsa nguchicho ngang rühyangnung lümkhang khütanung?”

¹⁶Achotsü arühnü Josef yang yusi khüdu müthehcho: “Ihsa au müsüde,

¹⁷abinü ihrü te, ihrünü nü te amütsa nguchicho ngang mülang chingna pü yocho. Hütsüeko, yanglilüm ihrü nüu Tsingrang dikehrünü thsamehcho mülang pehjüng.” Hiba yusi yuchide Josefnü tracho.

¹⁸Hütsüpü amungrünü arühbürü ro ajingte mükhukehcho. Arühnü yocho, “Ihrü hila nü jingte nü yuhrü roh-i lile.”

¹⁹Ta Josefnü arüh te yocho, “Tüdrü; Ihnü Tsingrangba mülih müthsanung.

²⁰Nührünü Ih nyüm amütsa nguchicho, ta hütsü khu chünye nyitsarü adrong akang khümchonungthsa Tsingrangbanü atsa kangsohko.

²¹Nührü tu drünung müle. Ihnü nührü ko nührü tsuzarüti xükümnung.” Hütsüta abinü amüi yunü arüh tsechili jüba tsünü arüh lasih la thahpücho.

²²Mütozah Josef tsü aurü tsutpurü te Ijip la licho; ko abi süde abi kang thsih khüdu pü dhüre thsacho.

²³Abinü Efraim tsurü ko shümtsurü mii ngunungthsa licho. Abinü Manase tsurü Machir tsurü mii ngu akang licho.

²⁴Abinü amungrü te yocho, “Ih sünungthsale, ta Tsingrangbanü nührü tronung ko hiba lih lanü Abraham, Isak ko Jakobrü te nyengchoba lih lang tsü abinü nührü nüchehnung.”

²⁵Hütsüpü Josefnü hi yuchümsohcho. Abinü yocho, “Khode Tsingrangbanü nührü hütsüba lih lang nowünang, nührünü I me mii hiwünungepü I te nyengchoung.”

²⁶Hütsüta Josef kang thsih khüdu pü dhüre thsade Ijip la sücho. Arühnü abi fü la müsühnung moi yohcho ko kong la yohpücho.