Read Sangtam Naga LIPOH 8 Bible Online

LIPOH 8 - Sangtam Naga bible

LIPOH 8

¹Tsingrangbanü Noa ko singkong la abi te kanglungrü apüm münbüchücho; Abinü nyübong khüdu chüro füsohcho ko kih tsü nyehnung dikehcho.

²Alih yonglang kihnatung ko ning chah kihmülüm trahtri khangticho.

³Tsing zahcho ko nyümong thsih khüdu-pü dhünyang la kih tsü nyehcho.

⁴Choo dhünyeh la nyümong dhüre-dhünyeh-u nyümong singkong tsü Ararat zong chah nyehkehcho.

⁵Kih tsü mütozah nyehcho, ko choo dhüre la akhudiba nyümong akhang amüjohti ngucho.

⁶Nyümong yüre khanglang Noanü nyübongkhi khüdu khangthrucho

⁷ko khüyahla khüdu müthehcho. Ta kih tsü mükung yingcheh, abinü müthalipü mongchi rachicho.

⁸Hütsüde Noanü kih tsü münyehnang müdhenung mümüdhrü khüdu müthehcho,

⁹ta alih tsü kihnü tingti lichonü mümüdhrü tsü amongkehnung müngucho. Abinü singkong lang thali mong wücho ko Noanü akheh tohchehchü nüyohcho.

¹⁰Adesü abinü nyümong dhünyeh lipü thali mümüdhrü tsü müthehcho.

¹¹Anyüzehlang abinü aha la olive va axeng sho bipü thali rocho. Hütsü khu Noanü kih tsü kungko pü müdhecho.

¹²Adesü nyümong dhünyeh lipü mümüdhrü tsü thali müthehcho; ko adelü thali mürocho.

¹³Noa kang 601 azirü thsade, akhudiba choo la akhudiba nyümong, kih tsü nyehcho. Noanü singkong lüpticho tsü khangthru dhengcho, ko alih kungpü ngucho.

¹⁴Choo anyüu la nyümong mükyüpü dhünyeh-u nyümong limih tsü kungchehpü licho.

¹⁵Tsingrangbanü Noa te yocho,

¹⁶“Nüh, nü nitpü, nü tsurüti ko arüh nitpürüti singkong lanü chüdung.

¹⁷Ko limih jeng suhchehnung uza ko kanglungrü apüm müthehchüng.”

¹⁸Achotsü Noa, anitpü, atsurüti ko arüh nitpürüti nüpü singkong lanü chüducho.

¹⁹Kanglungrü ko uza apüm palu palu hung singkong la tsünü chürocho.

²⁰Noanü ABÜDONGBA khyang bholu khüdu külüpcho; abinü amüsa kanglungrü ko uza müipi lanü khüdu throcheh üpümshünü bholu chah kangmübü trüpcho.

²¹Kangmübü axümlichi tsünü ABÜDONGBA künyangsohcho, achotsü Abinü alasih la yocho, “Nyitsarü thsacholanü adelü khodesü limih müchokehcholanung; abi azadenü amünyi lümlong tsü Ihnü müdhele. Ade roh-i kanglungrüsü khodesü Ihnü müchangsohnung.

²²Limih müchangkade khyümnung ko xanung, arüh ko adhsa, tsingkang ko müyü, anyümong ko aromang khodesü müchangkapü linung.”