Read Sangtam Naga 2 SAMUEL 11 Bible Online

2 SAMUEL 11 - Sangtam Naga bible

2 SAMUEL 11

¹Hütsüba kang chisi kyang Yangthsarünü khatanung wüba shikhe, Davidnü Israel rothsarü yola Joab ko abi pohki adirüti chitalang müthehcho; arühnü Amonrü kohcheh ko Raba yangdi khyücho. Ta David apulü Jerusalem la licho.

²Nyümong khüdu, anyüzehlang, Davidnü achongnong lanü shemüsu abi kuh amunglang küducho. Abi hütsü michah tsehchi rachide, abinü khingkurü khüdu mütsahya ngucho. Abükyü tsü atsah khütang tsacho.

³Achotsü abinü hütsü sünang müdhenung shulüm yuhirü khürü müthehcho, ko abükyü tsü Eliam tsulatpü ko Hit-rü Uria nitpü Bathsheba thsacho.

⁴Davidnü yuhirü khürü mütheh abükyü norocho; ko abükyü abi yang rocho, ko abinü abükyü te mükhongcho. (Abükyü tsü ayah wübalanü müsachehpü libekhyah thsacho.) Ko abükyü akuhlang thali wücho.

⁵Ko abükyü fü müdeng kangcho; ko abükyünü David yang yusi hirü mütheh yocho, “Ifü müdeng.”

⁶Achotsü Davidnü Joab yang yuva khüdu müthehcho: “Hit-rü Uria tsü I yanglang rosohng.” Achotsü Joabnü abi David yang wüsohcho.

⁷Khode Uria tsü ro chihcho, Davidnü abi te Joab ko rothsarüti khüta liro ko khata tsü khüta tsi yaropü tsingdhengcho.

⁸Hütsüpü abinü Uria te yocho, “Kuh lang wüng ko azachah kyahshang.” Uria tsicho ko Davidnü abi kuh yang jiyü khürü müthehcho.

⁹Ta Uria kuh lang müwüpü Yangthsaba kuhla anyahrü yola yüpcho.

¹⁰Khode Davidnü Uria kuh lang müwü pü müdhecho, abinü abi te tsingdhengcho, “Nüh shitseh langnü rocho mahrü do? tuepü nüh kuh lang müwücho?”

¹¹Urianü lalingcho, “Yuzeng Singdi ko Israelrü ko Judarü khata lang wü Shükuh la lile; ko I anüchiba Joab ko abi pohki adirüti jungchah li rachile. Khang Ihnü khüta kuh lang wü tsuyong ko I nitpü te yüpnung kohnung? Nüh litizah, ko nü nbü akang litizah, hütsüta khodesü münguchinung Ihnü yuchümre.”

¹²Achotsü Davidnü yocho, “Khang chünye hila püm ko atu nüh thali wüsohnung.” Hütsüta Urianü hütsü nyümong ko nyümong khüu Jerusalem la licho.

¹³Davidnü abi yangtsunung dsiyohcho, ko müchasohcho. Ta hütsü romang sü Urianü kuh lang müwüpü anyahrü yola yüpcho.

¹⁴Nyangnyü khüu Davidnü vathrah khüdu Joab te thrahpü hütsü Uria khyang hiwüsohcho.

¹⁵Abinü hita thrahcho: “Chita amütsau la, bekhulang tsü Uria yasohng ko aparü shehling, ko abi kyüsehsohng.”

¹⁶Hütsüta Joabnü Yangdi tsü khyüchi yade, arorüh dee rezeh yaba müdüm la tsü Uria wüsohcho.

¹⁷Yangdi la tsünü arorüh mülungo chüro Joab nyitsarü te chitacho; ko David yo adirüti khürü yola Uria mii zeh sücho.

¹⁸Hütsüpü Joabnü David te khata nengdang tsü yo thrahcho;

¹⁹ko abinü yuhirü te tsü hita thülacho, “Nühnü Yangthsaba te khata nengdang tsü apüm yopü khanglang,

²⁰abi zichüro nü te hita tsingdhengnung kohle. ‘Tuepü hütsüdoi shündhün wücho? Arühnü tbü la tsünü tbüdengnü kyanung mümüdhecho do?

²¹Gideon tsurü Abimelek khüta sücho mülümcheh ang? Thebez la tbü lanü khingkurü khüdunü anyehsing lung dhichahchü abi mapsehsohcho. Khang, tuepü hütsüdoi tbü tsü münyeh wücho?’ Yangthsabanü hütsüta nü te tsingdhengkhang, abi te hita young, ‘Nü pohki adirü Uria mii süko.’ ”

²²Achotsü yuhiba tsünü David yang wünü anüchiba Joabnü thülacho kyo tsü abi te yocho.

²³Abinü yocho, “Ihrü tenü ihrü rorüh tsü re azeh-u thsapü yangdi la tsünü chüro chitacho, ta ihrünü arüh thali yangdi tbü yonglang iiyohchücho.

²⁴Hütsüta arüh tbü la tsünü ihrü chah tbüdengnü kyacho ko nü pohki adirüti khürü sücho ko Uria mii süko.”

²⁵Davidnü yuhiba te yocho, “Khata la tsü sünung müdherü mahrü tsü, Joab rezehchisohng ko abi te tüwah pü young. Alaa zii chitaang ko yangdi tsü khyünung abi te young.”

²⁶Khode Bathshebanü abi sücho yuva yuchicho, abükyünü abi me shücho.

²⁷Khode meshü pisacho, Davidnü abükyü Yangthsaba kuh lang norocho; ko abükyü tsü anitpü kangcho ko abükyünü adhrerü khüdu nümüsucho. Ta Davidnü nguchiba tsü ABÜDONGBAnü mükünyangcho.