Read Sangtam Naga 2 SAMUEL 14 Bible Online

2 SAMUEL 14 - Sangtam Naga bible

2 SAMUEL 14

¹Yangthsaba Davidnü Absalom khütang longmicho Joabnü müdhecho,

²achotsü abinü Tekoa lanü khingkurü athsehthsa khüdu norocho. Khode abükyü ro chihcho, abinü abükyü te yocho, “Nühnü meshü jengki khyüpü, meshürü roh-i ngusohng ko nü thah tüsü. Anyahli meshücho khingkurü khüdu kyo ngusohng.

³Hütsüpü yangthsaba te tu khüta yonung hütsü Joabnü abükyü te yocho.”

⁴Khingkutpü tsünü Yangthsaba yanglang wücho ko jengreng jo alih la mükhukehcho ko abi te yocho, “Ih troung O Yangthsaba.”

⁵Abinü yocho, “Tu khyünyüro?” Abükyünü yocho, “Ih chomilarü lile. I nii süko.

⁶Adirü, I tsurü adhrerü anyüh licho ko nyümong khüdu rangmü la anyüh yübütacho ko anyüh amüdrorü süsü mülipü anyüh yola nyüh khüdu kyüsehcho.

⁷Ade, ihrü tsutpurü apümnü I te mükünyang; amung kyüsehcho mülih abisü kyüsehnung I tsurü khüdu tsüsü arühnü chingre. Arühnü hütsüta nguchikhang, Ihlü atsurü adhrerü mülinung. Arühnü Ih achangka alongdi changpehjünung ko I nii ahung mülipehnung.”

⁸Yangthsabanü yocho, “Kuh lang thali wüng ko khiyu tsü Ihnü dhengnung.”

⁹Abükyünü yocho, “Adibong, nühnü tusü nguchi nye, nengchü tsü I kukhi ko Ihnü hinung; nüh ko nü Yangthsaba mülang mülinung.”

¹⁰Yangthsabanü lalingcho, “Khürünü nüh mütichikhang, abi I yanglang norung ko abinü khodesü nü khyang anyüpiu athsangthsi müjünung.”

¹¹Abükyünü yocho, “Adibong, I tsurü khüduba süsohcho nengdang ihrü tsutpurü zichüronü I tsurü akhüuba tsü mükyüsehsohnung yanglilüm ABÜDONGBA nü Tsingrang te kihchijüng.” Davidnü lalingcho, “Nü tsurü tsü müdhsakehsohnung Ihnü akang liba ABÜDONGBA nengla yuchümre.”

¹²Khingkutpünü yocho, “Yanglilüm nüh adibong te adesü yu khüdu yosohng.” Abinü lalingcho, “Young.”

¹³Abükyünü abi te yocho, “Tuepü nühnü Tsingrangba müyurü te hütsüta thsameh nguchicho? Nühnü nüpu tsurü yangtsi langnü thalinung mümüla, ko hütsüta nühnü ade choba tsünü nüpu mülangjüre.

¹⁴Ihsa apüm sünung; alih la kih tungpehcho thali akhyü mütsacho kyo ihrü lile. Tsingrangbanüsü asücholü mükanglisohre, ta Yangthsabanülü yangtsi langnü nyüh khüdu noronung lang yangchichehle.

¹⁵Ade, nüh adibong, Ih nü te chotanung roba hi müyurünü Ih mütichire, hütsünü Ihnü nü te tu tsingdhengnang nühnü tronung alongdi la rocho.

¹⁶I tsurü Ihjü akang kyüsehpü Tsingrangbanü jüba limih lanü ihrü akang khyümüinung müküpba kheh lanü ihrü akang khümchonungepü Ihnü lümre.

¹⁷Nü yunü Ih khümchonungepü Ihnü lümre, tunüo Yangthsaba tsü amütsa lanü atsa changsahnung Tsingrangba riwürü kyo lile. ABÜDONGBA nü Tsingrang nü te zeh lieng.”

¹⁸Yangthsabanü lalingcho, “Ihnü nü te lango tsingdhengnung ko nühnü I te yuje tsü young.” Abükyünü yocho, “Nüh adibong, masü tsingdheng.”

¹⁹Abinü yocho, “Nüh hi Joabnü rosohcho mah-o?” Abükyünü lalingcho, “Adibong, nühnü tsingdhengba tsü mülalingnung tu apa lang mülepü Amüsa la yuchümre, hütsü yuje nü pohki adirü Joabnü tu nguchinung ko tu chonung apüm I te yocho.

²⁰Ta abinü nguchiba hiba khiyu hi apüm müjangsohnung nguchire. Nüh adibong hi Tsingrangba riwürü kyo lümlong lile ko atikehcho lüpcho müdhele.”

²¹Akhanglang Yangthsabanü Joab te yocho, “Nühnü tu nguchinyüro hütsü Ihnü nguchinung dhrongcheko. Wüng ko dhrezaba Absalom tsü hila thali norung.”

²²Joabnü apu jangjang David bete jengreng jo mükhukeh abi te yocho, “Nüh adibong, Tsingrangbanü nüh müwajüng. Nühnü I te künyanglepü ade Ihnü müdhele, tunüo Ihnü kihchicho nühnü mülajüko.”

²³Hütsüpü abinü shemüsu Geshur lang wücho ko Absalom thali Jerusalem lang norocho.

²⁴Ta Yangthsabanü yocho, “Abi apu kuhla pathsa lisohng; abi Ih yang tünoro.” Achotsü Absalomnü apu kuhla licho, ko Yangthsaba yang mürocho.

²⁵Israel la Absalom nyükheh tsacho kyo süsü mülicho; athah lanü ajing chii tu achomükehcho.

²⁶Akuva tsü chehracho ko khode hütsü chilangnang dee mülingcho, hütsünü kang la khüdupi hehpeh licho. Hütsü bekhyah amülacho ahosingnü ho-dhengde, süreh anyüh mihlang licho.

²⁷Absalom tsurü adhrerü asang ko khingkurü khütang atsah atsa khüdu anengnü Tamar licho.

²⁸Absalomnü Yangthsaba müshirüpü Jerusalem la kang anyüh licho.

²⁹Achotsü Yangthsaba yanglang abi nengdang wüsohnung Joab dsinung müthehcho; ta Joabnü mürocho. Anyüpiusü Absalomnü Joab dsinung müthehcho, ta Joabnü mürocho.

³⁰Achotsü Absalomnü akulirüti te yocho, “Dheng, Joab lüdi luh tsü I luh müshüm lile. Wüng ko hütsüla michang thsürangjüng.” Achotsü arühnü wücho ko luh la tsü michang thsürangjücho.

³¹Joabnü Absalom kuh lang wünü yocho, “Tuepü nü kulirütinü I luh la michang thsürangjücho?”

³²Absalomnü lalingcho, “Tunüo Ihnü nüh dsinung müthehde nühnü müro. Ihnü nüh Yangthsaba yang wünü I chahnü hita yosohnyüre: ‘Ih tuepü Geshur pehjüpü hila rocho? I nengdang hütsüla liba tsü atsauba thsako.’ ” Adesü Absalomnü yocho, “Ihnü Yangthsaba shirünung nühnü rungnümsohnyüre, ko Ih thsamehpü likhang, abinü Ih süsohng.”

³³Achotsü Joabnü wünü Absalomnü yoba yu tsü Yangthsaba te yocho. Yangthsabanü Absalom adsinung müthehcho; ko abinü wücho ko abi bete alih la mükhukehcho. Ko Yangthsabanü bemüthsüp abi khyüchocho.