Read Sangtam Naga 2 SAMUEL 3 Bible Online

2 SAMUEL 3 - Sangtam Naga bible

2 SAMUEL 3

¹Saul tsutpu ko David tsutpu kahla anyahli mongchii licho. Ko David re alaa azehba kangcho ko Saul tsutpu re amüzeh-u kang tsicho.

²Atsurü dhüroh hi David khyang Hebron la surojücho: Jezrel lanü anitpü Ahinoam chahnü Amon;

³Karmel lanü Nabal nitpü Abigail chahnü Chileab; Geshur Yangthsaba Talmai tsulatpü Maka chahnü Absalom;

⁴Hagit chahnü Adonija; Abital chahnü Shefatia;

⁵Egla chahnü Ithream. Atsurü hiri apüm Hebron la nümüsucho.

⁶David ko Saul tsutpu khümrüti kahla khata mütozah liyade, Saul mono yola Abner tsü dee ayingba kangcho.

⁷Nyümong khüdu Saul tsurü Ishboshethnü Saul ashamtpü Aiah tsulatpü Rizpa te Abnernü mükhongko pü mütangcho.

⁸Hinü Abner rihlong chürosohcho. “Ihnü Saul kihyochünunge pü nühnü lümrü do? Ihnü Juda dikehre pü nühnü yuje lümre ang? Abinü yocho, Ihnü adikeh lanü nüu Saul, nü mungrüti ko abi shangrüti yochonyi rocho ko nüpu mii David kheh lanü khümchocho; ta chünye khingkurü khüdu khyanglangnü nühnü Ih mülangjüre.

⁹ABÜDONGBAnü Saul chahnü yanglih tsü khyükhunung ko abi chahnü trahchochotinü Israel ko Juda anyüding limih achangnü achangchi michah David tsü Yangthsaba kangsohnunge pü nyengchoko.

¹⁰Ade hi mütikehkhang Tsingrangbanü Ih süsohng.”

¹¹Hütsüde Ishboshethnü Abner drüchonü yu khüdu mii mükoh chochehchücho.

¹²Hütsü shikhe David Hebron la liyade Abnernü hita yonung yuhirü müthehcho, “Hiba lih la sünü Yangthsa thsanung? I te anyengchotaba khüdu külüpm, ko Ihnü Israel apüm nü lahpi noro nüh kohsohnung nüh tronung.”

¹³Davidnü lalingcho, “Tsale. Ihnü yuzi khüdu yohpüpü nü te nyengchotanung. Nüh I yanglang rode Saul tsulatpü Maikal tsü Ih yang norung.”

¹⁴Ko Davidnü Ishbosheth yangsü yusi hirü müthehcho, “I khyang I nitpü Maikal thali jüng. Ihnü abükyü khyünung Filistinrü yo aküp thsih khüdu jüpü khyüchoba lile.”

¹⁵Achotsü Ishboshethnü abükyü tsü anii Laish tsurü Paltiel tenü norocho.

¹⁶Ko Paltielnü tranü Bahurim yangdi chii iiwücho. Ta Abnernü abi te, “Thali tsieng” pü yode abinü thali tsicho.

¹⁷Abnernü Israel zirü yanglang wünü arüh te yocho, “Anyahli nührünü David nührü Yangthsaba thsasohnyüko.

¹⁸Ade nührü nyümonge. ABÜDONGBAnü yocho yu lümkehng, ‘Ihnü I müyurü Israelrü, Filistinrü ko arüh rorüh apüm kheh lanü khümchosohnung I dikehrü David bichinung.’ ”

¹⁹Abnernü Benjaminrü tesü chotacho, hütsüpü David te Benjaminrü ko Israelrünü nyengchocho tsü yonung Hebron lang wücho.

²⁰Khode Abner tsü David yang Hebron la nyüh mükyü nüpü rocho, Davidnü arüh khyang thsüti tüpcho.

²¹Abnernü David te yocho, “Ihnü ade wünung ko Israelrü apüm nüh Adibong lahpi noronung. Arühnü nüh arüh Yangthsaba kang khyüchonung ko nühnü khyünyücho kyo nühnü ngunung ko yanglih apüm michah yangthsa thsanung.” Davidnü Abner khyang akhümcho alongdi akükyüh jüpü wüsohcho.

²²Akhanglang Joab ko David pohki thsazirütinü yangmah langnü akengchocho kohro khütang hipü thali rochiyacho. Ta Abner tsü David yola Hebron la mülicho, tunüo Davidnü akükyüh akhümcho jünung alongdi jüpü tsisohpü licho.

²³Khode Joab ko abi nyitsarüti ro chihcho, Abner David yanglang ropü abi khyang akhümcho akükyüh alongdi jüpü tsisohko pü abi te yocho.

²⁴Achotsü Joabnü Yangthsaba yanglang wü abi te yocho, “Nühnü tu nguchicho? Abner nü yanglang ropü tuepü hütsüta du tsisohcho?

²⁵Abi hila roba tsü nü nguchi lüpcho müdhenung ko nü wücho apüm müdhenung ko nüh kihyochünung rochoba lile. Hütsü nühnü yuje müdhenung.”

²⁶David tenü zapü, Joabnü Abner yang yusi hirü müthehcho ko arühnü abi Sira kihkong lanü nüli rocho; ta hütsü Davidnü seh mümüdhecho.

²⁷Khode Abner Hebron chii norocho, Joabnü arangyu chotanung kyo abi tbükhüm la tsünü nükhucho ko hütsüla abinü ami lanü thrasehcho. Hütsüta Abner tsü kyüsehcho, tunüo abinü Joab ani Asahel kyüsehcho.

²⁸Khode hütsü yusi Davidnü yuchicho, abinü yocho, “Abner kyüsehba tsü hi Ih mahkhang I nyitsarü müzeh pü ABÜDONGBAnü müdhele.

²⁹Hütsü chokehchola tsü Joab ko abi kukhi chah küdusohng. Shang müipi abi tsutpu la kungkura mahkhang mübhira mahkhang alehrü mahkhang kyüsehba mahkang atsunung mülirü khürülü chüro du lisohng.”

³⁰Hütsüta Joab ko ani Abishainü anyüh nirü Asahel Gibeon khata la kyüsehcho ngang rühyang Abner kyüsehcho.

³¹Achotsü Davidnü Joab ko abi nyitsarü te arüh jengki rehnah ko müyahshü müpipü Abner meshünung yuzeng jücho. Ko me pehde Yangthsaba David apu mii kong khangte tsü tsehcho.

³²Abner tsü Hebron la dhrürangcho ko kong te tsü Yangthsabanü yuva chüro tracho ko müyurüsü apüm tracho.

³³Davidnü meshü khi hi Abner khyang thsajücho: “Tuepü Abner amüsithsarü khüdu kyo sücho?

³⁴Nü kheh mürahjü, nü jing mürah; Fükhohrü khehla kyo nüh züduko!” Ko müyurü apümnü thali abi nengdang tracho.

³⁵Müyurünü David khyang lango dusü tsusohnung mükhyang müküpcho, ta abinü hita yuchümcho, “Ihnü mümade lango dusü tsukhang, Tsingrangbanü Ih süsohng.”

³⁶Arühnü hütsü müdhede künyangcho.

³⁷David nyitsarü atümungnü ko Israelrü apümnü Abner kyüsehba la tsü Yangthsaba müzeh pü müdhecho.

³⁸Yangthsabanü abi pohki thsazirüti te yocho, “Chünye Israel la langnürü arangcheh khüdu süko pü nührünü mülümchehrü mah-o?

³⁹Ih Tsingrangbanü throchehcho Yangthsaba khüdu nye, Ih chünye re müzeh lümre. Zeruia tsurü hiri hi khurale. Hiri amapsehrü arüh aleng ABÜDONGBAnü khingching!”