Read Sangtam Naga 2 SAMUEL 6 Bible Online

2 SAMUEL 6 - Sangtam Naga bible

2 SAMUEL 6

¹Anyüpiu Davidnü Israel la athrochehcho rothsarüti nyüh hajar sangre dsibülungcho,

²ko Juda lang Akohba ABÜDONGBA neng thrahkeh liba ko Cherubim michah pümba Tsingrangba Yuzeng Singdi hironung Bala lang wücho.

³Arühnü hütsü azong chah Abinadab kuh lanü khyo misü kari asi khüdu chah yohcho.

⁴Ko Abinadab tsurü Uzza ko Ahio nyühnü misü kari tsü nyahnü Ahio akhupü shemüsucho.

⁵David ko Israelrü atümungnü arüh tase apümnü nyiichi ko khi thsa ABÜDONGBA dhichicho. Arühnü tbenglah, honglilah, tbhang, amapchiba ko dhengza bi thsacho.

⁶Arüh Nakon pungkhyang chii rode, misüpung tsü ajing dhrüphehcho ko Uzzanü nyümpheh wü Yuzeng Singdi chah thahpücho.

⁷Hütsü denü Uzza te ABÜDONGBA zichürocho ko jengreng müjücho ngang abi hütsüla kyüsehcho.

⁸Hütsüla Yuzeng Singdi müshüm Uzza tsü sücho, hütsütinü hütsüba müdüm te Peraz Uzza dsicho. ABÜDONGBAnü azii chüro Uzza khingchichonü David rihlong chürocho.

⁹Hütsüde Davidnü ABÜDONGBA dronü yocho, “Ihnü ade Yuzeng Singdi khüta hiwünung?”

¹⁰Achotsü abinü hütsü Jerusalem lang mühiwünung dhrongchehcho; ko apalang abinü Gath yangdi la lirü Obed kuh lang hiwücho.

¹¹Hütsüla choo asang licho ko ABÜDONGBAnü Obed Edom ko abi kukhi müwajücho.

¹²Yuzeng Singdi yohpüchonü ABÜDONGBAnü Obed Edom kukhi ko abi licho apüm müwajücho Davidnü yuchi, abinü Yuzeng Singdi tsü Obed kuh lanü khyücheh Jerusalem lang thsüti arangcheh khyo hizüducho.

¹³Yuzeng Singdi dhirü tsü mütrah dhüroh tsipü khanglang, Davidnü ABÜDONGBA khyang misüpung khüdu amübü jünung arüh zahsohcho.

¹⁴Davidnü shü anana khüdu dunü akih rümpü tase apümnü ABÜDONGBA dhichi nyiichicho.

¹⁵Hütsüta abi ko Israelrü apümnü Jerusalem lang Yuzeng Singdi tsü bipü akünyangnü züde ko tbhang tinü hizüducho.

¹⁶Singdi tsü yangdi la hizüro yade, Saul tsulatpü Maikalnü nyübongkhi lanü chehchü dhengde Yangthsaba David tsü ABÜDONGBA te tsohchi ko nyiichi nguchonü abükyü lasila wahseh lümcho.

¹⁷Arühnü Singdi tsü hirocho ko Davidnü thsaba Shükuh la ayohpüji la tsü yohpücho. Hütsüpü abinü ABÜDONGBA khyang kangmübü ko akehta mübü jücho.

¹⁸Khode abinü kangmübü jüba tsü thümcho, abinü Akohba ABÜDONGBA nengla müyurü müwajücho,

¹⁹ko arüh apüm khyang tsuyongnung jücho. Abinü Israel la khingkurü adhrerü müipi khyang hümthse khüdu, shuh aruhcho adsi khüdu ko shükusih kungcho jücho. Hütsüpü arüh atümung kuh lang tsisohcho.

²⁰Hütsüpü khanglang, Davidnü abi kukhirü shirünung wücho. Maikalnü abi mütohnung chürocho ko abükyünü yocho, “Chünye Israel Yangthsaba apu jangjang aneng küdusohko. Abinü abi pohki adirüti ko kulilarüti bete adohrü roh-i misha ngusohko!”

²¹Davidnü lalingcho, “Ih ABÜDONGBA sünü nüu ko abi kukhi mülih Israelrü michah langnünung throchehcho, abi hechinung nengdang nyiichicho.

²²Ko Ihnü ABÜDONGBA dhichinung mütozah nyiichinung ko Ipu alaa ashah khyüsohnung. Nühnü Ih tu mahrü roh-i lümnung, ta khingkurü hütsürinü Ih dee khichinung!”

²³Ko Saul tsulatpü Maikal tsü asü yingcheh azarü mülipehcho.