Read Sangtam Naga 2 SAMUEL 7 Bible Online

2 SAMUEL 7 - Sangtam Naga bible

2 SAMUEL 7

¹Adelü Yangthsaba David akuh la nyehkehcho ko ABÜDONGBAnü arorüh apüm tenü abi khümcho yohpücho.

²Hütsüpü Yangthsabanü azikehrü Nathan te yocho, “Ih Cedar singnü thsacho kuhla lipü Tsingrangba Yuzeng Singdilü Shükuh khüdu la du yohpüle!”

³Nathan-nü lalingcho, “Nühnü tu lümro hütsüta nguching, tunüo ABÜDONGBA nü te lile.”

⁴Ta hütsü romang ABÜDONGBAnü Nathan te yocho,

⁵“Wüng ko I dikehrü David te hita young.” I nengdang Amübükuh khüdu thsajünung nüh mah.

⁶Ihnü Israelrü Ijip lanü nücheh nyümong lanü ade chii, Ih khodesü amübükuh la mülidheng; Ih Shükuh la du li rore.

⁷Ih Israel yola hidoi shitseh ronye Ihnü throchehcho langnürü sütesü tuepü I khyang cedar singnü amübükuh müthsajüro pü mütsingdheng.

⁸Hütsüeko I dikehrü David te Ih Akohba ABÜDONGBAnü hita yoreding: Ihnü nüh san nyahba lanü nücheh ro I müyurü Israelrü michah Yangthsarü kangsohko.

⁹Nüh wücho apümlang Ih nü te zehcho ko nüh wüde arorüh atümung Ihnü kohjücho. Ihnü nüh limih la langnürü adiuba kangsohnung.

¹⁰Ihnü I müyurü Israelrü khyang alih müdüm khüdu throjücho ko arüh hütsüla lisohre, adelü arüh sünüsü müsehchipü linung.

¹¹Arüh akhulang roh-i amütsarünü mümahnung. Nü rorüh apüm chahnü nüh khümcho yohpünung ko nü chahnü trahchosohnung Ihnü nyengchore.

¹²Khode nüh sonang nü jümürü yola dhrürangnung, Ihnü nü tsurü yolanü Yangthsarü khüdu chürosohnung ko abi yanglih drengdreng lisohnung.

¹³Abinü I khyang amübükuh khüdu thsajünung ko abi yangthsathsaba müchangka lisohnung.

¹⁴Ih abi au ko abi I tsurü thsanung. Khode abinü thsamehnang, au khüdunü atsurü khatacho kyo, Ihnü abi khingchinung.

¹⁵Ta Ihnü nüh Yangthsaba kangsohnung nengdangnü Saul te nguchicho kyo abi te Ihnü münguchinung.

¹⁶Lede nü majüh linung ko Ihnü nü yanglih müchangkapü lisohnung. Nü yangthsathsaba achangka mülinung.

¹⁷Nathan-nü abi te Tsingrangbanü mishacho lüpcho David te yocho.

¹⁸Achotsü Yangthsaba Davidnü Shükuh la tsü ABÜDONGBA licho yang züducho ko pümpü dangkhidangnangcho, “Amichahba ABÜDONGBA, Nühnü Ih ko I kukhi te tu nguchiko hi I chah mülengcho lile.

¹⁹Ta ade Nühnü alaa mii nguchire, Amichahba ABÜDONGBA; aronung shang nengdang mii I chahnü trahchonung Nühnü nyengchoko. Ko Nühnü hi nyüh khüdu khyang ngusohko, Amichahba ABÜDONGBA.

²⁰Ihnü Nü te tu alaa yonung. Nühnü Ih nü dikehrü müdhele.

²¹Hi Nüpunü lümchonü nguchicho; Nühnü I te donung nengdang Nü nguchi amülah hiri nguchicho.

²²Nüh khüdoi arangcheh, Amichahba ABÜDONGBA! Nüh kyo süsü müle; Nüh du tsü Tsingrangepü ihrünü lede müdhe rocho.

²³Nühnü ayurü suro lanü nücheh nüpu müyurü kangsohba Israel kyo, limih la tu yucho müle. Nühnü arüh te nguchi amülah ko anyemüyangnung nguchiba tsünü limih apümlang Nü nengse sobhoko. Nüpu müyurü thsanung Nühnü Ijip lanü nüchehba Nü müyurü rode, aparü yuchoti ko arüh tsingrang iipehjücho.

²⁴Nühnü lede nengdang Israelrü nü müyurü kangsohko ko Nüh ABÜDONGBA, arüh Tsingrang kangko.

²⁵“Ko ade, ABÜDONGBA Tsingrang, Ih ko I kukhi nengdang Nühnü nyengchoba tsü lede nengdang tikehsohng ko Nühnü yocho kyo nguching.

²⁶Nü nengse arangcheh thsanung ko Nü müyurünü lede, ‘Israel michah Akohba ABÜDONGBA tsü Tsingrangepü chonung.’ Ko lede Nühnü I yangthsa thsaba yohpüjünung.

²⁷Akohba ABÜDONGBA, Israel Tsingrang. Ihnü hi Nü te kihchire, tunüo Nühnü hiri Ih Nü dikehrü te mishako ko I chahnü yangthsarü chürosohnung Nühnü yoko.

²⁸“Ko ade, Amichahba ABÜDONGBA, Nüh Tsingrangba lile; Nühnü lede Nüh anyengchocho yohpüre ko Nühnü anyemüyangnung hi I te nyengchoko.

²⁹Nü nah te lede linungthsa I trah müwajüng pü Ihnü kihchire. Nüh Amichahba ABÜDONGBAnü hi nyengchoko ko Nü amüwa tsü I trah te lede linung.”