Read Sangtam Naga 2 SAMUEL 8 Bible Online

2 SAMUEL 8 - Sangtam Naga bible

2 SAMUEL 8

¹Azachah lipü, Yangthsaba Davidnü thali Filistinrü mahcho ko arüh kohcho ko Israel michah yangthsa thsaba tsü changkacho.

²Hütsüpü abinü Moabrüsü kohcho. Abinü arangyohrü tsü alih la yüpjosohcho ko nyüh asang-sang müipi nyüh anyüh-nyüh süsohcho. Hütsüta Moabrü tsü abi pohki lisohcho ko abi khyang alihmüthsü jücho.

³Hütsüpü abinü Zoba la Syria lih Yangthsaba, Rehob tsurü Hadadezer, Eufrates lang abi lih khyülinung woyade kohcho.

⁴Davidnü kuri chah khatarü nyüh hajar khüdupü thsih dhünyeh ko alih la rothsarü nyüh hajar mükyü kohcheh khyücho. Abinü nyübong kari thsih khüdu nengdang kuri kükyo yohpücho ko anyingcho apüm tsü ajing khyahsahjücho.

⁵Ko khode Syriarü lih la Damaskasrünü Yangthsaba Hadadezer tronung rothsarü mülung khüdu müthehcho, Davidnü arüh mahcho ko nyüh hajar mükyüpü anyüh kyüsehcho.

⁶Hütsüpü abinü arüh lih la tsü rothsarü lisohcho ko arüh tsü abi pohki licho ko abi khyang alihmüthsü tüpcho. Apümlang ABÜDONGBAnü David khyang akoh ngusohcho.

⁷Hadadezer pohki adirütinü biba hon tsung tsü Davidnü kohcheh khyücho ko Jerusalem lang hiwücho.

⁸Abinü Hadadezer pohki liba yangditi Beta ko Berothai lanü imüyengsü adrong khyücho.

⁹Davidnü Hadadezer rothsarü apüm kohchehkopü Hamath Yangthsaba Toinü yuchicho.

¹⁰Achotsü Toi apunü adrongpi chitaba Hadadezer michah Davidnü akoh ngucho nengdang anengse jünung atsudhre Joram müthehcho. Joramnü David khyang hon, taripi ko imüyeng külüp jiyü hijücho.

¹¹Yangthsaba Davidnü hütsüri tsü amübükuh la bichinung müsachehcho,

¹²ko Edom, Moab Amon, Filistin ko Amalekrü abinü kohchehchoti chahnü Hadadezer chahnü khyücho khürü zeh hon ko taripiti müsachehcho.

¹³Davidnü Mih Ngah la Edomrü nyüh hajar dhüre-keh kyüsehpü thali abi dee alaa nengkhong kangcho.

¹⁴Abinü Edom lih apümlang rothsarü mülung pümshang yohpücho; ko Edomrü apüm David dikehrü kangcho. Ko ABÜDONGBAnü David wücho apüm la abi khyang akoh ngusohcho.

¹⁵Davidnü Israel apüm michah yangthsacho; ko abi müyurüti apüm michah lede yuje du bichicho.

¹⁶Zeruia chahnü Joab tsü rothsarü yola anüchiba licho; Ahilud tsurü Jehoshafat tsü athrahrü thsacho;

¹⁷Ahitub tsurü Zadok ko Abiathar tsurü Ahimelek tsü bebürü, yukha la athrahba tsü Seraia;

¹⁸David nyahrü anüchiba tsü Jehoiada tsurü Benaia thsacho ko David tsurüti tsü bebürü thsa licho.