Read Sangtam Naga 1 YANGTHSARÜTI 12 Bible Online

1 YANGTHSARÜTI 12 - Sangtam Naga bible

1 YANGTHSARÜTI 12

¹Rehoboamnü Shekem lang wücho, hütsüla kihkulang liba Israelrü atümung abi Yangthsaba kangsohnung shibülunglicho.

²Nebat tsurü Jeroboam, sü Solomon chahnü tsiwü Ijip la licho, abinü yusi hi yuchide, abinü Ijip lanü thali rocho.

³kihkulang liba yuchotinü abi adsinung müthehcho ko hütsüpü arüh atümungnü Rehoboam yanglang wünü yocho,

⁴“Nüu Solomon-nü ihrü dee mütsa bichicho ko ihrü michah bhamüling zangkehjücho. Nühnü hiba bhamüling hi yingya kangsohkhang, ko ihrü akang linung müla kangsohkhang, ihrünü nüh dikehnung.”

⁵Abinü yocho, “Nyümong asang lipü rung ko Ihnü alalingba jünung.” Achotsü arühnü tsicho.

⁶Yangthsaba Rehoboamnü au chichah lümlong jürüti te kihtacho. Abinü yocho, “Ihnü hiri te tu lalingnung?”

⁷Arühnü lalingcho, “Nühnü hiri müyurü tsa dikehnyükhang, arühnü kihchiba tsü tsa laling ko arühnü lede nüh dikehnung.”

⁸Ta abinü azirüti athsüchiba pehjüpü arüh müjang zichehrü dhrezarü ko ade abi khyang lümlong jürü yang wücho.

⁹Abinü yocho, “Ihnü khüta nguchisohnyüro? Arüh bha yingya kangsohngpü yoba nyitsarüti te Ihnü tu lalingnung?”

¹⁰Arühnü yocho, “Nühnü arüh te hita young: ‘I müyungza achangtpü hi Iu kihrüm tenü achehba lile.’

¹¹‘Iunü nührü michah bha amüling zangkehjücho; Ihnü alaa amülingu kangsohnung. Iunü nührü chah müyahnü xüpcho; Ihnülü nührü chah tbolu yonü xüpnung.’ ”

¹²Nyümong asang khanglang, abinü yocho kyo Jeroboam ko müyurü apüm Rehoboam yanglang rocho.

¹³Yangthsabanü azirüti athülaba pehjüpü dhrezarütinü yochonyi arüh te dee kako chotacho.

¹⁴Abinü yocho, “Iunü nührü chah bha amüling zangkehjücho; Ihnü alaa amülingba zangkehjünung. Abinü nührü chah müyahnü xüpcho; Ihnü tboluyonü xüpnung!”

¹⁵Hi Shilo la azikehrü Ahija khu Nebat tsurü Jeroboam te tu yocho hütsü tikehsohnung ABÜDONGBA lümcho licho. Hütsü khu Yangthsabanü müyurü tsü sehseh mükhichi licho.

¹⁶Khode arüh lümcho Yangthsabanü mükhyücho müyurünü müdhecho, arühnü hita züdecho, “David ko abi kukhi khülusohnung! Arühnü Ihsa nengdang tu nguchicho? Israelrü, Ihsanü kuh lang thalinung. Rehoboam tsü ajangjang thsasohng.”

¹⁷Hütsüta Israelrünü nyüm yacho ko Rehoboam tsü Juda la lirü michah du yangthsasohnung pehjüpü tsicho.

¹⁸Achotsü Yangthsaba Rehoboamnü Israelrü yanglang hehnehthsarü michah anüchiba Adoniram müthehcho, ta arühnü abi kengseh süsohcho. Hütsü ngu Rehoboamnü dhsüthsa abi kuri kari chah pümpü Jerusalem lang rang tsicho.

¹⁹Hütsütinü kihkulang liba Israelrünü David hung te nyümta licho.

²⁰Khode Israelrünü Jeroboam Ijip langnü thalicho yuchicho, arühnü müyurü shimükhong licho la abi dsiyohcho ko abi Israel Yangthsaba kangsohcho. Juda hung du David trah te kehta licho.

²¹Khode Rehoboam ro Jerusalem chihcho, abinü Juda ko Benjamin hung lanü rothsarü athrungrü dunü nyüh lakh khüdu hajar qure dsibülungcho. Abinü wü khatapü kihkulang liba Israelrü tsü thali abi pohki noronyücho.

²²Ta Tsingrangbanü azikehrü Shemaia te

²³yusi hi Rehoboam, Juda ko Benjamin hung te yonung yocho:

²⁴“Nührübürü jünirü Israelrü tümah. Nührü atümung kuh lang thali tsieng. Tu tikehcho hütsü Ihnü lümcho lile.” Arüh atümungnü ABÜDONGBA yu nyi arüh kuh lang thali tsicho.

²⁵Yangthsaba Jeroboamnü Efraim azong lih la Shekem yangdi tsü tbüticho ko azachah shulüm hütsüla licho. Hütsüpü abinü wü Penuel yangdi tsü tbüticho.

²⁶Abinü lümcho, “Ade hiroh-i nülü, I müyurünü wü Jerusalem la Amübükuh la tsü kangmübü mübüde arüh Juda Yangthsaba Rehoboam te kehta kangnung ko Ih kyüsehnung.”

²⁸Hütsüta lümdhengpü, abinü misüpung-za anyüh hon-nü külüpcho ko müyurü te yocho, “Nührü Jerusalem lang mübünung wünung tsü shurale. Israelrü, nührü Ijip lanü nüchehba tsingrang tsü hila lile!”

²⁹Hütsüta abinü misüpung aza khüdu Bethel la ko akhüu tsü Dan la yohpüjücho.

³⁰Hütsüta müyurünü Bethel ko Dan la mübo amünyi shitpahcho.

³¹Jeroboamnü akhang müjohti la amübükuh thsacho ko Levi hung lanü mahpü apa lanü abinü bebürü throchehcho.

³²Jeroboamnü Juda la kyo, choo akeh-u nyümong dhüre-münga la mübü yangthsa thsüti throchehcho. Bethel la bholu chah tsü abinü hon-nü külüpba mübüji nengdang bebürü yohpücho.

³³Ko choo akeh-u dhüre-münga nyümong apunü throba nyümong tsü, Israelrü nengdang apunü throchehjüba thsüti hütsü wü abinü kangmübü mübücho.