Read Sangtam Naga 1 YANGTHSARÜTI 13 Bible Online

1 YANGTHSARÜTI 13 - Sangtam Naga bible

1 YANGTHSARÜTI 13

¹ABÜDONGBAnü yuzeng jo Juda lanü azikehrü khüdu Bethel lang wücho ko abi ro chihde Jeroboam tsü bholu te kangmübü mübo yacho.

²ABÜDONGBAnü mülacho nyi, azikehba tsünü bholu tsü mülangjücho. “O bholu, bholu, ABÜDONGBAnü hita yore; Azarü khüdu, anengnü Josiah, David tsutpu lanü suronung. Müyudsirü bholu dikehrü sürünü nü chah kangmübü jüro, arüh tsü abinü kingthrümnung ko abinü nü chah nyitsarü rüh trüpnung.”

³Mütozah azikehba tsünü yocho, “Hiba bholu hi khülunung ko abi chah tavi asongsong tsü phikehnung. Hütsüde ABÜDONGBAnü Ih khu chotacho nühnü müdhenung.”

⁴Khode hütsü Yangthsaba Jeroboamnü yuchicho, abinü abi chah thükeh yuzeng jücho, “Hütsüvi tsü rang!” Dhrongyengnü Yangthsaba kheh tsü tohkehpehcho ko thali mühirochehcho.

⁵ABÜDONGBA nengla azikehbanü choyohcho kyo dhrongyengnü bholu tsü khülucho ko tavi songsong tsü shupishuzacho.

⁶Yangthsaba Jeroboamnü yocho, “Yanglilüm ABÜDONGBA nü Tsingrang te I kheh hi kyangjüng pü dangkhidangnangjüng.” Azikehbanü ABÜDONGBA te dangkhidangnangjücho ko Yangthsaba kheh tsü tsapehcho.

⁷Hütsüpü Yangthsabanü azikehba te yocho, “I yola kuh lang rung ko lango dusü tsung. Nü nguchi ngang Ihnü jiyünung.”

⁸Azikehbanü lalingcho, “Nühnü nü kuthsi achangsho jünye, Ihnü nü yola müwünung ko nü yola tusü mütsuyongnung.

⁹ABÜDONGBAnü I te tusü mütsuyongnung ko I rocho langnü müthalinung yuzeng jüko.”

¹⁰Hütsüta abinü lang palangnü thali tsicho.

¹¹Hütsü shikhe Bethel la azikehrü ashirü khüdu licho. Atsurütinü Juda lanü azikehrü khüdu ro Bethel la nguchicho ko abinü Yangthsaba Jeroboam te tu yocho hütsü abi te yocho.

¹²Ashiba azikehba tsünü yocho, “Atsilang abi khüiba lang lanü tsicho?”

¹³Arühnü abi te lang tsü ngusohcho ko abinü arüh te abi khyang gadu rungnümjüngpü yocho.

¹⁴Arühnü hütsüta nguchicho ko abinü Juda lanü roba azikehrü khanglang tsü iijowücho ko abi langsingdong pohki püm ngucho. Abinü tsingdhengcho, “Juda lanü azikehrü tsü nüh mah-o?” Abinü lalingcho, “Ho.”

¹⁵Abinü yocho, “I kuh lang ro tsuyong.”

¹⁶Ta Juda lanü azikehba tsünü yocho, “Ih nü yola nü kuh lang mürochehnung ko nü arüku mükhyüchehnung. Ko nü yola tusü mütsuyongchehnung,

¹⁷tunüo tusü mütsuyongnung ko I rocho lang lanü müthalinung ABÜDONGBAnü I khyang yuzeng jüko.”

¹⁸Hütsüde ashiba azikehba tsünü abi te yocho, “Ihsü nüh kyo azikehrü khüdue ko ABÜDONGBAnü yuzeng jo ninglang riwürü khüdunü I te I kuh lang nüh nowü tüptinung mülako.” Ta ashiba azikehba tsünü arahkheh chorü thsacho.

¹⁹Achotsü Juda lanü roba azikehba tsünü ashiba yola tsü wünü abi yola tsuyongcho.

²⁰Arüh tsingthsang chah tsuyong pümde, ashiba azikehba yang ABÜDONGBA yu rocho,

²¹ko abinü Juda lanü roba azikehba te tsü züde yocho, “Nühnü abi yocho münyi ko abinü mülacho münguchi pü ABÜDONGBAnü nü te yore.

²²Ta thali nühnü wü abinü mümülacho tsuyongre. Hütsü ngang nüh kyüsehnung ko nü me nührü tsutpu kong la müdhrürangnung.”

²³Arüh tsuyongkapü khanglang, ashiba azikehba tsünü Juda lanü roba azikehba tsü

²⁴gadu chah tsü pümsohpü abi tsisohcho. Lang la kihkhünying khüdu shiro abi mükahsehcho. Ame lang la jocho ko hütsü müshüm gadu ko kihkhünying tsü yacho.

²⁵Nyitsarü khürü lahkhu tside me tsü lang la kihkhünying khüdu müshüm ngucho. Arühnü Bethel lang wücho ko arühnü ngucho tsü yocho.

²⁶Khode ashiba azikehba tsünü hütsü yuchicho, abinü yocho, “Hütsü ABÜDONGBA yocho münyiba azikehbasüe. ABÜDONGBAnü yocho kyo, abinü kihkhünying mütheh abi mükahsehsohko.”

²⁷Hütsüpü abinü atsurüti te yocho, “I khyang gadu rungnümjüng.”

²⁸Arühnü hütsüta rungnümjücho ko abinü lang lang tsü wücho, ko lang la tsü gadu ko kihkhünying nyüh müshüm ame tsü jocho. Kihkhünying tsünü ame tsü mütsu mahkhang gadu tsü mümükah.

²⁹Ashiba azikehba tsünü ame tsü throro agadu chah dhikehcho ko mesho dhrürangpehnung Bethel lang hirocho.

³⁰Abinü apu tsutpu kong la hütsü pehcho ko abi ko atsurütinü hütsü mesho yocho, “O I jünirü, I jünirü!”

³¹Me tsü dhrürangpü khanglang, ashiba tsünü atsurüti te yocho, “Ih süde, Ihsü hila abi müshüm dhrürang.

³²ABÜDONGBAnü müla abinü Bethel la bholu ko Samaria yangditi la mübüji müdümti nyüm choba tsü yuje tikehnung.”

³³Hita nye Yangthsaba Jeroboamnü abi amünyi lang lanü müximülacho, ta abinü külüpba bholuti chah dikehnung bebürü masü mütozah throcho. Anguchinyürü masü abinü bebürü thsanung throcho.

³⁴Abi münyi khu abi yangthsathsaba riri changnungthsa kangcho.