Read Sangtam Naga 1 YANGTHSARÜTI 14 Bible Online

1 YANGTHSARÜTI 14 - Sangtam Naga bible

1 YANGTHSARÜTI 14

¹Hütsü shikhe Yangthsaba Jeroboam tsurü Abija füthsapehcho.

²Jeroboamnü anitpü te yocho, “Ih Israel la Yangthsaba kangnung yoba Shilo la liba azikehba Ahija yanglang, sünüsü nüh müdhengchehnungthsa nü tsah thrimülapü wüng.

³Abi khyang hümthse dhüre, aruhcho hümthse khürü ko thsakukih füh khüdu hijüng. Abi te Ihjü tsurü chah tu tikehnung tsingdheng ko abinü nü te yonung.”

⁴Achotsü abinü Shilo la Ahija kuh lang wücho. Shirachonü Ahija anahtohpü licho.

⁵ABÜDONGBAnü abi te Jeroboam nitpü atsurü nengdang tsingdhengnung abi yang tsehlepü yopü licho. Ko tu yonung Ahija te ABÜDONGBAnü yopehcho. Khode Jeroboam nitpü ro chihcho, abükyünü aparüesohnung lümcho.

⁶Ta Ahijanü abükyü trahtri chii rodenü abinü yocho, “Zürung. Nüh Jeroboam nitpüepü Ihnü müdhele. Tuepü nüh bürü mütangsohnung müküpro? Nü nengdang yusi amütsa lile.

⁷Wüng ko Jeroboam te Israel Tsingrang, ABÜDONGBAnü abi te hita yoreding: ‘Ihnü müyurü yolanü nüh throcheh, I müyurü Israel michah Yangthsaba kangsohcho.

⁸Ihnü David trah chahnü yanglih tsü khyo nü khyang jücho. Ta nüh I dikehrü David sünü I te yuje chocho, I yuzeng bichicho ko Ihnü tu mülacho hütsü du nguchicho abi mükyo.

⁹Nü bekhulang Yangthsarüti tenü nühnü amünyi alaa adiu shitpahko. Nühnü Ih thsongliko ko mübünung singkülüp ko idhsenü kyothriti külüp I zichürosohcho.

¹⁰Hütsü ngang Ihnü nü nah la thohdhü dhsürü hirojünung ko nü trah aza-azi adhrerü atümung kyüsehnung. Ihnü nü tsutpu changsohnung; arüh sehnyeh kyo wohpehnung.

¹¹Nü tsutpu lanü khürü yangdi la sükhang abi füzanü tsunung ko rangmüla sürü apüm hogon-nü tsunung. Ih, ABÜDONGBAnü choko.’ ”

¹²Adesü mütozah Ahijanü Jeroboam nitpü te yocho, “Adelü kuh lang thali tsieng. Nüh yangdi chihyeng nü tsurü tsü sünung.

¹³Israelrü apümnü abi meshünung ko dhrürangnung. Jeroboam kukhi lanü athsalangnü dhrürangnunglü abi du thsanung, tunüo Israel Tsingrang, ABÜDONGBAnü künyang liba tsü abi du lile.

¹⁴ABÜDONGBAnü Israel la Yangthsaba khüdu chürosohnung ko Abinü Jeroboam nah changsohnung.

¹⁵ABÜDONGBAnü Israel khingchinung ko yongkhi la thoh kyo abükyü shühchinung. Abinü Israelrü jümürü khyang jüba alih atsa hilanü arüh rohchehnung ko Eufrates Yongkhi khu sohpehnung, tunüo arühnü Ashera tsingranglarü kyothri külüpcho khu abi rihlong chürosohko.

¹⁶ABÜDONGBAnü Israelrü pehjünung, tunüo Jeroboamnü amünyi shitpahcho ko Israelrüsü shitpahsohko.”

¹⁷Jeroboam nitpü Tirza lang thalicho. Abükyü kuh chihyeng azaba tsü sücho.

¹⁸ABÜDONGBAnü abi dikehrü azikehba Ahija khu yocho kyo, Israelrünü abi meshücho ko dhrürangcho.

¹⁹Jeroboamnü nguchicho lüpcho, khatacho ko yangthsacho apüm Israel Yangthsarü Yukheh la thrahyoh lile.

²⁰Jeroboamnü kang mükyüpü anyüh yangthsathsacho. Abi sücho ko dhrürangcho ko atsurü Nadab tsü abi mülih Yangthsaba kangcho.

²¹Solomon tsurü Rehoboam tsü Juda Yangthsaba kangde kang yürepü khüdu licho ko Israel lih apüm lanü abi mübüsohnung throchehba yangdi Jerusalem la kang dhüre-dhünyeh yangthsacho. Rehoboam atpa tsü Amon lanü Nama licho.

²²Judarünü ABÜDONGBA nyüm amünyi shitpahcho ko arüh jümürü tenü alaa arühnü abi zichürosohcho.

²³Arühnü arahkheh tsingrang mübüji thsacho ko azong la ko akhümki la mübünung lung-dongdi ko Ashera kyothri külüpcho.

²⁴Amütsauba tsü, hütsüri müyudsirü mübüji la tsü nahtrahnaxengrü khingkurü adhrerü yohpücho. Israelrü hiba lih la rode ABÜDONGBAnü iipehrütinü nguchiba ashahnung nguchiti apüm Judarünü iithsacho.

²⁵Rehoboam yangthsathsaba kang amüngau la, Ijip Yangthsaba Shishaknü Jerusalem mahcho.

²⁶Abinü Amübükuh ko Yangthsaba kuh lanü Solomon-nü külüpba hon tsungti mii zeh kohro apüm zang hitsicho.

²⁷Hütsü mülih yohpünung, Yangthsaba Rehoboamnü imüyengnü tsungti külüpcho ko Yangthsaba kuh trahtri nyahrüti khyang hütsü xükümnung pehjücho.

²⁸Yangthsaba Amübükuh lang züdu müipi, anyahrütinü tsung tsü dhi hizüdunung ko thali hiro anyahrü khehla yohpüjünung.

²⁹Yangthsaba Rehoboamnü nguchicho lüpcho Juda Yangthsarü Yukheh la thrahyoh lile.

³⁰Shikhe hi ayung Rehoboam ko Jeroboam anyüh tsü mütozah mongchii du licho.

³¹Rehoboam sücho ko David yangdi la yangthsarü kong la tsü dhrürangcho ko atsurü Abija tsü abi mülih Yangthsaba kangcho.