Read Sangtam Naga 1 YANGTHSARÜTI 15 Bible Online

1 YANGTHSARÜTI 15 - Sangtam Naga bible

1 YANGTHSARÜTI 15

¹Israel la Yangthsaba Jeroboam yangthsathsacho kang dhüre keh-u la, Abija Juda la Yangthsaba kangcho,

²ko abinü Jerusalem la kang asang yangthsacho. Atpa tsü Absalom tsulatpü Maka licho.

³Au kyo abinüsü amünyi shitpahcho ko amü David mükyopü abinü khüdupinü ABÜDONGBA Tsingrang te yocho münyicho.

⁴Ta David khyanglangnü, ABÜDONGBA abi Tsingrangnü abi khanglang Jerusalem la yangthsanung ko nyahyehnung nengdang Abija khyang atsurü khüdu jücho.

⁵Davidnü Abinü künyangnungthsa nguchicho, ko Hit-rü Uria chah nguchicho chah khu abi yuzeng tusü münyipü mülicho, hütsünü ABÜDONGBAnü hütsüta nguchicho.

⁶Abija yangthsathsa ayung Jeroboam anyüh kahla mongchii du licho.

⁷Ko Abijanü nguchicho lüpcho Juda Yangthsarü Yukheh la thrahyoh lile.

⁸Abija sücho ko David yangdi la dhrürangcho ko abi mülih atsurü Asa tsü Yangthsaba kangcho.

⁹Israel la Yangthsaba Jeroboam yangthsathsaba kang mükyüu la, Juda la Asa Yangthsaba kangcho,

¹⁰ko abinü Jerusalem la kang yüre yangthsathsacho. Absalom tsulatpü Maka tsü abi ajü licho.

¹¹Asanü amü Davidnü kyo ABÜDONGBAnü künyangnungthsa nguchicho.

¹²Abinü yanglih lanü müyudsirü mübüji müdümti la nahtrahnaxengrü khingkurü adhrerü atümung iipehcho ko abi belangrünü külüpcho kyothri apüm thsangnyang pehjücho.

¹³Abinü ajü Maka, sü yangthsalatpü atpa licho abükyü nguchi lanü khyümüicho, tunüo abükyünü Ashera tsingranglarü kyothri külüp yohpücho. Asanü kyothri tsü kyühnahcho ko Kidron Ngah la trüp-pehcho.

¹⁴Asanü müyudsirü mübüji apüm thsangnyang müpehnye, abi akang ayung ABÜDONGBA te yuje cho licho.

¹⁵Abinü Amübükuh la tsü aunü Tsingrangba khyang müsachehcho apüm ko apunü müsachehcho hon ko taripi apüm yohpücho.

¹⁶Juda Yangthsaba Asa ko Israel Yangthsaba Baasha nyüh tsü anyüh yangthsathsa ayung mongchii du licho.

¹⁷Baashanü Juda mahcho ko Juda la wüli-roli apüm yatinung nengdang Rama tsü tbütinung dikehcho.

¹⁸Achotsü Yangthsaba Asanü Amübükuh ko Yangthsaba kuh lanü hon ko taripi apüm khyo abi pohki adirü khürü khu Damaskas lang Hezion shümtsurü ko Tabrimon tsurü Syria la Yangthsaba Benhadad yang yusi hi te müthehcho:

¹⁹Ihjü tpurü kyo Ihjüsü langthsanung. Hon ko taripi hi nü khyang jiyü mühehre. Ko I lih lanü Israelrü Yangthsaba Baashanü abi rothsarü yongcheh notsisohnung abi te nüh langthsa tsü drilieng.

²⁰Yangthsaba Benhadadnü Asanü yoba tsü nyengchocho ko Israel Yangditi mahnung abi rothsarü ko anüchirüti wüsohcho. Arühnü Galil kihdi shündhün liba Ijon, Dan, Abel Beth Maka ko Naftali lih apüm kohchehcho.

²¹Khode Yangthsaba Baashanü hütsü yuchicho, abinü Rama tbütiba nguchi zahcho ko Tirza lang wücho.

²²Hütsüpü Yangthsaba Asanü Juda lih apümlang nyitsarü müipi Rama la Baashanü bichiba lung ko singtpahti hitsinung yuzeng jücho. Hiri kohroti tsünü Asanü Benjamin lih la Mizpa ko Geba yangditi tbüticho.

²³Yangthsaba Asanü nguchicho lüpcho, abi kurahcho ko abinü tbüticho yangditi, Juda Yangthsarü Yukheh la thrahyoh lile. Ta abi shi rode ajing la mathsa khu jahloh-hiloh kangpehcho.

²⁴Asa sücho ko David yangdi la yangthsarü kong la dhrürangcho ko atsurü Jehoshafat tsü au mülih Yangthsaba kangcho.

²⁵Juda la Yangthsaba Asa yangthsathsaba kang anyüu la, Yangthsaba Jeroboam tsurü Nadab tsü Israel Yangthsaba kangcho ko abinü kang anyüh yangthsacho.

²⁶Abi belang, au kyo, abinü ABÜDONGBA nyüm amünyi shitpahcho ko Israelrü amünyi shitpahsohcho.

²⁷Isakar hung lanü Ahija tsurü Baashanü Nadab nyümcho ko Filistia la Gibethon yangdi Nadab ko abi rothsarünü mah yade abi kyüsehcho.

²⁸Hi Juda la Yangthsaba Asa yangthsathsaba kang asangu la tikehcho. Hütsüpü Baashanü Nadab mülih yangthsathsacho.

²⁹Dhrongyengnü abinü Jeroboam kukhirü kyüsehnung dikehcho. ABÜDONGBAnü abi dikehrü Shilo lanü azikehrü Ahijanü yocho kyo, khüdusü münyingpü Jeroboam kukhirü atümung kyüsehcho.

³⁰Hi Jeroboamnü Israel Tsingrang, ABÜDONGBA rihlong chürosohcho ko Israelrü amünyi shitpahsohcho khu tikehcho.

³¹Nadabnü nguchicho lüpcho Israel Yangthsarü Yukheh la thrahyoh lile.

³²Juda Yangthsaba Asa ko Israel Yangthsaba Baasha nyüh tsü anyüh yangthsathsa shikhe ayung mongchii du licho.

³³Juda la Yangthsaba Asa yangthsathsaba kang asangu la, Ahija tsurü Baasha tsü Israel Yangthsaba kangcho ko abinü Tirza la kang mükyüpü müyü yangthsacho.

³⁴Abi belang Yangthsaba Jeroboam kyo, abinü ABÜDONGBA nyüm amünyi shitpahcho ko Israelrü amünyi shitpahsohcho.