Read Sangtam Naga 1 YANGTHSARÜTI 17 Bible Online

1 YANGTHSARÜTI 17 - Sangtam Naga bible

1 YANGTHSARÜTI 17

¹Gilead la Tishbe lanü azikehrü khüdu Elijanü Yangthsaba Ahab te yocho, “Ihnü dikehba, akang liba Israel Tsingrang, ABÜDONGBA nengla yore. Ade tinü kang anyüh mahkhang asang Ihnü thali müyode tsing müronung mahkhang yingkih mülongnung.”

²Hütsüpü ABÜDONGBAnü Elija te yocho,

³“Nühnü hiba müdüm hi pehjüng ko nyüchürolang wünü Jordan nyüchüro lahpi Kherith Kihnatung la rang püm.

⁴Kihnatung tsünü nü khyang ayongnung kih chixinung ko nü khyang tsang hirojünung Ihnü khüyahla te yuzeng jüko.”

⁵Elijanü ABÜDONGBA yuzeng tsü nyinü wücho ko Kherith kihnatung la licho.

⁶Abinü kihna la tsünü kih yongcho ko khüyahlatinü nyangnyü romang mükhu tsang ko shuh hirojücho.

⁷Azachah lipü tsing mürochonü kihnatung tsü kungpehcho.

⁸Hütsüde ABÜDONGBAnü Elija te yocho,

⁹“Ade Sidon shündhün Zarefat yangdi lang wüng ko hütsüla lieng. Hütsüla chomilarü khüdu te nüh kangnung Ihnü yuzeng jüko.”

¹⁰Achotsü Elijanü Zarefat lang wücho ko khode abi tbükhüm amünyethsa rocho, abinü chomilarü khüdu sing khyahya ngucho. Abinü abükyü te yocho, “I khyang kih ayongnung hirojüng.”

¹¹Ko abükyünü hütsü khyünung wüde, abinü dsi yocho, “I khyang hümthse mii khürü hirojüng.”

¹²Abükyünü lalingcho, “Nü Tsingrang akang liba ABÜDONGBA nengla Ihnü yore, Ih hümthse müle. I licho apümnü tbhü la hüm müyo-o ko alih füh la olive tuji azikyoh lile. Ih hila sing aza khyahpü wü I tsudhre Ihjü nengdang külüpnung rochoba lile. Hütsü Ihjü nengdang akingka thsanung kholü kongseh sünung.”

¹³Elijanü abükyü te yocho, “Tülümxü. Wüng ko tsuyongnung rungnüm. Ta nü liba tsünü akhu hümthse azikyah külüp I khyang hirojüng ko anyingcho tsünü nü tsudhre nühjü nengdang külüpm.

¹⁴Tunüo Israel Tsingrang ABÜDONGBAnü hita yore: ‘Ih ABÜDONGBAnü tsing mümüthehde, tbhü la hüm tsü mükhyükhangnung ko alih füh la tuji tsü mütungtsangnung.’ ”

¹⁵Chomitpü tsünü wü Elijanü yocho kyo nguchicho ko arüh atümung nengdang nyümong adrong tsuyongnung kükyo licho.

¹⁶ABÜDONGBAnü Elija khu nyengchocho kyo, tbhü lanü hüm tsü mükhyükhangcho ko alih füh lanü tuji tsü mütungkacho.

¹⁷Azachah lipü khanglang, chomitpü tsurü tsü füthsa kangcho; abi amütsau kang achangkala sücho.

¹⁸Abükyünü Elija te yocho, “Tsingrangba nyitsarü, tuepü nühnü I te hita nguchicho? Nüh hila Tsingrangba khyang I münyi lümchehsoh I tsurü süsohnung rocho mah-o?”

¹⁹Elijanü yocho, “Azaba tsü I khyang jüng.” Abinü abükyü kheh lanü azaba tsü wüpchonü, amungthriba chongsah abi yüpji lang dhiküducho ko achongnong chah yüpsohpücho.

²⁰Hütsüpü abinü tasenü züde dangkhidangnangcho, “O ABÜDONGBA, I Tsingrang, tuepü chomitpü hite hitoh-i adrünung nguchi nguchicho? Abükyünü Ih müinü kang rore ko ade Nühnü atsurü hi süsohre.”

²¹Hütsüpü Elijanü azaba chah tsü asangpili hapkehcho ko dangkhidangnangcho, “O ABÜDONGBA, I Tsingrang, hiba akhunga hi kanglisohng.”

²²ABÜDONGBAnü Elija dangkhidangnang lalingcho; akhunga tsü asah chichi kangli rocho.

²³Elijanü azaba tsü ajinglang atpa yanglang no jowücho ko abükyü te yocho, “Dheng, nü tsudhre akang lile.”

²⁴Abükyünü yocho, “Ade nüh Tsingrangba nyitsarüepü Ihnü müdheko ko ABÜDONGBAnü yuje nüh khu chotale.”