Read Sangtam Naga 1 YANGTHSARÜTI 18 Bible Online

1 YANGTHSARÜTI 18 - Sangtam Naga bible

1 YANGTHSARÜTI 18

¹Azachah lipü, trüpsehnyü kang asanguba la, ABÜDONGBAnü Elija te yocho, “Wüng ko nüpu jangjang Yangthsaba Ahab te shirütaang, ko Ihnü tsing müthehnung.”

²Achotsü Elijanü shemüsu wücho. Samaria la yangkong tsü dira kangcho.

³Hütsünü Ahabnü Yangthsaba kuh xükümba Obadia dsicho. (Obadia tsü ABÜDONGBA khakhuchü mübürü thsacho,

⁴ko Jezebelnü ABÜDONGBA azikehrüti kyüsehde, Obadianü arüh thsih khüdu nücheh nowü dhünyang-nyangnü mülung anyüh kangpü lungkhi la rangpücho ko abinü tsuyongba chixicho.)

⁵Ahabnü Obadia te yocho, “Ihsa kuri ko gadu kangnung nengdang Ihsanü wü kihnatung ko yongkhi bekhüm apümlang dhengnung. Kümüdeo Ihsa kanglungrü khüdusü müsünung kohle.”

⁶Anyüh, sü khüilangnü dikehnung hütsü chotacho ko lang papa lang shemüsucho.

⁷Obadia alang la wüchiyade, abinü Elija dhrongyengnü shirücho. Abinü abi dhengchehcho ko ajing chah mükhukeh tsingdhengcho, “Hi yuje nüh mah-o?”

⁸Abinü lalingcho, “Ho, Ih Elijae. Wüng ko nü büdongba Yangthsaba te Ih ro lilepü young.”

⁹Obadianü lalingcho, “Yangthsaba Ahabnü Ih kyüsehsohnungthsa Ihnü nü te tu nguchicho?

¹⁰Akang liba ABÜDONGBA, nü Tsingrang nengla Ihnü yuchüm yore, Yangthsabanü limih apümlang nüh yangchiko. Khode Yangthsarü khüdunü abi lih la nüh mülepü yusi jücho, nüh müngu pü yuchümsohcho.

¹¹Ko ade nüh hila lilepü Ih wü abi te yosohnyürü ang?

¹²Ih tsipü ABÜDONGBA anbünü nüh khyümüipehkhang khütanung? Ihnü Ahab te nüh hila lile pü yopü nüh mülikhang, abinü Ih süsohnung. Ih azadenü ABÜDONGBA khakhuchü mübo rocho nühnü lümchehng.

¹³Jezebelnü ABÜDONGBA azikehrü kyüsehde Ihnü arüh nyüh thsih khüdu nücheh nowü lungkoh la dhünyang-nyangnü mülung anyüh kang yohpüpü tsuyongba chixicho nühnü müyuchi ang?

¹⁴Khang, Yangthsaba yanglang Ih khüta wü nüh hila lile pü yonung? Abinü Ih kyüsehnung!”

¹⁵Elijanü yocho, “Ihnü dikehba Akohba ABÜDONGBA nengla Ihnü chünye Yangthsaba te shirütanung nyengchore.”

¹⁶Achotsü Obadianü wü Yangthsaba te yocho ko Ahabnü Elija te shirütanung shemüsucho.

¹⁷Khode Ahabnü Elija ngucho, abinü yocho, “Israel la chongcha chürosohba nüh hila lile ang?”

¹⁸Elijanü yocho, “Chongcha chürosohba tsü Ih mah. Ta hütsü nüh, nüh ko nüu. Nühnü ABÜDONGBA yuzeng münyipü Baal kyothri mübüre.

¹⁹Ade Israelrü atümung te ro Karmel khang chah Ih shirünung yuzeng jüng ko arüh yola Baal azikehrü arüh 450 ko Jezebel yangthsalatpünü khümba Ashera tsingranglatpü azikehrü arüh 400 tsü norosohng.”

²⁰Achotsü Ahabnü Israelrü apüm ko Baal azikehrüti Karmel Khang chah shimükhongnung yuzeng jücho.

²¹Elijanü müyurü yanglang tsü küdu arüh te yocho, “Nührü lasih dhrongchehnung khütoi nyahli khyünung? ABÜDONGBA tsü Tsingrangba thsakhang, Abi mübüng; ta Baal tsü tsingrangba thsakhang, abi mübüng.” Ta müyurünü yu tpah-o mii müchürocho.

²²Hütsüde Elijanü yocho, “ABÜDONGBA azikehrü ade nying linung tsü Ih due, ta Baal azikehrülü arüh 450 lile.

²³Misüpung anyüh hirung; Baal azikehrüti khyang khüdu jüng, mapsehsohng ko zangzang khanahpü sing chah tsü zangkehsong, ta michang tütahkehsoh. Ko Ihnüsü apa misüpung tsü khyo hütsüroh-i tsü nguchinung.

²⁴Hütsüpü Baal azikehrütisü arüh tsingrang te dangkhidangnangsohng ko Ihsü ABÜDONGBA te dangkhidangnangnung. Ko sünü michang mütheh lalingnang, abi tsü Tsingrangba thsanung.” Hütsü müyurünü züde khyüchocho.

²⁵Hütsüpü Elijanü Baal azikehrüti te yocho, “Nührü adrongeko, misüpung tsü khüdu nührünü akhu khyo rungnüm. Nührü tsingrang te dangkhidangnang, ta sing chah tsü michang tütahkeh.”

²⁶Arüh khyang hirojüba misüpung tsü arühnü khyücho, rungnümcho ko nyüzeh Baal te dangkhidangnangcho. Arühnü züde yocho, “Ihrü te laling, Baal!” Hütsüta arühnü külüpba bholu tsü mükang nyiichicho. Ta tu alalingba mürocho.

²⁷Nyüzehde Elijanü arüh münyodhengcho: “Aziu dangkhidangnang. Abi tsingrang mado! Abi yüpjorü a mahnang mahkhang pehyahrü a mahnang, a shitseh wüchonang! Mahkhang abi yüpseh linungsü kohle, khamüsung!”

²⁸Achotsü arühnü alaa aziu dangkhidangnangcho ko arüh ayah roh-i tsü arühbürü jangjang arüh füla ashüh chüro, nohchangnü tsehnah dangkhidangnangcho.

²⁹Arühnü münyüzehde chichi züdecho, ta tu alalingba mürocho mahkhang yuva khüdu mii müyuchicho.

³⁰Hütsüpü Elijanü müyurü te yocho, “Ih amünyethsa rung” ko arüh atümungnü abi mükang shibülungcho. ABÜDONGBA bholu thsangnyang liba tsü abinü külüpchicho.

³¹Abinü sü khyang ABÜDONGBAnü aneng Israel jücho, abi tsurüti nengla lung dhüre-anyüh hirocho.

³²Hiri lung tsünü abinü ABÜDONGBA mübünung bholu tsü külüpchicho. Hütsü mükangmüla abinü kih liter dhüre-müyü tingnungthsa jucho.

³³Hütsüpü abinü bholu michah tsü sing zangkehcho ko misüpung tsü zangzang khanahpü singbhüm michah tsü yohpücho. Abinü yocho, “Kih füh müyü tungyohng ko amübü ko singbhüm chah tsü tungkehng.” Arühnü hütsüta nguchicho,

³⁴ko abinü yocho, “Adesü hütsüta thsaang ko arühnü nguchicho; Adesü thsaang.”

³⁵Bholu chah tsünü kih tsü pohcho jowü ajucho tsü jengcho.

³⁶Anyüzehlang mübüba bekhyah tsü Elijanü bholu te tsü wücho ko dangkhidangnangcho, “O ABÜDONGBA, Abraham, Isak ko Jakob Tsingrang, Israel Tsingrang tsü Nüh, Ih Nü dikehrü ko Ihnü nguchiba hi Nühnü mülacho nguchirepü Nühnü yuzi jüng.

³⁷I te laling, ABÜDONGBA, hiri nyitsarünü Nüh tsü ABÜDONGBA, Tsingrangba ko Nühnü Nüpu yanglang thali nororepü müdhenungthsa I te laling.”

³⁸ABÜDONGBAnü ninglangnü michang jürosohcho ko hütsü kangmübü, singbhüm ko lung apüm tsü trüp-pehcho ko alih mii rong trüpcho ko akoh la kih tingba tsüsü kungpehcho.

³⁹Khode hütsü müyurütinü ngucho, arüh jangjang alih la thsütsu yocho, “ABÜDONGBA tsü Tsingrangba; ABÜDONGBA du tsü Tsingrangba lile.”

⁴⁰Hütsüpü Elijanü yuzeng jücho, “Baal azikehrüti tsü rang; khüdusü tütsisoh.” Müyurüti tsünü arüh apüm rangcho ko Elijanü arüh Kishon Yongkhi lang no jowücho ko hütsüla arüh kyüsehcho.

⁴¹Hütsüpü Elijanü Yangthsaba Ahab te yocho, “Adelü wüng ko tsuyong. Ihnü tsing khong rocho yuchire.”

⁴²Ahab tsuyongnung wüpü lide, Elijanü Karmel zong chah küducho ko hütsüla abinü apu mükhoh anyüh kahla athah thsirang mükhukehcho.

⁴³Abinü abi kuliba te yocho, “Wüng ko kihdi lang tsü dhingdheng.” Kuliba tsünü wü dhengpü thali ro yocho, “Ihnü tu müngu.” Elijanü abi te dhünyehpili wü dhengnung yocho.

⁴⁴Adhünyehpiu abinü thali ropü yocho, “Kih la tsünü kheh doh-i nyükhi aikyah khüdu chüro Ihnü nguko.” Elijanü akuliba te yocho, “Yangthsaba Ahab yanglang wüng ko abi te tsingnü abi müyati denü kuri kari la tsü pümpü kuh lang thali tsinung young.”

⁴⁵Tunyah mülipü ning tsü nyükhi amarürahnü shüticho, nyübong fünung dikehcho ko tsing khütang rocho. Ahabnü abi kuri kari la pümpü Jezrel yang shangcho.

⁴⁶ABÜDONGBA zii Elija michah rocho; abinü ashü tsü khahkhah akih rümcho ko Jezrel yang lang ayung abi bekhu shangcho.