Read Sangtam Naga 1 YANGTHSARÜTI 19 Bible Online

1 YANGTHSARÜTI 19 - Sangtam Naga bible

1 YANGTHSARÜTI 19

¹Yangthsaba Ahabnü anitpü Jezebel te Elijanü nguchicho lüpcho ko abinü Baal azikehrüti kyüsehcho apüm yocho.

²Abükyünü Elija yang yusi khüdu müthehcho: “Nühnü azikehrüti chah tu nguchicho hütsü kyo Ihnü atu hitade münguchikhang, tsingrangtinü Ih süsohng.”

³Elijanü hütsü dro apu akang khümchonung tsicho; abinü abi kuliba nüpü wü Juda la Bersheba la licho.

⁴Hütsüla kuliba tsü pehjüpü, Elijanü akungaselih la nyümong khüdu langtseh wücho. Abinü singdong khüdu pohki nyehli pümcho ko sücho atsauepü lümcho. Abinü dangkhidangnangcho, “ABÜDONGBA, hi dirale. Ih süsohng; Ih sücho atsauba!”

⁵Abi singdong yingte tsü ngakeh yüpsehpecho. Dhrongyengnü ninglang riwürü khüdunü abi chah thahpo yocho, “Shemüsung ko tsuyong.”

⁶Abinü mükangmüla dhengcho ko hümthse khüdu ko kih füh khüdu abi thah te jo ngucho. Abinü hütsü tsucho ko yongcho ko thali ngakehcho.

⁷ABÜDONGBA ninglang riwüba tsünü thali ro anyüpiu abi khamüsu yocho, “Shemüsung ko tsuyong, mahkhang nü nengdang lang ashu lile.”

⁸Elijanü shemüsu tsuyongcho ko hütsünü abi Amüsa zong, Sinai chihnung nyümong yüre tseh wünung tase jücho.

⁹Hütsüla abinü lungkoh khüdu la yüpnung züducho. Dhrongyengnü ABÜDONGBAnü abi te chotacho, “Elija, nüh hila tu külüpro?”

¹⁰Abinü lalingcho, “ABÜDONGBA, Akohba Tsingrang, Ihnü I akang ayung Nüh du dikeh roko. Ta Israelrünü Nü te azengtacho thsangnyangko, Nü bholu thsangnyangjüko ko Nü azikehrü atümung kyüsehpehko. I müleng nying lile ko arühnü Ih mii kyüsehnung yangchire.”

¹¹ABÜDONGBAnü abi te yocho, “Chüdung ko akhang chah tsü I bete yaang.” Hütsüde ABÜDONGBAnü lahkhucho ko nyübong atrehdi rosohcho ko hütsünü akhang tsü tsohrüpsohcho ko lung tsü shühchicho, ta ABÜDONGBA tsü nyübong la tsü müzehcho. Nyübong tsü füzahcho, hütsüpü alihyo zingcho, ta ABÜDONGBA tsü müzehcho. Nyübong tsü füzahcho, hütsüpü alihyo zingcho, ta ABÜDONGBA tsü hütsü lasü müzehcho.

¹²Alihyo zingpü khanglang, michang chürocho, ta hütsüba michang lasü ABÜDONGBA tsü müzehcho. Ko michang khanglang tsü, yuva azikyah khüdu rocho.

¹³Khode hütsü Elijanü yuchicho, abinü ashünü aromih müshücho ko lungkoh trahtri la tsü chüdu yacho. yuva khüdunü abi te yocho, “Elija, nüh hila tu nguchiro?”

¹⁴Abinü lalingcho, “ABÜDONGBA Akohba Tsingrang, Ihnü Nüh du dikeh rore. Ta Nü müyurü Israelrünü Nü te azengchotaba thsangnyangko ko Nü bholu thsangnyangko ko Nü azikehrüti atümung süsohko. Ih du nying lile, ko arühnü Ih mii süsohnung yangchire.”

¹⁵ABÜDONGBAnü yocho, “Damaskas shündhün akungaselih lang tsü thali wüng ko yangdi la tsü züdu Hazael tsü Syria Yangthsaba,

¹⁶Nimshi tsurü Jehu tsü Israel Yangthsaba ko nü mülih Abel Mehola lanü Shafat tsurü Elisha tsü azikehrü thsanung müyühjo throchehng.

¹⁷Hazael kheh lanü tsicheh tsirü tsü Jehunü kyüsehnung ko Jehu kheh lanü tsicheh tsirü tsü Elishanü kyüsehnung.

¹⁸Ta Ihnü Israel la I te yuje chorü, Baal te mümükhukehrü ko abi kyothri chah mümüthsüpdhengrü nyüh hajar dhünyeh nying yohpüjünung.”

¹⁹Elija hütsü lanü tsicho, ko Shafat tsurü Elisha tsü misüpung tii-o nüpü luhxo yacho; abi belang arüp dhüre-kheh, ko abi tsü dhüre-anyüuba nüpü yacho. Elijanü afükhüm phungcheh Elisha khyang khümsohcho.

²⁰Hütsüde Elishanü misü tsü pehjüpü Elija khanglang shang wünü yocho, “Ihnü Iu e Itpa nyüh te aza yu yonung, hütsüpü Ihnü nü khanglang ronung.” Elijanü lalingcho, “Wüng, Ihnü nüh müyatire.”

²¹Hütsüpü Elishanü wünü amisüti tsü kyüsehcho ko misü hongzihba sing tsü tahnü shuh tsü chongcho. Abinü müyurüti khyang shuh tsü jücho ko arühnü hütsü tsucho. Hütsüpü abinü Elija khanglang iiwünü abi trorü kang dikehcho.