Read Sangtam Naga 1 YANGTHSARÜTI 2 Bible Online

1 YANGTHSARÜTI 2 - Sangtam Naga bible

1 YANGTHSARÜTI 2

¹David sünung thsade, abinü atsudhre Solomon dsinü abi te achangka athülaba yocho:

²“Ih sünung becho chihko.

³Müsi mülahng ko re zehng ko ABÜDONGBA nü Tsingrangnü tu yonang hütsü nguching. Nüh khüdederü wü ko tu nguchinang hütsüri la rii linung nengdang, Mosa Yuzeng la thrah licho yuzeng ko amülaba apüm bichieng.

⁴Nühnü Abi yocho nyikhang, arühnü Abi yuzeng yujecho arüh lasih ko arüh nbü apümnü bichi tashi, I chahnü trahchochotinü Israel la yangthsa thsasohnung I te nyengchoba tsü abinü yohpünung.

⁵“Adesü lango lile. Joabnü Israel rothsarü anüchirü nyüh anyüh, Ner tsurü Abner ko Jether tsurü Amasa nyüh kyüseh I te tu nguchicho hütsü nühnü müdhele. Abinü chita la süsohcho rühyang yangtsa shikhe la arüh khüta süsohcho nühnü müdhele. Abinü achomükeh nyitsarüti süsohcho ko abinü nguchicho ngang chünye I bha thsare ko Ih chongchare.

⁶Tu nguchinung nühnü müdhele; abi akyang nülü müsüsohnung.

⁷“Ta Gilead lanü Barzilai tsurüti te amüi ngusohng, ko arüh xüküm, tunüo Ih nü mung Absalom tenü rangchide arühnü Ih müicho.

⁸“Benjamin la Bahuram yangdi lanü Gera tsurü Shemeisü lile. Ih Mahanaim lang wüba nyümong abinü Ih Jordan Yongkhi la shirüde, Ihnü abi mükyüsehsohnung ABÜDONGBA nengla Ihnü yuchüm nyengchoko.

⁹Ta nühnü abi mükhingchikolü tüpehjü. Tu nguchinung nühnü müdhele ko abi tsü süsohbae.”

¹⁰David sücho ko abi David Yangdi la dhrürangcho.

¹¹Abinü Hebron la kang dhünyeh ko Jerusalem la kang sangrepü asang; kang yüre Israelrü Yangthsaba thsa licho.

¹²Solomon, au David mülih Yangthsaba kangcho ko abi yangthsathsaba dee drengdreng külüpcho.

¹³Hütsüpü Adonija, sü atpa Hagit licho, abinü Solomon atpa Bathsheba yanglang wücho. Abükyünü tsingdhengcho, “Hi lümlong atsanü xodhengrü mah-o?” Abinü lalingcho, Ho.

¹⁴Hütsüpü abinü yocho, Ih nü te lango tsingdhengnung lile. Abükyünü tsingdhengcho, “Tuo?”

¹⁵Abinü yocho, “Ih Yangthsaba kangnung licho tsü nühnü müdhele ko Israel atümungnü hütsüta longdi licho. Ta hütsüta mütikehpü Ini uthring Yangthsaba kangko, tunüo hütsü ABÜDONGBAnü lümcho thsacho.

¹⁶Ko ade Ihnü lango kihchinyüre; yanglilüm hütsü tüthsongli.”

¹⁷Abinü yocho, “Yanglilüm Yangthsaba Solomon te I khyang Shunem latpü Abishag tsü I nitpü thsanung khyüsohngding, abinü nü yulü müpehjünung.”

¹⁸Abükyünü lalingcho, “Dee tsale, Ihnü Yangthsaba te nü nengdang chotajünung.”

¹⁹Achotsü Bathshebanü Adonija nengdang chotajünung Yangthsaba yang wücho. Yangthsabanü atpa te chotanung shemüsu yacho ko abükyü jingte mükhukehcho. Hütsüpü abinü Yangthsaba pümji chah tsü pümcho ko abükyü khyang pümji khüdu hirosoh abi tsalang pümsohcho.

²⁰Abükyünü yocho, “Nü te lango nguchisohnung tsingdhengnyüre; yanglilüm tüthsongli.” Abinü tsingdhengcho, “Hütsü tuo, Itpa?” “Ihnü nü te müthsonglinung.”

²¹Abükyünü yocho, “Abishag tsü nü mung Adonija khyang anitpü thsanung khyüsohng.”

²²Yangthsabanü yocho, “Abi khyang Abishag jünung tuepü I te tsingdhengro? Abi khyang yangthsaba pümji mii jünung tsingdheng. Abi Imung aziba lile ko hütsüla Abiathar ko Joab nyüh mii abi lahpi zehle!”

²³Hütsüpü Solomon-nü ABÜDONGBA nengla yuchüm khüdu külüpcho, “Adonijanü hi tsingdhengcho ngang akangnü mükhangkhang, Tsingrangbanü Ih süsohng.

²⁴ABÜDONGBAnü Iu David Yangthsaba pümji la Ih drengdreng pümsohcho; abinü abi anyengchocho yohpüko ko yanglih tsü Ih ko U chahnü trahchocho khyang jüko. Chünye tsatsa Adonija süsohnung Ihnü akang liba ABÜDONGBA nengla yuchümre.”

²⁵Hütsüta Yangthsaba Solomon-nü Benaia khyang yuzeng jo abinü wü Adonija kyüsehsohcho.

²⁶Hütsüpü Yangthsaba Solomon-nü bebüba Abiathar te yocho, “Nü yang Anathot lang thali tsieng. Nüh asünung leng lile, ta Ihnü nüh ade müsüsohnung, tunüo nüh Iu David te lide nüh Yuzeng Singdi xükümrü thsacho ko abi chongcha apüm la changtacho.”

²⁷Hütsüta Solomon-nü Abiathar tsü ABÜDONGBA dikehba lanü zahsohcho ko hütsünü ABÜDONGBAnü Shilo la bebüba Eli ko abi trah nengdang tu yocho hütsü tikehsohcho.

²⁸Atikehcho tsü Joabnü yuchicho. (Abinü Absalom mahpü Adonija trocho.) Achotsü abinü ABÜDONGBA shükuh lang wünü bholu jüh chah marehcho.

²⁹Joab rang wünü shükuh la bholu jüh chah marehpü licho Yangthsaba Solomon-nü yuchide, abinü Joab yanglang tuepü bholu lang rang tsicho pü tsingdhengnung yuhirü müthehcho. Solomon drüchonü ABÜDONGBA yanglang rang tsichoepü Joabnü lalingcho. Achotsü Yangthsaba Solomon-nü Joab kyüsehsohnung Benaia müthehcho.

³⁰Abinü ABÜDONGBA shükuh lang wünü Joab te yocho, “Yangthsabanü nüh chüronung yuzeng jüre.” Joabnü lalingcho, “Ih müchüronung, Ih hila sünung.” Benaianü thali wü Joabnü yoba yu tsü Yangthsaba te yocho.

³¹Solomon-nü yocho, “Joabnü yocho kyo nguching. Abi kyüsehng ko dhrürangpehng. Hütsükhang, Joabnü achomükeh nyitsarü kyüsehcho ngang Ih ko David trah sü bha müthsanung.

³²Joabnü Iu Davidnü mümüdhepü hütsüri kyüsehcho ngang ABÜDONGBAnü abi khingchinung. Joabnü apu tenü atsau nyüh anyüh kyüsehcho: Israel rothsarü anüchiba Abner ko Juda rothsarü anüchiba Amasa.

³³Anyüh kyüsehcho ngang akhingchi tsü Joab ko abi trah chah lede linung. Ta ABÜDONGBAnü David pümji la pümba, abi trah khyang lede akoh jünung.”

³⁴Achotsü Benaianü ABÜDONGBA shükuh lang wünü Joab kyüsehpü akungaselih la liba apu kuhla dhrürang pehcho.

³⁵Yangthsabanü Joab mülih Benaia rothsarü anüchiba kangsohcho ko Abiathar mülih Zadok tsü bebüba kangsohcho.

³⁶Hütsüpü Yangthsabanü Shimei noro abi te yocho, “Jerusalem hila nüpu nengdang kuh khüdu thsaang. Hütsüla lieng ko yangdi tüpehjü.

³⁷Nühnü hi pehpü Kidron kihnatung khu tsikhang, nüh sükhungkhung ko nüpu du mülangnung.”

³⁸Shimeinü lalingcho, “Nüh Adibong, khütang tsale. Nühnü yocho kyo Ihnü nguchinung.” Hütsüta abi bekhyah asheng Jerusalem la licho.

³⁹Ta kang asang khanglang, Shimei kulirü nyüh anyüh Gath Yangthsaba Maka tsurü Akish yanglang rang tsicho.

⁴⁰Khode Shimeinü arüh Gath la lilepü yuchicho, abinü abi kulirüti anünung Gath lang Akish yang abi gadu chah pümpü wücho. Abinü arüh hütsüla shirücho ko nüli rocho.

⁴¹Shimeinü nguchiba tsü Solomon-nü yuchide,

⁴²abinü abi noro yocho, “Jerusalem müpehjünung Ihnü nü khyang ABÜDONGBA nengla yuchümsohko. Ko nühnü pehjükhang, nüh süririepü Ihnü nü te yoko. Nühnü I yocho nyinungepü münyengcho ang?

⁴³Khang, tuepü nühnü anyengchocho thsangnyang I yuzeng münyicho?

⁴⁴Nühnü Iu David te thsamehcho apüm nühnü müdhele. ABÜDONGBAnü hütsü ngang nüh khingchinung.

⁴⁵Ta abinü Ihlü müwajünung ko Abinü lede David yanglih khümcho yohpünung.”

⁴⁶Hütsüpü Yangthsabanü Benaia khyang yuzeng jo Shimei kyüsehsohcho. Adelü Solomon khehla lüpcho zürocho.