Read Sangtam Naga 1 YANGTHSARÜTI 20 Bible Online

1 YANGTHSARÜTI 20 - Sangtam Naga bible

1 YANGTHSARÜTI 20

¹Syria Yangthsaba Benhadadnü abi rothsarüti apüm nübülungcho, ko aparü Yangthsarü sangrepü-anyühnü tro, arüh kuri kari ko kuri zehnü shemüsu tuwü Samaria mükangti mahcho.

²Abinü yangdi la tsü Israel Yangthsaba Ahab te hita yosohnung müthehcho,

³“Yangthsaba Benhadadnü nü te nü taripi ko hon, nü yo khingkurüti ko nü tsurü yola re azeh-uba abi khyang jo abi chah hapnung yore.”

⁴Ahabnü lalingcho, “I büdongba, Yangthsaba Benhadad te, Ihnü hereding; abinü Ih ko I licho lüpcho khyünung kohle.”

⁵Adesü akhanglang Benhadadnü achingba lang pa khüdu chingcho: “Ihnü nü te nü hon ko taripi, nü yo khingkurüti ko nü tsuzarüti ching yuva jüko.

⁶Ta ade, Ihnü nü kuh ko nü pohki thsazirüti kuhla tu linang müzu khyünung Ihnü I pohki thsazirüti müthehnung. Arühnü atu hitade nüh chii ronung.”

⁷Yangthsaba Ahabnü yangdi la langnürüti apüm dsiyoh yocho, “Hiba nyitsarü hinü Ihsa changjünyücho nührünü müdhele. Abinü I tsurü ko I nitpürü ko hon ko taripi chingcho Ihnü jünung nyengchoko.”

⁸Langnürüti ko müyurünü yocho, “Abi te tu tülaling; ko tu tüjü.”

⁹Achotsü Ahabnü Benhadad yusi hirü te yocho, “I büdongba Yangthsaba te, abinü akhu chingba tsü jünung, ta anyüuba tsülü müjünungepü young.”

¹⁰Achotsü yuhirü tsü tsicho ko Benhadad chahnü yusi apa khüdu rocho: “Ihnü nü yangdi tsü mahnung nyitsarü kükyo noronung ko arüh khehnü müzüp hitsinung. Ihnü hütsüta münguchikhang, tsingrangrünü Ih süsohng.”

¹¹Yangthsaba Ahabnü lalingcho, “Yangthsaba Benhadad te hita young, Yuje rothsarünü khatapü khanglang du ma, mah-epü tüzümükhüm tüthsa.”

¹²Benhadadnü Ahab chahnü alalingba tsü abi ko abi trorü aparü Yangthsarüti tsü arüh shükuh la yongkha yong pümde hirocho. Abinü abi nyitsarü te yangdi tsü mahnung rungnümnung yocho ko arühnü hütsüta rungnümcho.

¹³Hütsütade azikehrü khüdunü wü Yangthsaba Ahab te yocho, “ABÜDONGBAnü yore, Rothsarü sühdi tsü tüdrü. Ihnü chünye nü khyang arüh michah akoh jünung, hütsüde nühnü Ih tsü ABÜDONGBA epü müdhenung.”

¹⁴Ahabnü tsingdhengcho, “Sünü langkhunung?” Azikehbanü lalingcho, “District la governorti pohki rothsarü khyang langkhusohng pü ABÜDONGBAnü yore.” Yangthsabanü tsingdhengcho, “Rothsarü mülung tsü sünü nünung?” Azikehbanü yocho, “Nühnü!”

¹⁵Achotsü Yangthsabanü District la rothsarü anüchirü pohki lirü rothsarü dhrezarüti arüh atümungnü 232 dsibülungcho. Hütsüpü abinü Israelrü rothsarü arüh hajar dhünyeh dsibülungcho.

¹⁶Hütsüpü Benhadad ko abi trorüti arüh sangrepü anyüh tsü arüh shükuh la müchapü lide, nyüthung la arüh becho.

¹⁷Dhrezarü rothsarüti tsü akhucho. Hütsüde Benhadadnü müthehcho füzathsarü tinü ro Samaria lanü rothsarü mülung khüdu rolepü yocho.

¹⁸Abinü yuzeng jo yocho, “Arüh khatanung ronye mahkhang yangtsa külüpnung ronye akangnü rang.”

¹⁹Dhrezarü rothsarüti tsünü langkhupü mahcho ko Israel rothsarüti tsü arüh khanglang iiwücho ko arüh müipinü palunü dhsükehba nyitsarü tsü kyüsehcho.

²⁰Israelrünü jükeh iichonü Syriarü tsü dro tsicho ko Benhadad tsü rothsarü khürünü müyang kuri chahnü tsicheh tsicho.

²¹Yangthsaba Ahabnü nüpü iiwücho ko kuri kari ko kuriti kengchocho ko Syriarü tsü dee thsakehjo mütsa kohchehcho.

²²Hütsüpü azikehbanü Yangthsaba yanglang wünü yocho, “Thali wüng ko nü rothsarüti külüpching ko lümchung müzah chung, tunüo Syria Yangthsabanü aronung chisi kyang thali mahnung ronung.”

²³Yangthsaba Benhadad pohki adirütinü abi te yocho, “Israel tsingrangti tsü azong tsingrang, hütsünü arühnü Ihsa kohko. Ta Ihsanü angah la khatakhang, Ihsanü arüh kohtsatsanung.

²⁴Ade, Yangthsarü arüh sangrepü anyüh tsü khyümüing ko arüh mülih tsü rothsarü anüchirü yohng.

²⁵Hütsüpü nüh pehjüba rothsarü doi throung ko kuri ko kuri kari sü hütsüdoi tsü jüng. Ko Ihsanü Israel te tsü angah la chitanung ko adelü Ihsanü arüh kohnung.” Yangthsaba Benhadadnü arüh yu khyo nguchinung chechocho.

²⁶Akhüuba chisi kyang abinü anyitsarüti dsibülungcho ko arüh yola Israelrü mahnung Afek yangdi lang tsü wücho.

²⁷Hütsüde Israelrüsü dsibülung thsunohrü thsachehcho; arühnü shemüsu wücho ko Syriarü lahpi pinü mülung anyüh kangpü müdongcho. Apümlang sohjeng liba Syriarü te phidelü Israelrülü miza mülung anyüh kyo licho.

²⁸Azikehrü khüdunü Yangthsaba Ahab yanglang wünü yocho, “ABÜDONGBAnü hiroh-i yore: ‘Syriarünü Ih tsü angah tsingrang mah, azong tsingrangepü yorü tsü, Ihnü nü khyang arüh rothsarü mükhilong michah akoh jünung, ko hütsüde nüh ko nü müyurünü Ih tsü ABÜDONGBA epü müdhenung.’ ”

²⁹Nyümong dhünyeh Israelrü ko Syriarü tsü arüh müdongchah deta pümcho. Adhünyeh nyümong arühnü chitanung dikehcho ko Israelrünü Syriarü lakh khüdu kyüsehcho.

³⁰Asünyingrü Afek yangdi lang tsi wücho ko hütsüla arüh nyüh hajar mükyüpü dhünyeh chah yangdi tbü khülu jasehcho. Benhadadsü yangdi lang tsü tsi wücho ko kuh khüdu chongsah ayonglangba la tsikehcho.

³¹Abi pohki adirütinü wü abi te yocho, “Israelrü Yangthsarütilü yanglilüm kehre pü ihrünü yuchire. Hütsüeko ihrünü müyah shünü ihrü kihrümpü ko ihrü hong la rangdüshü yohpü wünü Israel Yangthsaba shirünung ihrü khyang mülajüng, kümüdeo abinü nü akang khümchonung kohle.”

³²Achotsü arühnü müyah shünü arüh kihrümpü ko arüh hong la rangdüshü yohpü Ahab yanglang wücho ko yocho, “Nü dikehrü Benhadadnü abi akang khümchoungpü nü te kihchire.” Ahabnü lalingcho, “Abi ade yingcheh akang lile ang? Tsale! Abi Ini roh-ie!”

³³Benhadad riwürü tsünü yu atsa yolopü dheng yacho ko khode abinü “Ini” pü yoyeng, arühnü yocho, “Nühnü yocho kyo, Benhadad tsü nü ni lile.” Ahabnü yuzeng jo yocho, “Abi I yanglang norung.” Khode Benhadad ro chihcho, Ahabnü abi yola kuri kari la tsü pümsohcho.

³⁴Benhadadnü abi te yocho, “Iunü nüu chahnü khyo liba yangditi tsü Ihnü nü khyang thali ko Iunü Samaria la nguchicho kyo nühnü Damaskas la shithsabhüleh chah khüdu külüpm.” Ahabnü lalingcho, “Hütsüta thsaekhang, Ihnü nüh müthehnung.” Abinü abi te yangtsa külüpcho ko abi tsisohcho.

³⁵ABÜDONGBAnü mülachonü azikehrü mülung la nyüh khüdunü aparü azikehrü khüdu te abi chah xüpnung yuzeng jücho.

³⁶Ta abinü mükhyüchocho, achotsü abinü abi te yocho, “Nühnü ABÜDONGBA yuzeng münyicho ngang, nüh I tenü za tsiyeng kihkhünying khüdunü nüh mükahsehnung.” Ko hütsüta abi tsiyeng, kihkhünying khüdunü ro abi mükahsehcho.

³⁷Hütsüpü hivi du tsünü wü aparü khüdu te yocho, “I chah lahng.” Hiba nyitsarü tsünü hütsüta nguchicho; abinü tasenü abi chah shingcho ko thsakehjücho.

³⁸Azikehba tsünü shü khüdunü athah rümcho ko tsahthrimülapü wünü lang te Israel Yangthsaba lahkhulang dheng yingcho.

³⁹Yangthsaba tsü lahkhu tside, azikehba tsünü abi dsinü yocho, “Nüh Adibong, Ih khata la tsü chita yade, rothsarü khüdunü abinü rangcho arorüh khüdu noro I te yocho, ‘Hi nyahng; abi tsicho tsikhang, abi mülih nü kang khyünung mahkhang taripi hajar asang akhang khyünung.’

⁴⁰Ta Ih apa müdeng yade arorühba tsü tsicheh tsipehcho.” Yangthsaba tsünü yocho, “Nühnü nüpu nengdang chopehko, ko nühnü akhingchi tsü hieng.”

⁴¹Azikehba tsünü athah rümtiba shü tsü phungchehde, abi tsü azikehrü khüduepü Yangthsabanü tsüpcho.

⁴²Hütsüpü azikehba tsünü Yangthsaba te yocho, “Hi ABÜDONGBA yu lile: ‘Ihnü süsohnung yuzeng jücho nyitsarü tsü nühnü tsicho tsisohko ko hütsü ngang, nüpu akangnü khangnung ko abi rothsarüti tsicheh tsisohcho ngang nü rothsarü changsohnung.’ ”

⁴³Yangthsaba tsü Samaria lang wahseh ko longyo kuh lang thali wücho.