Read Sangtam Naga 1 YANGTHSARÜTI 21 Bible Online

1 YANGTHSARÜTI 21 - Sangtam Naga bible

1 YANGTHSARÜTI 21

¹Jezrel la Yangthsaba Ahab kuh shündhün Naboth shükusiluh khüdu licho.

²Nyümong khüdu Ahabnü Naboth te yocho, “Nü shükusiluh tsü I khyang jüng; hi I kuh amünyeh-e ko hütsü Ih hichongnung tbü thsanung khyünyüre. Hütsü mülih Ihnü nü khyang shükusiluh atsau khüdu jünung mahkhang Ihnü angang aleng jünung.”

³Nabothnü yocho, “Hi I jümürü chahnü thsiking lile. Ihnü nü khyang jünung ABÜDONGBAnü yatieng.”

⁴Naboth yunü Ahab zichüro ko wahseh kuh lang thali tsicho. Abinü chongnong chah tu mütsuyongpü züdilang pipü yüpjocho.

⁵Anitpü Jezebelnü abi yanglang wü tsingdhengcho, “Nüh tuthsacho hidoi wahro? Tuepü mütsuyongro?”

⁶Abinü yocho, “Naboth yunü Ih wahre. Ihnü abi lih tsü lihnung mahkhang abinü lümkhang abi khyang apa shükusiluh jünungpü yonye, abinü müjünungere.”

⁷Jezebelnü lalingcho, “Nüh Yangthsaba mah ang? Chongnong chah tsünü surung ko tsuyong. Ihnü nü khyang Naboth shükusiluh tsü khyo jünung.”

⁸Hütsüpü abükyünü vathrah khürü thrahcho, ko Ahab nengla thrahpü, abi ashingjinü shingpü Jezrel la thsazirüti ko azirüti khyang mühehcho.

⁹Vathrah la tsü; “Kongnung nyümong khüdu throchehng, müyurü shimükhongsohng ko Naboth khyang adhichi jüng.

¹⁰Ko abinü Tsingrangba ko Yangthsaba chokehcholacho ngang abi aromih chah thükeh mülangjünung nyitsarü amütsa nyüh anyüh norung. Hütsüpü yangdi lanü nücheh nowü lungnü kengseh pehng.”

¹¹Jezebelnü yuzeng jüba tsü Jezrel la thsazirüti ko azirütinü nguchicho.

¹²Arühnü kongnung nyümong khüdu throchehcho ko müyurü apüm shibülungpü Naboth khyang adhichi jücho.

¹³Amükhyu nyüh anyüh tsünü abinü Tsingrangba ko Yangthsaba chokehcholacho ngang misha abi mülangjücho, hütsüpü yangdi lanü nücheh nowü kengseh süsohcho.

¹⁴Yusi tsü Jezebel yang: “Naboth süsohkopü müthehcho.”

¹⁵Jezebelnü yusi tsü yuchiyeng, Ahab te yocho, “Naboth süko. Ade wüng ko nü khyang mü-inyüba shükusiluh tsü khyüng.”

¹⁶Hütsüde tsünü Ahabnü shükusiluh tsü khyünung wücho.

¹⁷Hütsüde ABÜDONGBAnü Tishbe lanü azikehrü Elija te yocho,

¹⁸“Samaria la Yangthsaba Ahab yanglang wüng. Abi Naboth shükusiluh la hütsü khyünung ya nühnü shirünung.

¹⁹Ih, ABÜDONGBAnü abi te hita yoreding: ‘Nyitsarüba tsü kyüsehpü abi kuthsi mii khyünung ang?’ ‘Füzatinü Naboth shüh müyahba müdüm la tsü, arühnü nü shüh müyahnung!’ ”

²⁰Ahabnü Elija ngu abi te yocho, “I rorüh, nühnü Ih rangxahko ang?” Elijanü lalingcho, “Ho, nüh rangxako,” “Nühnü ABÜDONGBA nah te tu amütsa liro, hütsüla nü jangjang khakhuchüjüko.

²¹Hütsüeko ABÜDONGBAnü nü te hita yore: ‘Ihnü nü michah achangba hirojünung. Ihnü nü kukhi lanü adhrerüecho aza-azi apüm changsohnung.

²²Nü kukhi tsü Nebat tsurü Yangthsaba Jeroboam kukhi ko Ahija tsurü Yangthsaba Baasha kukhi kyo kangnung, tunüo nühnü Israel khyang amünyi shitpahsoh I rihlong chürosohko.’

²³Ko Jezebel nengdang ABÜDONGBAnü yore, Jezrel yangdi la abükyü fü füzatinü tsunung.

²⁴Nührü tsutpurü sü yangdi la sonang, füzatinü abi tsunung ko rangmüla sürüti hogon-nü tsunung.”

²⁵(Ahabnü anitpü Jezebelnü thsüchi ABÜDONGBA nah te amüthsalang nguchicho.

²⁶Israelrü rode, ABÜDONGBAnü iipehjüba Amor-rünü mübüba kyothri mübü ashahnung amünyi shitpahcho.)

²⁷Khode Elijanü chokacho, Ahabnü ajengki rehnahcho, hütsü phungcheh müyahshü müpicho. Abinü mütsuyongcho, müyahshü la tsü yüpnü aromih mükhüm wahseh rachicho.

²⁸ABÜDONGBAnü azikehrü Elija te yocho,

²⁹“Ahabnü I bete khüta longlüm kangcho hütsü nühnü münguo? Abinü hütsüroh-i nguchichonü, Ihnü abi akang li lalü achangba mühirojünung; ta atsurü chichah Ihnü Ahab kukhi la achangba hirojünung.”