Read Sangtam Naga 1 YANGTHSARÜTI 22 Bible Online

1 YANGTHSARÜTI 22 - Sangtam Naga bible

1 YANGTHSARÜTI 22

¹Israel ko Syria nyüh kahla kang anyüh yangtsa licho,

²ta kang asangu la Juda Yangthsaba Jehoshafatnü Israel Yangthsaba Ahab shirünung wücho.

³Ahabnü abi pohki thsazirüti te tsingdhengcho, “Syria Yangthsaba kheh lanü Gilead la Ramoth thali khyünung nengdang tuepü Ihsanü tu münguchiro? Hütsü Ihsa yoe.”

⁴Ko Ahabnü Jehoshafat te tsingdhengcho, “Ramoth mahnung nüh I yola müronyüo?” Jehoshafatnü lalingcho, “Nühnü lümkhang, Ih, I rothsarüti ko I kuri-rothsarütilü rungnüm du lile.

⁵Ta Ihsanü akhu ABÜDONGBA te tsingdhengnung”

⁶Achotsü Ahabnü azikehrüti arüh thsih müyü-oshi tsü dsiyoh arüh te tsingdhengcho, “Ihnü Ramoth mahnung khüta?” Arühnü lalingcho, “Mahng, ABÜDONGBAnü nü khyang akoh jünung.”

⁷Ta Jehoshafatnü tsingdhengcho, “Ihsanü ABÜDONGBA te tsingdhengnung aparü azikehrü mülio?”

⁸Ahabnü lalingcho, “Imla tsurü Mikaia lile. Ta Ihnü abi thrünyire, tunüo khodesü abinü I nengdang atsa müchoyohre.” Jehoshafatnü yocho, “Nühnü hütsüta tücho!”

⁹Hütsüde Ahabnü abi kuhla adirü nyüh khüdu dsiro Mikaia dsinung müthehcho.

¹⁰Yangthsarü anyüh tsü yangthsarü jengki khyüpü Samaria tbükhüm mihlang, pungkhyang ngah la tsü pümcho ko arüh bete tsü azikehrüti tsü choyoh licho.

¹¹Arüh yola nyüh khüdu, Khenana tsurü Zedekianü idhsenü rühti külüp-pü Ahab te yocho, “ABÜDONGBAnü hita yore: ‘Hiri bipü Syriarü te khataang ko arüh sehchi kohchehng.’ ”

¹²Aparü azikehrüti nüsü hütsü akyokyo du tsü yocho. Arühnü yocho, “Ramoth nyüm shemüsung ko nühnü kohnung. ABÜDONGBAnü nü khyang akoh jünung.”

¹³Hütsütade Mikaia dsinung wüba tsünü abi te yocho, “Aparü azikehrü atümungnü Yangthsaba akoh nengdang du choyohko, nühnüsü hütsü kyo du choyohng.”

¹⁴Ta Mikaianü lalingcho, “ABÜDONGBAnü I te tu yonang hütsü du yonung Ihnü yuchümre.”

¹⁵Khode abinü Yangthsaba Ahab shirücho, Yangthsabanü abi te tsingdhengcho, “Mikaia, Yangthsaba Jehoshafat ihjünü Ramoth mahnung wünung müwünung?” Mikaianü yocho, “Mahng! Nühnü kohnung. ABÜDONGBAnü nü khyang akoh jünung.”

¹⁶Ta Ahabnü yocho, “Khode nühnü ABÜDONGBA nengla I te chotanang, yuje choung. Ihnü hütsü nengdang khüdopi nü te yonung.”

¹⁷Mikaianü lalingcho, “Ihnü Israel rothsarüti azong la tsü anyahrü müliba san kyo shupishuza ngure. Ko ABÜDONGBAnü yocho, Hiri nyitsarü hi anüchirü müle; arüh tbachi kuh lang thalisohng.”

¹⁸Ahabnü Jehoshafat te yocho, “Abinü khodesü I nengdang atsa müchoyohrepü Ihnü nü te müyo-o? Lede lango amütsa du choyohre.”

¹⁹Mikaianü mütozah yocho: “Ade ABÜDONGBAnü tu yoro nyieng. ABÜDONGBA tsü ninglang Abi pümji la Abi mükang riwürüti apüm ya Ihnü ngucho.

²⁰ABÜDONGBAnü tsingdhengcho, Ahab wü Ramoth la kyüsehsohnung sünü wü abi kihyochünung? Riwürüti tsünü khüdunü lango ko khüdunü apa yocho,

²¹ko anbü khüdunü belang chüro ABÜDONGBA te yocho, Ihnü abi kihyochünung.

²²ABÜDONGBAnü tsingdhengcho, Khüta? Anbü tsünü lalingcho, Ihnü wünung ko Ahab azikehrüti apüm khyang arahkheh choyohsohnung. ABÜDONGBAnü yocho, Wüng ko abi kihyochüng. Nühnü kohnung.”

²³Ko Mikaianü yocho: “Hütsüta tikehcho. ABÜDONGBAnü nüh azikehrüti hiri khyang arahkheh chosohcho. Ta nüh asüba mütohnungepü apunü choko.”

²⁴Hütsüde azikehrü Zedekianü Mika yang tuwü amüchüp la tangcho ko yocho, “ABÜDONGBA anbü khode tinü I chahnü tsicho ko nü te chotacho?”

²⁵Mikaianü lalingcho, “Nühnü ayonglang achongsah la rangnung züdude nühnü müdhenung.”

²⁶Hütsüde Yangthsaba Ahabnü abi pohki adirü khüdu te yuzeng jo yocho, “Mikaia rangnü yangdi governor Amon ko Yangthsaba tsurü Joash nyüh yanglang nowüng.

²⁷Abi akhangti kuhla Ih müthalide hümthse ko kih dunü kang yang.”

²⁸Mikaianü züde yocho, “Nüh khümcho thalikhang, ABÜDONGBAnü Ih khu müchota.” Abinü yocho, “Ihnü tu yocho, hütsü atümungnü nyieng.”

²⁹Hütsüpü Israel Yangthsaba Ahab ko Juda Yangthsaba Jehoshafat nyühnü Gilead la Ramoth yangdi mahnung wücho.

³⁰Ahabnü Jehoshafat te yocho, “Ihjünü khata züdude, Ihlü I tsah thrimülanung, ta nühlü nü Yangthsaba jengki khyüng.” Hütsüta Israel Yangthsaba tsü tsahthrimüla khata la züducho.

³¹Syria Yangthsabanü abi yo anüchirü sangrepü anyüh te tsü Israel Yangthsaba chah khu aparü süsü müsüsohnung yuzeng jücho.

³²Hütsünü khode arühnü Yangthsaba Jehoshafat ngucho, arüh apümnü hütsü Israel Yangthsabaepü lüm arühnü abi beticho.

³³Ta khode abinü züdecho, hütsü Israel Yangthsaba mah pü arühnü müdhecho ko arühnü khata tsü zahcho.

³⁴Mülongdipü, Syriarü rothsarü khüdunü tbüdeng khüdu kyade ko hütsünü Yangthsaba Ahab khata jengki ko adreng nyüh kahla kyacho. Abinü abi kuri kari nüba te yocho, “Ih thsakehko! Ximüla khata la tsünü Ih nücheh tsieng.”

³⁵Khütang khata bhülong la, Yangthsaba Ahablü akuri kari la Syriarü lahpi abe pipü nyüpkeh pümcho. Aiha lanü ashüh poh jowü kuri kari apohki tsü jengcho ko nyüzehde abi sücho.

³⁶Nyü züdunung thsade Israelrü rothsarü anüchirü khu yuzeng mütheh yocho, “Adelü nührü atümung palu lih ko yangdi yangchi thalieng.”

³⁷Hütsüta Yangthsaba Ahab sücho. Abi me tsü Samaria lang hiwü dhrürangcho.

³⁸ABÜDONGBAnü yocho kyo, kuri kari tsü Samaria changtphü mabomashilarü mütsah chah tsü thsüthohcho ko füzanü ashüh tsü müyahcho.

³⁹Yangthsaba Ahabnü nguchicho lüpcho, Yangthsaba kuh thsüro-hanü mükingcho ko abinü yangditi külüpcho, hiri apüm tsü Israel Yangthsarü Yukheh la thrahyoh lile.

⁴⁰Abi süde atsurü Ahazia tsü abi mülih Yangthsaba kangcho.

⁴¹Israel Yangthsaba Ahab Yangthsathsaba kang amüyüu la,

⁴²Asa tsurü Jehoshafat tsü abi kang sangrepü münga thsade Juda Yangthsaba kangcho ko abinü Jerusalem la kang mükyüpü münga yangthsacho. Atpa tsü Shilhi tsulatpü Azuba licho.

⁴³Au Asa kyo, abinü ABÜDONGBA nahte tu atsa hütsü nguchicho; ta müyudsirü mübüba müdümti tsü müthsangnyangjücho ko müyurünü mütozah hütsüri la kangmübü jo ko müchiji tahcho.

⁴⁴Jehoshafatnü Israel Yangthsaba te yangtsa külüpcho.

⁴⁵Jehoshafatnü nguchicho lüpcho, abi kurahcho ko abi khatacho Juda Yangthsarü Yukheh la thrahyoh lile.

⁴⁶Au Asa chichahnü liroba müyudsirü mübüji la liba mabomashilarüti khingkurü ko adhrerü apüm iipehcho.

⁴⁷Edom lih la Yangthsaba mülicho; hütsüla Juda Yangthsabanü throjücho achitung nyüh khüdunü yangthsathsa licho.

⁴⁸Yangthsaba Jehoshafatnü Ofir lih lang hon hinung nengdang kihjü kihkuh khüdu külüpcho; ta hütsü Eziongeber la thsangnyangcho ko khodesü mübichichehcho.

⁴⁹Achotsü Israel Yangthsaba Ahazianü Jehoshafat nyitsarü yolanü wüsohnung tsingdhengcho, ta Jehoshafatnü mümülacho.

⁵⁰Jehoshafat sücho ko David Yangdi la yangthsarü kong la dhrürangcho ko atsurü Jehoram tsü abi mülih Yangthsaba kangcho.

⁵¹Juda la Yangthsaba Jehoshafat yangthsathsaba kang dhüre-dhünyeh-u la, Ahab tsurü Ahazia tsü Israel la Yangthsaba kangcho ko abinü Samaria la kang anyüh yangthsa thsacho.

⁵²Abinü au Ahab, atpa Jezebel ko Israel münyi shitpahsohba Yangthsaba Jeroboam kyo, ABÜDONGBA nyüm amünyi shitpahcho.

⁵³Abinü au kyo, Baal tsingrang mübücho khu ABÜDONGBA, Israel Tsingrang rihlong alaa chürosohcho.