Read Sangtam Naga 1 YANGTHSARÜTI 3 Bible Online

1 YANGTHSARÜTI 3 - Sangtam Naga bible

1 YANGTHSARÜTI 3

¹Solomon-nü Ijip Yangthsaba tsulatpü te kuh kangnü abi te shükehtacho. Abinü Yangthsaba kuh, Amübükuh ko Jerusalem mükangmüla tbü, hiri müthüm-ede abükyü tsü David yangdi la linung norocho.

²ABÜDONGBA khyang amübükuh khüdu müthsaechonü, müyurütinü bholu müdüm papa adrong la kangmübü mübo licho.

³Solomon-nü ABÜDONGBA müicho ko au David athülaba bichicho, ta abinü kanglungrü kyüseh bholu papa la kangmübü mübo licho.

⁴Bekhyah khüdu abinü kangmübü jünung Gibeon lang wücho, tunüo anengkhong bholu tsü hütsüla licho. Atsichola abinü hütsüla trüp mübü thsihpili jüpü licho.

⁵Hütsü romang ABÜDONGBAnü amelang abi te tsingdhengcho, “Ihnü nü khyang tu jüsohnyüro?”

⁶Solomon-nü lalingcho, “Nühnü lede nü dikehrü, Iu David te Nü amüi ngusohcho ko Nü te yochonyi ko yuje cho chingkehta licho. Ko Nühnü amüthreba Nü amüi amülah khu azarü khüdu jücho ko chünye abi mülih abinü Yangthsa thsare.

⁷O ABÜDONGBA Tsingrang, Ih dhrezarü du ko yangthsathsanung mümüdhe nye, Nühnü Iu mülih Ih Yangthsaba kangsohko.

⁸Ih hila Nühnü Nüpu yo thsanung throchehba, mükhilongba müyurü yola lile.

⁹Hütsüeko, yuje la yangthsanung ko atsa amütsa müdhenung I khyang lümlong khülo. Mahkhang Ihnü khüta Nü müyurü hidoi michah akoh ngu yangthsathsanung?”

¹⁰Solomon-nü hi tsingdhengchonü ABÜDONGBA künyangcho,

¹¹achotsü Abinü abi te yocho, “Nühnü nüpu nengdang kutsüpba mahkhang alinung mahkhang nü rorüh süsohnung mahpü yuje la yangthsanung shulüm lümlong chingchonü,

¹²nühnü khyünyücho kyo Ihnü nguchinung. Akhudi sü chahsü mülicho ko mülinung, Ihnü nü khyang lümlong ko anyichehba alaa jünung.

¹³Ihnü nü khyang nühnü müchingchosü jünung: aparü Yangthsarü atümung tenü alaa nü akang ayung kuthsi ko adhichi linung.

¹⁴Ko nüu David roh-i nühnü I yochonyi I yuzeng ko amülaba yohpükhang, Ihnü nüh kutsüp lisohnung.”

¹⁵Solomon jesucho ko amelang abi te Tsingrangbanü chotakopü lümchehcho. Hütsüpü abinü Jerusalem lang wücho ko ABÜDONGBA Singdi bete yacho ko ABÜDONGBA khyang trüp mübü ko akehta mübü mübücho. Hütsüpü abinü abi pohki thsazirüti atümung khyang thsüti tüpcho.

¹⁶Nyümong khüdu nahtrahnaxenglarü anyüh ro Solomon bete yacho.

¹⁷Anyüh yola khüdunü yocho, “Adibong, khingkutpü hi ihjü kuh khüdu la lire ko abükyü hütsüla lide Ihnü azarü khüdu nümüsucho.

¹⁸I tsurü suropü nyümong anyüh lipü abükyü nüsü azarü khüdu nümüsucho. Kuh la tsü ihjü chah khu aparü süsü müle.

¹⁹Ko romang khüdu mümüdhepü abükyünü akhunga tsü niisehcho.

²⁰Hütsüpü abükyünü amala suro Ih yüpseh lide I tsurü tsü wüp tsicho ko asücho akhunga tsü I yüpji la yohpüjücho.

²¹Nyangnyü khüu Ih jesupü akhunga khyang nyikih tihnung dhengdelü, hütsü süpü licho. Ihnü longi dhengcho ko hütsü I tsurü müthsacho.”

²²Ta akhüuba khingkutpü tsünü yocho, “Mah! Akang liba tsü I tsurüe ko asüba tsü nü tsurüe.” Akhutpü tsünü lalingcho, “Mah! Asücho akhunga tsü nü tsurüe ko akang liba tsü I tsurü lile.” Hütsüta Yangthsaba bete tsünü anyüh tsü rehtacho.

²³Hütsüde Yangthsaba Solomon-nü yocho, “Nühjü dengnü akang liba akhunga tsü abükyü yo ko asüba tsü akhüu yoepü yore.”

²⁴Hütsüpü abinü nohsheng khüdu hirosohcho,

²⁵ko abinü yocho, “Akang liba akhunga tsü anyüh kang khasahng ko anyüding khyang pita jüng.”

²⁶Atpa khung tsünü abükyü tsurü nengdang amüinü jeng Yangthsaba te yocho, “Nüh adibong, yanglilüm akhunga tsü tükyüseh. Abükyü khyang jüng.” Ta akhüu tpünü yocho, “Ihjü sü khyangsü tüjü; anyüh kang khasahng.”

²⁷Hütsüde Solomon-nü yocho, “Akhunga tsü tükyüseh. Akhutpü khyang tsü jüng. Hütsü atpa khung tsü lile.”

²⁸Khode Israelrünü Solomon yukhacho tsü yuchicho, arüh atümungnü abi jengreng dro lümcho, tunüo khiyu athsalangnü khasohnung Tsingrangbanü lümlong jükopü arühnü müdhecho.