Read Sangtam Naga 1 YANGTHSARÜTI 7 Bible Online

1 YANGTHSARÜTI 7 - Sangtam Naga bible

1 YANGTHSARÜTI 7

¹Solomon-nü apu nengdangsü kang dhüre-asang khyo kuh khüdu thsacho.

²Lebanon mürong ko dsiba Kuh tsü ashenglang khehap thsih khüdu, adilang khehap dhünyang, ko athsenglang khehap sangre licho, cedar dongdi chung khüdu la dhüre münga-nganü chung asang ko hütsüri michah singnü abishücho.

³Drexang tsü cedar singnü fümükhüm chii dongdi khyüm külüpcho.

⁴Anyüdinglang züdi la tsü nyübongkhi chung asang-sang yohcho.

⁵Trahtri ko nyübongkhi tsü jongnah müyü thricho ko Anyüdinglang nyübongkhi chung asang-sang tsü arüh deta külüpcho.

⁶Dongdi amüzalang tsü ashenglang khehap dünyang ko adilang khehap sangre licho. Dongdinü khyüm-mülapü kukhüm khüdu külüpcho.

⁷Yangthsarü pümji chongsah, yukha pümji khüde Solomon-nü khiyu khacho, hütsüsü alih lanü abishü chii cedar sing dunü chongcho.

⁸Solomon apu linung kuh khanglang tsü hütsü akyokyo kuh apasü thsacho. Abinü anitpü Ijip Yangthsaba tsulatpü khyangsü hütsü akyokyo kuh thsajücho.

⁹Kuh hiri apüm ko yukha kuh arangcheh tsü akhengdi lanü amungthriba chii atsauba lungnü thsacho. Lungkhahji lanü lung tsü apümlang müjang xachehcho.

¹⁰Akhengdi thsanung lung tsü lunghamji lanü khürü ashenglang khehap keh ko dhüre hamchehcho.

¹¹Hütsüri michah tsü lung apa ko cedar sing akhengji licho.

¹²Yangthsaba kuh, Amübükuh ayonglangba chongsah ko Amübükuh la azüduji chongsah tsü ahamchehcho lung chung asang müipi cedar sing akhengji khüdu yoh külüpcho züdi licho.

¹³Yangthsaba Solomon-nü imüyeng kengba nguchi la axangcheh, Tyre yangdi la liba Huram dsinung müthehcho.

¹⁴Au asu, sü imüyeng nguchi la axangchehrü licho, abisü Tyre lanü licho; ko atpa tsü Naftali hung lanü licho. Huram tsü athsehthsa ko axangcheh licho. Abinü imüyeng nguchi apüm dhengyehnung Solomon-nü dsiba tsü khyüchocho.

¹⁵Huramnü imüyengnü dongdi anyüh athsenglang khehap dhüre-keh ko adilang khehap dhüre-anyüh külüpcho ko Amübükuh trahtri la khyümcho.

¹⁶Abinü dongdi müle chah kehnungsü imüyengnü yahthri anyüh athsenglang khehap münga külüpcho.

¹⁷Dongdi anyüh bemong chah tsü ixilihnü chingkehta sehyah külüpcho,

¹⁸ko imüyengnü tsanümsih chung anyüh külüpcho.

¹⁹Dongdi bemi la yohba yahthri tsü lurü yungpi kyo athsenglang khehap müyü,

²⁰ko ixilih kyo mükang liba michah tsü müdongcho. Yahthri müipi chah chung anyüh la tsü tsanümsih thsih anyüh licho.

²¹Huramnü imüyeng dongdi anyüh tsü Amübükuh trahtri la tsü khyümcho: kihjing lahpi dongdi te Jakin ko kihku lahpi dongdi te Boaz dsicho.

²²Lurü yungpi imüyengnü thriba yungpi tsü dongdi bemi chah tsü yohpücho. Hütsüta dongdi chah anguchinung tsü rungnümcho.

²³Huramnü imüyengnü kihkong khüdu asohlang khehap münga, achehlang khehap dhüre, ko arümlang khehap sangre külüpcho.

²⁴Kihkong bekhüm bemi chah tsü imüyengnü külüpcho shünga chung anyünü khüdu kang kihkong chah tsü shükehsohcho.

²⁵Kihkong tsü imüyeng misüpung dhüre-anyüh asang-sang khang pitapü yaba khangtung chah müdongkehcho.

²⁶Kihkong achehlang tsü kuthrung asang thsacho. Hütsü shing bemi kyo ko lurü yungpi mülongchicho roh-i dongkhulang müyangchehcho licho. Hiba kihkong la tsü liter hajar yüre o züducho.

²⁷Huramnü misü kari imüyengnü ashenglang khehap müyü, adilang khehap müyü, ko athsenglang khehap asang dhüre külüpcho.

²⁸Arüh tsü müyüdinglang sako

²⁹ko abekhüm chah tsü kihkhünying, misüpung ko Cherubim aqo kehba kanglungrü yohnü külüp-pü khümticho; ko akhümticho chah tsü kihkhünying ko misüpung üde tsü ko apohki ko athahlang tsü yungpi mükang yohcho.

³⁰Misü kari müipi tsü imüyengnü külüpcho ajing müyü ko angusing adong licho. Jongnah müyüdinglang mütpah-tbhü nengdang adong licho; adongti tsü yungpi müking yohcho.

³¹Mütpah-tbhü michah tsü mükangmüla abe khüm licho. Misü kari michah tsünü khehüp khüdu dhimüsu, ko khehap khüdu pü achangsho ayonglang züdusoh külüpcho. Hütsü mükang ayah tühkeh külüpcho.

³²Ajing tsü athsenglang khehap khüdupü achangsho ko arüh tsü akhyangcho pohki licho ko hütsüla angusing mübhilangnü khüdu-khüdu kehjungcho.

³³Ajing tsü kuri kari jing kyo licho; angusing, fühbhi, ajingtung ko angusing lahtising apüm tsü imüyengnü külüpcho.

³⁴Misü kari müipi tsü ajongnah müipi pohki adong müyüyü licho.

³⁵Kari müipi athahlang mükang tsü kuthrung dükunü müshüti lile ko kari te tsü khüdu du kang athüji ko akhümticho licho.

³⁶Adong ko athüyehji apüm tsü Cherubim qo kehba kanglungrü kihkhünying ko sedong yahthri yoh külüp licho.

³⁷Hütsüta misü kari tsü külüpcho, arüh apüm thrizi licho.

³⁸Huramnü misü kari müipi nengdang mütpah-tbhü dhüre külüpcho. Mütpah-tbhü müipi tsü adilang khehap müyü ko liter 800 züducho.

³⁹Abinü Amübükuh kihjing lahpi misü kari münga ko münga tsü kihku lahpi yohpücho; ko abinü kihkong tsülü kihjing-nyüchüro lahpi yohpücho.

⁴⁰Huram nü füh, michüthsohlung ko mütpah-tbhüsü külüpcho. Abinü Yangthsaba Solomon khyang Amübükuh nengdang abi nguchi apüm thümcho. Abinü külüpchoti tsü: Dongdi anyüh Dongdi müle chah tbhü kyoba yungpi anyüh Yungpi anyüh chingkehtasohba ixilih Yungpi anyüh chah thsih-thsihnü chung anyüh imüyengnü tsanümsih thsih müyü Misü kari dhüre Mütpah-tbhü dhüre Kihkong khüdu Kihkong thüyehba misüpung dhüre-anyüh Füh, michüthsohlung ko mütpah-tbhü. Huramnü Solomon khyang Amübükuh nengdang külüpba kohro apüm tsü imüyeng asehcho du thsacho.

⁴¹

⁴²

⁴³

⁴⁴

⁴⁵

⁴⁶Hiri apüm tsü Yangthsabanü Jordan Ngah la Sukot e Zarethan nyüh kahla idhse müluji lanü mülusohcho.

⁴⁷Solomon-nü hiri imüyengnü külüpcho kohro tsü müho-dhengsohcho, tunüo hütsüri drongracho, hütsünü amülinglang tsülü mümüdhecho.

⁴⁸Solomon-nü Amübükuh la tsü hon-nü hiri tsü külüp yohpücho: bholu, amübü kehpüji tsingthsang,

⁴⁹Amüsauba chongsah bete yohpüba dsimüdongsing dhüre-münga kihjing lahpi ko kihku lahpi münga; yungpi, dsi ko amüjüpsing;

⁵⁰shing, mitru pehji, mütpah-tbhü, müchiji nengdang tbhü ko michüh yohji füh; ko Amüsauba chongsah arehchiji ko Amübükuh dongkhu arehchiji. Hiri apüm hon dunü külüpcho.

⁵¹Khode Yangthsaba Solomon-nü Amübükuh la nguchi hiri apüm thümcho, abinü amübükuh azahkehji la au Davidnü ABÜDONGBA khyang müsachehjücho hon, taripi ko apa kohroti hiro yohpücho.