Read Sangtam Naga 1 YANGTHSARÜTI 9 Bible Online

1 YANGTHSARÜTI 9 - Sangtam Naga bible

1 YANGTHSARÜTI 9

¹Yangthsaba Solomon-nü Amübükuh ko Yangthsaba kuh ko abinü thsanyücho apüm thümpü,

²Gibeon la kyo ABÜDONGBAnü Solomon te anyüpiu chüro shirücho.

³ABÜDONGBAnü abi te yocho, “Ihnü nü dangkhidangnang yuchiko. Ko lede Ih mübünung nengdang nühnü thsaba Amübükuh tsü Ihnü müsachehjüko. Ihnü hütsü lede dhengyehnung ko tsungtinung.

⁴Nüu David kyo nühnü yuje cho Ih dikehkhang ko nühnü I yuzeng ko amülaba apüm bichikhang,

⁵Ihnü nüu David te abi trahnü lede Israel la yangthsanungepü nyengchoba tsü Ihnü yohpünung.

⁶Ta nüh ko nü trahnü I khanglang mürokhang, nührünü I yuzeng ko amülaba mübichikhang ko aparü tsingrang mübükhang,

⁷Ihnü jüba lih la tsünü Ihnü I müyurü Israelrü khyümüipehnung. Ko I mübüji thsanung Ihnü müsachehba Amübükuh hi mii Ihnü pehjünung. Limirünü Israelrü mülangjo chonung ko mütsa bichinung.

⁸Hiba Amübükuh hi trümnah khülunung ko alahkhurü atümung nehnü nyeka yonung, ‘Tuepü ABÜDONGBAnü hiba lih ko hiba Amübükuh chah hita nguchicho?’

⁹Hütsüde nyitsarütinü lalingnung, ‘Ijip lanü nüchehba arüh jümürü Tsingrang ABÜDONGBA, arühnü thrüchahchüpehchonü hita tikehko. Arühnü apa tsingrangti mübücho, hütsü khu ABÜDONGBAnü arüh michah hiba achangba hirojücho.’ ”

¹⁰Solomon-nü Amübükuh ko Yangthsaba kuh thsanung kang mükyü khyücho.

¹¹Tyre la Yangthsaba Hiramnü cedar sing, kee sing ko hon apüm chixicho. Hütsü rungnümpü, Solomon-nü Galil mükyah lanü Hiram khyang yangdi mükyü jücho.

¹²Hiramnü hütsüri dhengnung wücho ta abinü hütsüri mükhyünyücho.

¹³Achotsü abinü Solomon te yocho, “Anirü, nühnü I khyang jüba yangditi tsü hiri mah-o?” Hütsünü, hütsüba mükyah te “Kebal” dsicho, adüzü, amii müliba lih.

¹⁴Hiramnü Solomon khyang hon süreh hajar müyü chah alaa mühehcho.

¹⁵Yangthsaba Solomon-nü Amübükuh, Yangthsaba kuh, yangdi nyüchürolang alih sühnung ko yangdi tbü külüpnung la hehnehthsarü khyücho. Abinü Hazor, Megido ko Gezer yangditi külüpnung nyükheh tsü bichicho.

¹⁶(Ijip Yangthsabanü Gezer yangdi tsü mahnü hütsüla lirüti kyüsehcho ko kuh tahjo yangdi tsü mahchehcho. Hütsüpü atsulatpü Solomon te kukangde hütsü atsulatpü khyang jiyüthsa jücho,

¹⁷ko hütsü Solomon-nü thsachicho.) Abi müyurü nyükheh bichi, Solomon-nü Ajinglangba Beth Horon,

¹⁸Balat ko Juda akungaselih liba Tamar,

¹⁹abi tsuyongba khyübülungji yangditi, kuri ko kuri kari yangditi ko Jerusalem, Lebanon ko abi yanglih masü la abi thsanyücho apüm la thsacho.

²⁰Abi pohki hehnehthsarüti, Israelrünü arüh lih mahchehde mükyüsehba Kananrü hung bichicho. Arüh tsü: Amor-rü, Hit-rü, Perizrü, Hivrü ko Jebusrü, hiri tsü ade yingcheh arüh yurü kang bichire.

²²Solomon-nü Israelrülü ayurü mükangsoh; arüh tsü rothsarü, adirü, anüchirü, kuri kari anürü ko kuri nüchinung la bichicho.

²³Solomon kuthsaba papa la hehnehthsarüti dhengyehrü adirü 550 licho.

²⁴Solomon-nü yangdi nyüchürolang alih tsü, anitpü, Ijip Yangthsaba tsulatpü tsü David yangdi lanü Solomon-nü abükyü nengdang thsajüba kuhla tsü züdupü khanglang du sühnung dikehcho.

²⁵Solomon-nü ABÜDONGBA khyang külüpjüba bholu chah tsü kang la asangpi trüp mübü ko akehta mübü mübücho. Abinü ABÜDONGBA khyang müchijisü trüpcho. Hütsüta abinü Amübükuh tsü rungnümcho.

²⁶Yangthsaba Solomon-nü Edom lih la, Amohkih bekhüm la, Ela münyeh Eziongeber la khata kihkuh külüpcho.

²⁷Yangthsaba Hiramnü Solomon nyitsarü trosohnung abi kihkuh la axangchehrü khürü müthehcho.

²⁸Arühnü Ofir lih lang kih lanü wücho ko Solomon khyang hon süreh hajar dhüre-müyü chah keh hirojücho.