Read Sangtam Naga 2 YANGTHSARÜTI 1 Bible Online

2 YANGTHSARÜTI 1 - Sangtam Naga bible

2 YANGTHSARÜTI 1

¹Israel Yangthsaba Ahab süpü khanglang, Moabrünü Israel nyüm shemüsucho.

²Israel Yangthsaba Ahazia Samaria la abi kuh lanü shohjo dee khee lerohpehcho. Achotsü abi kyangnung mükyangnung tsingdhengnung, Ekron la Filistin yangdi tsingrang Baalzebub yang yuhirü khürü müthehcho.

³Ta ABÜDONGBA ninglang riwürü khüdunü Tishbe lanü Azikehrü Elija te wünü Ahazia yuhirü te hita yonung müthehcho, “Tuepü Ekron tsingrang, Baalzebub te tsingdhengnung würo? Israel la Tsingrang müle pü nührünü lümrü mah-o?

⁴ABÜDONGBAnü hita yorepü Yangthsaba te young, ‘Nüh thsakehba lanü mükyangnung; nüh sünung!’ ” ABÜDONGBAnü yocho kyo Elijanü nguchicho,

⁵ko yuhirü tsü Yangthsaba yang thalicho. Abinü tsingdhengcho, “Tuepü thali rocho?”

⁶Arühnü lalingcho, “Nyüh khüdunü ihrü shirücho ko abinü thali ro nü te ABÜDONGBAnü hita yoreding pü yocho, ‘Tuepü Ekron tsingrang Baalzebub te tsingdhengnung yuhirü müthehcho? Israel la Tsingrang müle pü lümrü mah-o? Nüh mükyangnung; Nüh sünung!’ ”

⁷Yangthsabanü tsingdhengcho, “Nyitsarüba tsü tu kyoro?”

⁸Arühnü lalingcho, “Abi tsü kanglungrü küpnü külüpcho fükhüm khümle ko shuküp rungrümnü thsingle.” Yangthsabanü yocho, “Hütsü Elijae!”

⁹Hütsüpü Elija noronung abinü abi pohki thsazirüti nyüh dhünyang müthehcho. Arühnü abi akhang khüdu chah püm ngu abi te yocho, “Tsingrangba nyitsarü, Yangthsabanü nüh dsile.”

¹⁰Elijanü lalingcho, “Ih Tsingrangba nyitsarü thsakhang, ninglangnü michang jürung ko nüh ko nü nyitsarüti süsohng!” Hütsüde tsünü michang jüro abi ko abi nyitsarüti trüpsehcho.

¹¹Yangthsabanü nyüh dhünyang nüpü adirü aparü khüdu müthehcho ko arühnü küdu Elija te yocho, “Tsingrangba nyitsarü, Yangthsabanü nüh ade tsatsa jürungle!”

¹²Elijanü lalingcho, “Ih Tsingrangba nyitsarü thsakhang, ninglangnü michang jüro nüh ko nü nyitsarü trüpsehng!” Hütsütade tsünü ninglangnü michang jüro abi ko anyitsarüti trüpsehcho.

¹³Adesü Yangthsabanü nyüh dhünyang nüpü adirü khüdu müthehcho. Abinü küducho, Elija jingte mükhukehcho ko kihchicho, “Tsingrangba nyitsarü, Ih ko I nyitsarü chah yanglilüm. Ihrü tüsüsoh!

¹⁴Aparü adirü anyüh ko anyüh mono ninglangnü michang jüro trüpsehko; ta yanglilüm I te chomang!”

¹⁵ABÜDONGBA ninglang riwüba tsünü Elija te yocho, “Abi yola jowüng ko tu tüdrü.”

¹⁶Achotsü Elijanü adiba yola tsü Yangthsaba yang jowücho ko abi te yocho, “ABÜDONGBAnü hita yore: ‘Israel la Tsingrang mülirü roh-i, nühnü Ekron tsingrang, Baalzebub te kihtanung yuhirü müthehchonü, nüh mükyangnung; nüh sünung!’ ”

¹⁷ABÜDONGBAnü Elija te yocho kyo, Ahazia sücho. Ahazia atsurü mülichonü, Juda Yangthsaba Jehoshafat tsurü Jehoram yangthsathsaba anyüu kang abi ani Joram tsü abi mülih Yangthsaba kangcho.

¹⁸Ahazianü nguchicho apüm tsü Israel Yangthsarü Yukheh vakha la thrahyoh lile.