Read Sangtam Naga 2 YANGTHSARÜTI 10 Bible Online

2 YANGTHSARÜTI 10 - Sangtam Naga bible

2 YANGTHSARÜTI 10

¹Samaria yangdi la Yangthsaba Ahab chahnü trahchocho arüh nyühre licho. Jehunü vathrah khüdu thrahpü yangdi la athsarüti ko Ahab shümtsurüti adhengyehrü apüm yanglang mühehcho. Vathrah la tsü hita zehcho:

²“Nührü Yangthsaba chahnü trahchocho axükümrü ko nührü khehla kuri, kari, thsunohrü ko atbüticho yangdi lile. Hütsüeko ade,

³nührünü vathrah hi nguyeng, Yangthsaba tsurüti yola tsünü adekhenguba throchehng ko au pümji khüm khataang.”

⁴Samaria la Yangthsarüti drümüyangcho. Arühnü yocho, “Yangthsaba Joram mahkhang Yangthsaba Ahazianüsü mükohkhang, ihrünü khüta Jehu nyüm yanung?”

⁵Achotsü Yangthsaba kuh xükümrü, yangdi xükümrü, thsazirüti ko adhengyehrüti arüh apüm müjangpü Jehu yang yusi hi jücho: “Ihrü nü dikehrüti lile ko nühnü tu yonang ihrünü nguchinung. Ta ihrünü Yangthsaba süsü müthrochehnung; nühnü tsalecho nguching.”

⁶Jehunü anyüpiu arüh yang vathrah khüdu thrahcho: “Nührü I yola zehlekhang ko I yuzeng bichiekhang, atu hitade Jezrel lang Yangthsaba Ahab tsuzarüti thah I yanglang hirung.” Yangthsaba Ahab tsuzarüti arüh nyühre tsü Samaria la azirütinü xüküm kangcheh yacho.

⁷Khode Jehu vathrah ngucho, Samaria la azirütinü arüh nyühre tsü kyüsehcho, arüh thah tsü loh khüdu la yohcho ko Jehu khyang Jezrel yang müthehcho.

⁸Khode Ahab tsuzarüti thah tsü hiro chihcho Jehu te yocho, abinü yangdi tbükhüm te müdüm anyüh la khangpüpü nyangnyü khüu yingcheh yohpünung yuzeng jücho.

⁹Anyangnyü tsü, abinü tbükhüm lang wü hütsüla lirü te yocho, “Yangthsaba Joram nyüm rah külüpba ko kyüsehba tsü Ih lile; hütsü nührü bha mah. Ta sünü hiri apüm kyüsehcho?

¹⁰Hi khu ABÜDONGBAnü Ahab tsurüti chah atikehnung yoba tsü yuje tikehrepü müdhere. ABÜDONGBAnü azikehrü Elija khu choyohcho apüm nguchiko.”

¹¹Hütsüpü Jehunü Jezrel la Ahab tsutpurü, abi pohki thsazirüti, abi shangrüti ko bebürüti apüm, süsü münyingpü süsohcho.

¹²Jehunü Samaria lang wünung Jezrel pehjücho. Lang la “San nyahrü kuh” ko dsiba müdüm la tsü,

¹³abinü Judarü Yangthsaba Ahaziarü tsutpurü khürü shiro arüh te yocho, “Nührü sürüo?” Arühnü yocho, “Ahaziarü tsutpurüe! Ihrü Jezrel lang yangthsalatpü Jezebel tsurüti ko Yangthsaba kukhi nengdang meshünung würe.”

¹⁴Jehunü abi nyitsarüti te yocho, “Arüh akangnü rang!” Arühnü arüh tsü rangcho ko abinü hütsüla shukuh khüdu te arüh süsohcho. Arüh atümungnü yürepü anyüh thsacho ko arüh süsü münyingpü süsohcho.

¹⁵Jehunü adesü shemüsu wücho ko abi lang la Rekab tsurü Jonadab shirücho. Jehunü abi te salümthsa yocho, “Ihjü alümcho khüdu du. Nühnü Ih tronung mah-o?” Jonadabnü yocho, “Ihnü tronung” Jehunü yocho, “Khang, nü kheh I khyang jüng. Anyünü kheh marehtacho ko Jehunü abi kuri kari lang no küdu yocho,

¹⁶I yola rung ko I ABÜDONGBA te khüta kehta liro hütsü dheng!” Hütsüta anyünü Samaria lang müjang wücho.

¹⁷Khode arühnü hütsü chihcho, Jehunü hütsüla Ahab tsurü khüdusü münyingpü kyüsehcho. Hi ABÜDONGBAnü atikehnung Elija te yoba tsü lile.

¹⁸Jehunü Samariarü müjang dsibülung yocho, “Yangthsaba Ahabnü Baal tsingrang thridu dikehko, ta Ihnü dee alanü abi dikehnung.

¹⁹Baal azikehrüti apüm, abi mübürüti apüm ko abi bebürüti apüm dsimükhong. Süsü tüpehjü; Ihnü Baal khyang thsüti arangcheh jünung ko sü müzehnang abilü süsohnung.” (Hi Jehunü Baal mübürüti apüm süsohnung rah külüpcho.)

²⁰Hütsüpü Jehunü yuzeng jücho, “Baal nengla abi mübünung nyümong khüdu throchehng.”

²¹Nyümong tsü throchehcho ko hütsü Jehunü Israel apümlang yuva jücho. Baal mübürü apüm rocho; khüdusü müropü mülicho. Arüh apüm Baal amübükuh la züducho, jongnah khüulangnü-khüulang chii jengcho.

²²Hütsüpü Jehunü Amüsa bongri-fükhüm müshorü bebürü te fükhüm tsü khyücheh mübürüti khyang jünung yuzeng jücho.

²³Hütsüpü, Jehu apu mii amübükuh la tsü Rekab tsurü Jonadab yola züducho ko hütsüla müyurü te yocho, “Hila Baal mübürüti chah khu ABÜDONGBA mübürüti süsü tüzürosoh.”

²⁴Hütsüpü abi ko Jonadab nyüh Baal khyang kangmübü ko trüp mübü mübünung züducho. Abinü amübükuh dongkhu lang tsü nyitsarü qure te hita thülapü yasohcho: “Nührünü nyitsarü hiri apüm kyüsehng; sünü khüdu dusü tsisohnang, apu akang khyünung!”

²⁵Jehunü amübü tsü jüyeng, abinü anyahrü ko thsazirüti te yocho, “Züdung ko arüh apüm kyüsehng; khüdusü tütsichehsoh!” Arühnü nohsheng bipü züdu arüh apüm kyüsehcho ko arüh me tsü tphahcheh hichürocho. Hütsüpü arühnü amübükuh ayonglangba chii züducho,

²⁶ko hütsüla liba amüsa dongdi tsü hichüro trüp-pehcho.

²⁷Hütsüta arühnü amüsa dongdi ko amübükuh tsü thsangnyangcho ko hütsü pehyahji kangsohcho, hütsü ade yingcheh lile.

²⁸Hütsüta Jehunü Baal mübüba Israel lanü wohpehcho.

²⁹Ta abinü Yangthsaba Jeroboam kyo, Bethel ko Dan la hon-nü misüpung-za külüp mübonü Israelrü amünyi shitpahsohcho.

³⁰ABÜDONGBAnü Jehu te yocho, “Nühnü Ahab tsurüti chah Ihnü nguchisohnyücho apüm nguchiko. Hütsüeko, nü shümtsurünü Israel la shang müyü chii yangthsa thsanung Ihnü nyengchore.”

³¹Ta Jehunü, Israel Tsingrang, ABÜDONGBA yuzeng alasih apümnü mübichipü, Israel münyi shitpahsohba Jeroboam kyo, abinü nguchicho.

³²Hütsütade ABÜDONGBAnü Israel lih azauba kangsohcho. Syria Yangthsaba Hazaelnü Israel lih apüm

³³Jordan nyüchürolang, hütsü lanü Arnon Yongkhi te kihjinglang Aroer yang chii, hila Gad, Reuben ko Manase nyüchürolang liba Gilead ko Bashan lih zeh mahcho.

³⁴Jehunü nguchicho lüpcho, abi akurah nguchi zeh, Israel Yangthsarüti Yukheh la thrah lile.

³⁵Abi sücho ko Samaria la dhrürangcho ko atsurü Jehoaz tsü Samaria la kang mükyüpü keh yangthsa thsacho.

³⁶Jihunü Israel Yangthsaba thsa Samaria la kang mükyüpü keh yangthsacho.