Read Sangtam Naga 2 YANGTHSARÜTI 11 Bible Online

2 YANGTHSARÜTI 11 - Sangtam Naga bible

2 YANGTHSARÜTI 11

¹Yangthsaba Ahazia atpa Athalianü atsurü kyüsehcho yuchiyeng, Yangthsarü kukhi la liba khiyoh apüm kyüsehnung abükyünü yuzeng jücho.

²Ahazia tsurü Joash du tsicheh tsicho. Abisü aparü yola tsü kyüsehnung thsacho, ta Yangthsaba Jehoram tsulatpü ko Ahazia atpa khüdu chahnü atpa azatpü Jehoshebanü abi khümchocho. Abi mükyüsehsohnung abükyünü abi nowü amübükuh la chongnong pohki Athalia rang yohpücho.

³Athalia yangthsathsa ayung, kang dhüroh Jehoshebanü azaba tsü rüku amübükuh la rang yohpücho.

⁴Ta kang dhünyeh-u la, bebüba Jehoiadanü yangthsarü anyahrü anüchiba ko yangthsaba kuhla anyahrüti te amübükuh lang ronung yocho. Ko abi lümchung nguchinung nyengcho yuchümsohcho.

⁵Abinü arüh te Yangthsaba tsurü Joash tsü ngusohcho ko yuzeng hi jücho: “Khode nührü Sabath nyümong nguchinung ronang, nührü nohlüm asang la khüdunü Yangthsaba kuh nyahng;

⁶changsho khüdunü Sur tbükhüm nyahnung ko mülung khüdu tsünü trahtri la tsü aparü anyahrü khanglang tsü nyahng.

⁷Ko Sabath nyümong nguchi thümrü mülung anyünü Amübükuh la Yangthsaba nyahnung.

⁸Nührünü Yangthsaba Joash tsü nohsheng bipü nyahng ko abi khüde wonang abi te lieng. Sü nührü amünyeh ronang abilü süsohng.”

⁹Anüchirüti tsünü Jehoiada thülaba nyicho ko abi yanglang arüh nyitsarüti Sabath nyümong nguchi thüm tsirü ko nguchinung würüti tsü norocho.

¹⁰Abinü anüchirüti khyang tsü Yangthsaba David yo Amübükuh la yohpüba thsunohrü ko tsung jücho,

¹¹Yangthsaba tsungtinung abinü amübükuh mükang nohsheng bipü anyahrü yohpücho.

¹²Hütsüpü Jehoiadanü Joash nochüro athah la kuthri thrijücho ko abi khyang yangthsathsanung nengdang yuzeng tsü jücho. Hütsüta Joash tsü müyühjo Yangthsaba kangsohcho. Müyurünü kheh tang züde yocho, “Yangthsaba kutsüp lieng!”

¹³Yangthsalatpü Athalianü anyahrü ko müyurünü züdeba yuva tsü yuchi, abükyünü amülung shibülung liba Amübükuh lang tsü shang wücho.

¹⁴Hütsüla ayah roh-i, Amübükuh trahtri dongdi te Yangthsaba asi tsü ya ngucho. Abi tsü thsazirüti ko rühti mehrünü mükangtipü ko müyurünü akünyangchonü khong ko rühti meh licho. Athalianü awahchonü ajengki rehnah züdecho, “Akihyochürü! Akihyochürü!”

¹⁵Jehoiadanü Amübükuh shündhün-nü Athalia mükyüsehsohnyücho, achotsü abinü rothsarü thsazirüti te yuzeng jücho: “Abükyü tsü anyahrü chung longla tsünü nochüdung ko sünü abükyü khümchonung müküpnang abi tsü kyüsehng.”

¹⁶Arühnü abükyü tsü rangcho, yangthsaba kuh lang nowücho ko hütsüla Kuri Tbükhüm la arühnü abükyü tsü kyüsehcho.

¹⁷Bebüba Jehoiadanü Yangthsaba Joash ko müyurüti khyang, arüh tsü ABÜDONGBA müyurü thsanungepü azengchotaba külüpsohcho; abinü Yangthsaba ko müyurü kahlasü azengchotaba külüpsohcho.

¹⁸Hütsüpü müyurünü Baal amübükuh lang wücho ko hütsü tphünahcho; arühnü bholu ko kyothri tsü mapnahjücho ko Baal bebüba Mattan tsü bholu betenü mapsehcho. Jehoiadanü Amübükuh te anyahrü yohpücho,

¹⁹hütsüpü, abi, thsazirüti, yangthsarü nyahrüti ko Yangthsaba kuh nyahrütinü Yangthsaba tsü Amübükuh lanü Yangthsaba kuh lang nowücho ko müyurünü iiwücho. Joashnü Anyahrü Tbükhüm khu züducho ko Yangthsaba pümji la tsü pümcho.

²⁰Yangthsaba kuh lanü adelü Athalia kyüseh pehchonü, müyurü apüm akünyangnü jengcho ko yangdi tsü naying licho.

²¹Joash yangthsanung dikehde abi kang dhünyeh thsacho.