Read Sangtam Naga 2 YANGTHSARÜTI 12 Bible Online

2 YANGTHSARÜTI 12 - Sangtam Naga bible

2 YANGTHSARÜTI 12

¹Israel la Yangthsaba Jehu yangthsathsaba kang dhünyeh-u la, Juda la Joash Yangthsaba kangcho ko abinü Jerusalem la kang yüre yangthsacho. Atpa tsü Bersheba yangdi lanü Zibia licho.

²Joash akangli ayung abinü ABÜDONGBAnü künyangnung thsa nguchicho, tunüo bebüba Jehoiadanü abi thüla nüchehcho.

³Ta, müyudsirü müdümtilü müthsangnyangjücho ko müyurünü mütozah hütsüri la kangmübü jücho ko müchiji tahcho.

⁴Joashnü bebürüti dsiro yocho, “Amübükuh lang hiroba mübüthsi lede jüba amübü thsi thsanye, amüküp amübü thsi thsanye apüm rikieng.”

⁵Bebürü müipinü palunü dikehcho la rocho palunü khyübülungnung ko thsi tsü Amübükuh külüpchiba la pehnung yocho.

⁶Ta Joash yangthsacho kang mükyüpü asang yingcheh, bebürütinü Amübükuh tu mükülüpchicho.

⁷Achotsü abinü Jehoiada ko aparü bebürüti dsi arüh te tsingdhengcho, “Tuepü Amübükuh mükülüpchiro? Ade tinü nührünü khyüchocho thsi tsü nührünü müyohpünung; hütsü kuh külüpchinung nengdang thsi tsü jüng.”

⁸Bebürütinü thsi tsü jünung ko kuh tsü arühnü müthsachinung nyengchocho.

⁹Hütsüpü Jehoiadanü Singdi khüdu hirocho, ahaptising la tsü akhi külüpcho ko amübükuh la züdude tsalangthring bholu te yohpücho. Trahtri la yaba bebübanü mübünung rorünü jüba thsi apüm tsü singdi la tsü yohcho.

¹⁰Khode singdi tsü jengnang, Yangthsaba kuhla athrahba ko amungthriba bebüba anyüh ro thsi tsü khipü shibha la rahpü thsingti yohpücho.

¹¹Hütsü khütoinang thrahyoh yohpüpü, thsi tsü amübükuh nguchiba adhengyehba khyang jücho,

¹²ko hütsü mistri, athsarü, lung maprü, lung hamchehrü kuh thsachiba la khyünung singtpah ko lung lihcho ko apa thsütahti apüm nengdang pehcho.

¹³Ta hütsüba thsi lanü taripi shing, mütpah-tbhü, rühti mahkhang dsi mahkhang taripi ko hon kohro tusü mülihcho.

¹⁴Hütsü anguchirü khyang ko kohro lihcho la du pehcho.

¹⁵Nguchi dhengyehrüti tsü dee yuje chorü du thsacho tsü, thsi arocho ko apehcho hümnung tu thsütah mülicho.

¹⁶Sahliba amübü ko münyi mübü la rocho tsülü singdi la müyohcho; tunüo hütsü bebürü yo licho.

¹⁷Hütsütade Syria Yangthsaba Hazaelnü Gath yangdi mahcho ko hütsü kohchehcho; hütsüpü abinü Jerusalem mahnung dhrongcho.

¹⁸Hütsüde, Juda Yangthsaba Joashnü abi belangrü Jehoshafat, Jehoram ko Ahaziarünü ABÜDONGBA khyang müsachehjücho apüm ko hütsüla apu amübüsü yohpü ko Amübükuh la licho hon kuthsi apüm khyo Yangthsaba Hazael khyang jiyü thsa mühehcho, hütsüpü du abinü Jerusalem lanü abi rothsarü nükhucho.

¹⁹Yangthsaba Joashnü nguchicho lüpcho tsü Juda Yangthsarü Yukheh la thrahyoh lile.

²⁰Ko Yangthsaba Joash pohki adirütinü abi nyüm rah külüpcho ko Shimeath tsurü Jozakar ko Shomer tsurü Jehozabad nyühnü, Silla lang jowüba lang la, Jerusalem nyüchürolang alih sühpü thsaba kuhla tsünü abi mapsehcho.

²¹Joash tsü David yangdi la yangthsarü kongla dhrürangcho ko atsurü Amazia tsü abi mülih Yangthsaba kangcho.