Read Sangtam Naga 2 YANGTHSARÜTI 13 Bible Online

2 YANGTHSARÜTI 13 - Sangtam Naga bible

2 YANGTHSARÜTI 13

¹Juda la Ahazia tsurü Joashnü yangthsathsaba kang mükyüpü asangu la, Israel la Jehu tsurü Jehoahaz tsü Yangthsaba kangcho, ko abinü Samaria la kang dhüre-dhünyeh yangthsa thsacho.

²Abi müngu Yangthsaba Jeroboam kyo abinü ABÜDONGBA nyüm abinü amünyi shitpahcho ko Israelrü amünyi shitpahsohcho; abinü amütsa lang tsü khodesü müpehjücho.

³Hütsünü Israel te ABÜDONGBA zichürocho ko abinü Syria Yangthsaba Hazael ko atsurü Benhadad nyüh khyang bekhyah mükhu Israel kohsohcho.

⁴Hütsüde Jehoahaznü ABÜDONGBA te dangkhidangnangcho ko Syria Yangthsabanü Israelrü dee mütsa bichicho ngu, ABÜDONGBAnü abi dangkhidangnang lalingcho.

⁵ABÜDONGBAnü Israel khyang langnürü khüdu müthehcho ko abinü arüh Syriarü kheh lanü khümchocho ko akhulang kyo arüh yangtsa la licho.

⁶Ta arühnü Yangthsaba Jeroboamnü amünyi la nüba tsü müpehjüpü mütozah amünyi shitpahcho; ko Ashera tsingranglatpü kyothri Samaria la licho.

⁷Jehoahaz ko kuri rothsarü dhünyang, kuri kari dhüre ko alih rothsarü hajar dhüre chah khu apa rothsarü nying mülicho, tunüo Syria Yangthsabanü apa tsülü asongsong kang changjücho.

⁸Jehoahaznü nguchicho lüpcho ko abi kurahcho apüm Israel yangthsarü Yukheh la thrahyoh lile.

⁹Abi sücho ko Samaria la dhrürangcho ko abi tsurü Jehoash tsü abi mülih Yangthsaba kangcho.

¹⁰Juda la Yangthsaba Joash yangthsathsaba kang sangrepü dhünyeh-u la, Israel la Jehoahaz tsurü Jehoash tsü Yangthsaba kangcho ko abinü Samaria la kang dhüre-dhüroh yangthsacho.

¹¹Abinüsü ABÜDONGBA nyüm amünyi shitpahcho ko Jeroboamnü kyo Israelrü amünyi shitpahsohcho.

¹²Jehoashnü nguchicho lüpcho ko abi Juda Yangthsaba Amazia te thrung chitacho nguchi apüm Israel Yangthsarü Yukheh la thrahyoh lile.

¹³Jehoash sücho ko Samaria la yangthsarü kong la dhrürangcho ko abi tsurü Jeroboam II tsü abi mülih Yangthsaba kangcho.

¹⁴Ade azikehrü Elisha sünungthsa thsangnang licho ko abi sünungthsa yüpjode, Yangthsaba Jehoashnü wü abi xodhengcho. Abinü tra yocho, “Uwa, Uwa, nüh Israel tsungtirü akohba lile!”

¹⁵Elishanü abi te yocho, “Singthsalu khüdu ko tbüdeng khürü hirung,” ko Joashnü hirojücho.

¹⁶Ko Elishanü kyanung abi khyang tbengkehsohcho. Yangthsabanü hütsüta tbengkehjücho ko Elishanü Yangthsaba khehchah abi khehnü ramehcho.

¹⁷Hütsüpü azikehbanü yochonyi, Syria lang pipü liba nyübongkhi tsü khangthrucho. Elishanü yocho, “Tbüdeng tsü kyaang!” Ko Yangthsabanü tbüdeng tsü kyayeng, azikehba tsünü yocho, “Nüh ABÜDONGBA tbüdeng lile, ko nüh khu abinü Syria michah akoh ngunung. Syriarü te Afek la nühnü mükohde chitanung.”

¹⁸Hütsüpü Elishanü Yangthsaba te tbüdeng apa tsü throropü alih la xüpnung yocho. Yangthsabanü alih la tsü asangpi xüp-pü nyehlicho.

¹⁹Hütsünü Elisha zichürocho ko abinü Yangthsaba te yocho, “Nühnü münga dhürohpi xüpba thsako, arelang nühnü Syriarü riri kohba thsachoe, ta nühnü arüh asangpi du kohnung.”

²⁰Hütsüpü Elisha sücho ko dhrürangpehcho. Kang mükhu Moabrü mülung mülungnü Israelrü mah licho.

²¹Khüdupi arüh me khüdu rang yade, hütsüri mülung khüdu ro ngucho, hütsünü me tsü arühnü Elisha kong la dhiyohchüpehpü tsicho. Khode hütsüba me tsünü Elisha rüh chah thahpücho, nyitsarüba tsü kanglicho ko yacho.

²²Syria Yangthsaba Hazaelnü Jehoahaz yangthsathsa ayung Israelrü sehchicho,

²³ta ABÜDONGBAnü arüh te müi ko yanglilümcho. Abinü arüh müchangsohcho, ta Abraham, Isak ko Jakob te zengchocho khyanglangnü abinü arüh trocho. Abinü khodesü arüh müyurü münbüchücho.

²⁴Yangthsaba Hazael süde, abi tsurü Benhadad tsü abi mülih Yangthsaba kangcho.

²⁵Hütsüpü Israel Yangthsaba Jehoashnü Benhadad asangpili kohcho ko Jehoash au Jehoahaz chichah Benhadadnü khyücho yangditi tsü thali khyücho.