Read Sangtam Naga 2 YANGTHSARÜTI 14 Bible Online

2 YANGTHSARÜTI 14 - Sangtam Naga bible

2 YANGTHSARÜTI 14

¹Israel la Jehoahaz tsurü Jehoash yangthsathsacho kang anyüu la,

²Joash tsurü Amazia tsü abi kang mükyüpü münga thsade Juda la Yangthsaba kangcho ko abinü Jerusalem la kang mükyüpü düku yangthsacho. Atpa tsü Jerusalem lanü Jehoadin licho.

³Abinü ABÜDONGBAnü künyangnungthsa nguchicho, ta abi jümürü Yangthsaba Davidlü mükyocho; abinü au Joash kyo nguchicho.

⁴Abinü müyudsirü mübüji müthsangnyangjücho ko müyurütinü mütozah hütsüri la kangmübü jücho ko müchiji trüpcho.

⁵Amazia yanglih drengdreng müdongchehyeng, abinü au, Yangthsaba kyüsehrüti tsü süsohcho.

⁶Ta, abinü arüh tsuzarülü mükyüsehcho ko ABÜDONGBAnü Mosa yuzeng la yocho kyo nguchicho: “Tsuzarü thsamehcho ngang tpurü müsüsohnung mahkhang tpurü thsamehcho ngang tsuzarü müsüsohnung; nyitsarü khüdu apu münyi ngang du süsohnung.”

⁷Amazianü Mih Ngah la Edomrü rothsarü hajar dhüre kyüsehcho; abinü khata la tsü Sela yangdi khyücho ko Jokthel dsicho, ade yingcheh aneng hütsü lile.

⁸Hütsüpü Amazianü Israel Yangthsaba Joash yanglang khatanung khyangchi yuhirü müthehcho.

⁹Ta Yangthsaba Joashnü yu laling hita müthehcho: “Khüdupi Lebanon zong la zengtrung khüdunü Cedar sing yang hita müthehcho: ‘Nü tsulatpü tsü I tsurü kuhla xengsohng.’ Rangmü kanglungrü lahkhucho ko zengtrung tsü dhrümnahpehcho.

¹⁰Amazia, nühnü Edomrü kohko ko hütsünü nüh müthsehsohre. Hütsünü nü long kyang ko kuhla yaa püm. Tuepü nüpu ko Juda chah achongcha hironung nühnü ruhmüsunung?”

¹¹Ta Amazianü münyicho, achotsü Yangthsaba Joashnü abi nyitsarü nüpü shemüsu wü abi nyüm Juda la Beth Shemesh te khatacho.

¹²Amazia rothsarü tsü kohchehcho ko abi rothsarü atümung arüh palu kuh yang rang tsicho.

¹³Jehoashnü Amazia tsü rang Jerusalem lang nowücho ko Efraim Tbükhüm lanü Ajongnah Tbükhüm chii, khehap thsih müyü, yangdi tbü tsü thsangnyangjücho.

¹⁴Abinü ngucho apüm hon ko taripi, Amübükuh kohro ko Yangthsaba kuhla kuthsi apüm khyo Samaria lang hitsicho. Abinü nyitsarü mii rang notsicho.

¹⁵Jehoashnü nguchicho lüpcho, abinü Juda Yangthsaba Amazia te thrung chitacho mii zeh Israel Yangthsarü Yukheh la thrahyoh lile.

¹⁶Jehoash sücho ko Samaria yangthsarü kong la dhrürangcho ko atsurü Jeroboam II tsü abi mülih Yangthsaba kangcho.

¹⁷Israel Yangthsaba Jehoash süpü khanglang, Juda Yangthsaba Amazia kang dhüre-münga licho.

¹⁸Amazianü nguchicho lüpcho Juda yangthsarü Yukheh la thrah lile.

¹⁹Jerusalem la Amazia süsohnung rah külüp licho, achotsü abinü Lakish lang rang tsicho, ta abi rorünü iiwü kyüsehcho.

²⁰Ame tsü kuri chahnü thali Jerusalem lang hirocho ko David yangdi la yangthsarü kong la dhrürangcho.

²¹Hütsüpü Judarünü abi tsurü kang dhüre-dhüroh azarü Uzia tsü Yangthsaba kangsohcho.

²²Uzzianü au süpü khanglang, thali kohchehpü Elath külüpchicho.

²³Juda la Yangthsaba Joash tsurü Amazia yangthsathsaba kang dhüre-münga la, Jehoash tsurü Jeroboam tsü Israel la yangthsaba kangcho ko abinü Samaria la kang yürepü khüdu yangthsacho.

²⁴Abinü Nebat tsurü Jeroboam, sünü Israelrü amünyi shitpahsohcho abi roh-i, ABÜDONGBA nyüm amünyi shitpahcho.

²⁵Abinü Israel apüm kihkulang Hamath lang lanü kihjing lahpi Asü Kih chii kohcheh khyücho. Hi Israel Tsingrang, ABÜDONGBAnü Gath Hefer lanü Amittai tsurü azikehrü Jona khu nyengchocho licho.

²⁶ABÜDONGBAnü Israel adrünung chongcha tsü ngucho; ko arüh trorü süsü mülicho.

²⁷Ta Israel lede nengdang changsohnung tsü ABÜDONGBA lümcho müthsacho, hütsünü Abinü Yangthsaba Jeroboam II khu arüh khümchocho.

²⁸Jeroboam II nü nguchicho lüpcho, abinü thrung khatacho ko abinü khüta Damaskas ko Hamath Israel khyang hirolijücho hiri apüm Israel Yangthsarü Yukheh la thrah lile.

²⁹Jeroboam sücho ko Yangthsarü kong la dhrürangcho ko atsurü Zekaria tsü abi mülih Yangthsaba kangcho.