Read Sangtam Naga 2 YANGTHSARÜTI 15 Bible Online

2 YANGTHSARÜTI 15 - Sangtam Naga bible

2 YANGTHSARÜTI 15

¹Israel la Yangthsaba Jeroboam II yangthsathsaba kang mükyüpü dhünyeh-u la,

²Amazia tsurü Uzia kang dhüre-dhüroh thsade Juda la Yangthsaba kangcho ko abinü Jerusalem la kang dhünyangpü anyüh yangthsa thsacho. Atpa tsü Jerusalem lanü Jekolia thsacho.

³Au adüzü khyo, abinü ABÜDONGBAnü künyangnung thsa nguchicho.

⁴Ta müyudsirü mübüji tsü müthsangnyangjücho ko müyurünü hütsüri la mütozah kangmübü jo müchiji trüpcho.

⁵ABÜDONGBAnü Uzia chah mübhira küdusohcho ko hütsü abi chah asü yingcheh kehcho. Abi apu kuh pathsa khüdu la licho, anguchi tusü münguchicho ko abi tsurü Jothamnü yanglih tsü yangthsa thsacho.

⁶Uzzianü nguchicho lüpcho Juda Yangthsarü Yukheh la thrah lile.

⁷Uzia sücho ko David yangdi la yangthsarü kong la dhrürangcho ko atsurü Jotham tsü abi mülih Yangthsaba kangcho.

⁸Juda la Yangthsaba Uzia yangthsathsaba kang sangrepü keh-u la, Jeroboam II tsurü Zekaria tsü Israel la Yangthsaba kangcho ko abinü Samaria la choo dhüroh yangthsacho.

⁹Abinü, abi bekhulangrü kyo, ABÜDONGBA nyüm amünyi shitpahcho. Abinü Israel münyi shitpahsohba Nebat tsurü Jeroboam saying amütsa kyo nguchicho.

¹⁰Jabesh tsurü Shalumnü Yangthsaba Zekaria nyüm rah külüpcho ko Ibleam la abi süsohcho ko abi mülih Yangthsaba kangcho.

¹¹Zekarianü nguchicho apüm Israel yangthsarü Yukheh la thrah lile.

¹²Hütsüta ABÜDONGBAnü Yangthsaba Jehu te nyengchocho tsü tikehcho: “Nü shümtsurünü shang müyü chii Israel la yangthsa thsanung!”

¹³Juda la Yangthsaba Uzia yangthsathsaba kang sangrepü düku-u la, Jabesh tsurü Shalum tsü Israel la Yangthsaba kangcho ko abinü Samaria la choo khüdu yangthsa thsacho.

¹⁴Gadi tsurü Menahemnü Tirza lanü Samaria lang wücho, Shalum kyüsehcho ko Yangthsaba kangcho.

¹⁵Shalumnü nguchicho lüpcho, abinü rah külüpba tsü mii zeh Israel yangthsarü Yukheh la thrah lile.

¹⁶Menahem tsü Tirza lanü rode, abinü Tapua yangdi mahcho, hütsüla lirüti süsohcho ko hütsü mükang lirütisü süsohcho, tunüo yangdi tsünü abi chah mülüpcho. Hütsünü abinü fü müdengrü khingkurü mi mii xaphohjücho.

¹⁷Juda la Yangthsaba Uzia yangthsathsaba kang sangrepü düku la, Gadi tsurü Menahem tsü Israel Yangthsaba kangcho ko abinü Samaria la kang dhüre yangthsacho.

¹⁸Abinü ABÜDONGBA nyüm amünyi shitpahcho, tunüo Nebat tsurü Jeroboamnü Israel amünyi shitpahsohcho kyo, abinü abi sü-yingcheh lang amütsa du tsü iithsacho.

¹⁹Assyria Yangthsaba, Tiglath Pilesernü Israel mahcho ko Menahemnü yanglih la abi tase linung nengdang khümsohnung, abi khyang taripi süreh hajar sangrepü müyü jiyücho.

²⁰Menahemnü thsi tsü Israel la alirü te nyitsarü müipi taripi dhünyang-nyang dhribülung hütsü jücho. Hütsünü Tiglath Pilesernü arüh lih lang thali tsicho.

²¹Menahemnü nguchicho lüpcho Israel yangthsarü Yukheh la thrah lile.

²²Abi sücho ko dhrürangcho ko atsurü Pekahia tsü abi mülih Yangthsaba kangcho.

²³Juda la Yangthsaba Uzia yangthsathsaba adhünyangu kang, Menahem tsurü Pekahia tsü Israel la Yangthsaba kangcho ko abinü Samaria la kang anyüh yangthsa thsacho.

²⁴Abinü Nebat tsurü Jeroboamnü Israel münyi shitpahsohcho kyo, abinü ABÜDONGBA nyüm amünyi shitpahcho.

²⁵Pekahia rothsarü adirü khüdu Remalia tsurü Pekanü Gilead lanü nyüh dhünyang nüpü rah külüpcho ko Samaria la Yangthsaba kuh ayonglangba roshengvi müdüm lanü Pekahia kyüsehcho ko abi Yangthsaba kangcho.

²⁶Pekahianü nguchicho lüpcho Israel Yangthsarü Yukheh la thrah lile.

²⁷Juda la Yangthsaba Uzia yangthsathsaba kang dhünyangpü anyüh la, Remalia tsurü Peka tsü Israel Yangthsaba kangcho ko abinü Samaria la kang mükyü yangthsa thsacho.

²⁸Abinü Nebat tsurü Jeroboam sünü Israel münyi shitpahsohcho, abi iithsa ABÜDONGBA nyüm amünyi shitpahcho.

²⁹Peka yangthsathsa yade, Assyria Yangthsaba Tiglath Pilesernü Ijon, Abel Beth Maka, Janoa Kedesh ko Hazor yangditi ko Gilead lih, Galil lih ko Naftali mahcho ko nyitsarüti rang Assyria lang notsicho.

³⁰Juda la Uzia tsurü Jotham yangthsathsaba kang mükyüu la, Ela tsurü Hosheanü Yangthsaba Peka nyüm rah külüpcho ko abi süsohcho ko abi Yangthsaba kangcho.

³¹Pekanü nguchicho lüpcho Israel yangthsarü Yukheh la thrah lile.

³²Israel la Remalia tsurü Peka yangthsathsaba kang anyüu la, Uzia tsurü Jotham tsü

³³abi kang mükyüpü münga thsade, Juda Yangthsaba kangcho ko abinü Jerusalem la kang dhüre-dhüroh yangthsa thsacho. Atpa tsü Zadok tsulatpü Jerusha licho.

³⁴Au Uzia kyo, abinü ABÜDONGBAnü künyangnungthsa nguchicho.

³⁵Ta müyudsirü mübüjilü abinü müthsangnyangjücho ko müyurünü mütozah hütsüri la kangmübü jo müchiji trüpcho. Amübükuh la Kihku Tbükhüm tsü Jothamnü thsacho.

³⁶Jothamnü nguchicho lüpcho Juda yangthsarü Yukheh la thrah lile.

³⁷Abi yangthsathsa ya bekhyah, Juda mahsohnung ABÜDONGBAnü akhudiba Syriarü Yangthsaba Rezin ko Israelrü Yangthsaba Peka müthehcho.

³⁸Jotham sücho ko David yangdi la yangthsarü kong la dhrürangcho ko atsurü Ahaz tsü abi mülih Yangthsaba kangcho.