Read Sangtam Naga 2 YANGTHSARÜTI 17 Bible Online

2 YANGTHSARÜTI 17 - Sangtam Naga bible

2 YANGTHSARÜTI 17

¹Juda la Yangthsaba Ahaz yangthsathsaba kang dhüre-anyüu la, Ela tsurü Hoshea tsü Israel la Yangthsaba kangcho ko abinü Samaria la kang düku yangthsathsacho.

²Abinü ABÜDONGBA nyüm amünyi shitpahcho, ta abi belang Israel la yangthsarütilü mükyocho.

³Assyria Yangthsaba Shalmanesernü abi nyüm rothsa suwücho; Hosheanü Shalmaneser chah lüpcho, ko kang mükhu abi khyang akhüm tüpcho.

⁴Ta kang khüdu Hosheanü Ijip Yangthsaba, So yanglang abi trosohnung tsingdhengcho. Ko Assyria khyang akhüm tsü mütüp-pehcho. Khode hütsü Shalmanesernü yuchicho, abinü Hoshea rang akhangti la yohpücho.

⁵Hütsüpü Shalmanesernü Israel mahcho ko Samaria khyücho.

⁶Hütsü khyüpü kang asangu la, hütsü Hoshea Yangthsaba adüku-u kang, Assyria Yangthsabanü Samaria mahchehpü, Israelrü kümwü khürü Hala yangdi la, khürü Gozan district la Habor Yongkhi te ko khürü Mediarü yangditi la lisohcho.

⁷Israelrünü, ABÜDONGBA arüh Tsingrang, Ijip Yangthsaba kheh lanü khümcho Ijip lanü nüchehba nyüm amünyi shitpahchonü, Samaria khülucho.

⁸Arühnü aparü tsingrangti mübücho, arüh rode iipehjübarü yah iithsa ko Israel yangthsarünü külüpchehba yah bichicho.

⁹ABÜDONGBA arüh Tsingrangnü mümülacho Israelrünü nguchicho. Arühnü yang azauba chahnü dikeh yangdiba chiinü, arüh yangdi apüm la müyudsirü mübüji külüpcho.

¹⁰Akhang apüm chah ko singdong adhülüm apüm pohki arühnü lung khyümcho ko Ashera tsingranglatpü kyothri yohpücho,

¹¹ko ABÜDONGBAnü iipehbarü yah bichi, müyudsirü bholu chah arühnü müchiji trüpcho.

¹²Arühnü arüh nguchi amütsa khu ABÜDONGBA rihlong chürosohcho ko kyothri mümübünung ABÜDONGBA yuzeng arühnü münyicho.

¹³ABÜDONGBAnü Israel ko Juda yang müzahsohnung yusi hirü azikehrü müthehcho: “Nührü amünyi lang lanü ximülang ko Ihnü nührü jümürü khyang I dikehrü azikehrü khu jüba I Yuzeng nyieng.”

¹⁴Ta arühnü münyicho; ko ABÜDONGBA arüh Tsingrang chah müyudsiba arüh jümürü kyo arüh lasih müküpcho.

¹⁵Arühnü abi athülaba münyicho, abinü arüh jümürü te nyengchocho arühnü mübichicho ko arühnü abi amüzahnung yu tsü mükhichicho. Arühnü amii müliba kyothri mübo adongmücho kangcho ko arühnü mükangmüshü liba yuchoti ayah mü-iithsanung yuzeng tsü mübichicho.

¹⁶Arühnü ABÜDONGBA arüh Tsingrang yuzeng apüm mübichicho ko mübünung idhsenü misüpung anyüh külüpcho, arühnü Ashera tsingranglatpü kyothrisü külüpcho, chenghiti mübücho ko Baal tsingrang dikehcho.

¹⁷Arühnü müyudsirü tsingrang khyang arüh tsuzarü trüp mübü amübüthsa jücho; arühnü azi-amongrü te müchehmülohcho ko arühnü ABÜDONGBA nahte tu amütsa hütsü du nguchicho ko hütsü khu ABÜDONGBA rihlong chürosohcho.

¹⁸ABÜDONGBAnü Israelrü te rihlong chürocho ko abinü Juda yanglih du nyingpüjüpü arüh changsohcho.

¹⁹Ta Judarünü mii ABÜDONGBA, arüh Tsingrang yuzeng münyicho; arühnü Israelrü saying dhengchocho.

²⁰ABÜDONGBAnü Israelrü apüm mükhyüchocho ko amütsa arorüh khehla arüh jücho ko achangka la arüh changsohcho.

²¹ABÜDONGBAnü Israel Juda chahnü zasohko khanglang, Israelrünü Nebat tsurü Jeroboam tsü arüh Yangthsaba kangsohcho. Jeroboamnü arüh khyang ABÜDONGBA thrüchahchüpehsoh amünyi dee shitpahsohcho.

²²Abinü abi dikehrü azikehrü khu müzahsohcho kyo, achangka la abinü arüh khingchinungthsa, arühnü Jeroboam iithsa amünyi shitpahcho.

²³Hütsünü Israelrü tsü Assyria lang yangtsilang kümtsisohcho, hütsüla arüh ade yingcheh lile.

²⁴Assyria Yangthsabanü Babylon, Kuth, Ivva, Hamath ko Sefarvaim yangditi lanü nyitsarü nowü Israelrü yangtsi lang tsirü mülih la tsü Samaria yangditi la lisohcho. Arühnü yangditi mükuhpü hütsürila licho.

²⁵Arüh hütsüla akhu lide, arühnü ABÜDONGBA mümübücho, hütsünü abinü kihkhünying mütheh arüh khürü mükahsehcho.

²⁶Abinü Samaria yangditi la lisohba nyitsarüti tsünü hütsüba lih tsingrang yuzeng mümüdhe ko tsingrang tsünü kihkhünying mütheh arüh khürü mükahsehsohkopü Assyria Yangthsaba te yocho.

²⁷Achotsü Yangthsabanü yuzeng jücho: “Ihsanü rang roba bebürüti yolanü khüdu thali müthehchüng; abi hütsüla thali wü hütsüba lih tsingrang yuzeng dosohnung lisohng.”

²⁸Hütsüta Samaria lanü kümrorü Israelrü bebürü khüdu wü Bethel la lisohcho ko abinü arüh te ABÜDONGBA khüta mübünung hütsü doyocho.

²⁹Ta Samaria la lirünü mütozah arüh kyothri du külüpcho ko Israelrünü külüpba mübüji la arüh yo tsü yohpücho. Mülung müipinü arüh liyaba yangditi la tsü kyothri papa külüpcho:

³⁰Babylonrünü Sukot Beroth tsingrang, Kuth-rünü Nergal kyothri, Hamath-rünü Ashima kyothri,

³¹Ivvarünü Nibhaz ko Tartak kyothri ko Sefarvaim-rünü arüh tsingrang Adramelek ko Anamelek khyang arüh tsuzarü trüp mübüthsa kangmübü jücho.

³²Hiri nyitsarütinü ABÜDONGBAsü mübücho ko arüh nengdang kangmübü jüsohnung nyitsarü masü bebürü kang throchehcho.

³³Hütsüta arühnü ABÜDONGBA mübücho, ta arühnü palu tsingrangsü mübücho.

³⁴Arühnü chünye yingcheh arüh jümü yah tsü bichire. Arühnü ABÜDONGBA mümübüre mahkhang Jakob, süte Israel dsicho, abi jümürü khyang jüba yuzeng ko amülabasü mübichire.

³⁵ABÜDONGBAnü arüh te azengchotaba khüdu külüpcho ko arüh khyang yuzeng jücho: “Apa tsingrang tümübü; arüh te tümükhukeh mahkhang kangmübü tüjü.

³⁶Nührünü Ih, ABÜDONGBA sünü nührü Ijip lanü zii amülah la nüchehcho Abi yocho nyieng; nührünü Ih mübüng ko I khyang kangmübü jüng.

³⁷Nührünü lede Ihnü jüba yuzeng ko amülaba bichieng. Nührünü apa tsingrang tümübü,

³⁸ko nührü te azengchota külüpba tsü tünbüchü.

³⁹Nührünü Ih ABÜDONGBA, nührü Tsingrang yocho nyieng ko Ihnü arorüh kheh lanü nührü khümchonung.”

⁴⁰Ta hütsüri nyitsarünü münyicho ko arühnü mütozah arüh jümü yangthsa du bichicho.

⁴¹Hütsürinü ABÜDONGBA mübücho, ta arühnü arüh yo kyothrisü mübücho; ko chünye yingcheh arüh shümtsurünü mii hütsü kyo du nguchire.