Read Sangtam Naga 2 YANGTHSARÜTI 18 Bible Online

2 YANGTHSARÜTI 18 - Sangtam Naga bible

2 YANGTHSARÜTI 18

¹Israel la Ela tsurü Hoshea yangthsathsaba kang asangu la, Ahaz tsurü Hezekia tsü abi kang mükyüpü münga thsade Juda Yangthsaba kangcho

²ko abinü Jerusalem la kang mükyüpü düku yangthsacho. Atpa tsü Zekaria tsulatpü Abija licho.

³Abinü abi jümürü Yangthsaba David adüzü khyo, ABÜDONGBAnü künyangnungthsa nguchicho.

⁴Abinü müyudsirü mübüji thsangnyangpehjücho, lung-dongdi thsangnyangjücho ko Ashera tsingrang kyothri mapnahpehjücho. Abinü Mosanü külüpba imüyeng mürü khüi te Nehushtan dsicho, hütsüsü mapnah pehjücho. Hütsü bekhyah chii Israelrünü hütsü khyang jengreng jo müchiji trüpcho.

⁵Hezekianü ABÜDONGBA, Israel Tsingrang chah longlangcho; Juda la abi belang ko khanglang abi kyo Yangthsarü müchüro.

⁶Abi ABÜDONGBA te yuje cho licho ko khodesü yocho münyi müle, ta ABÜDONGBAnü Mosa khyang jücho yuzengti apüm bichicho.

⁷Hütsünü abi te ABÜDONGBA zehcho ko abinü nguchicho lüpcho la akoh ngucho. Abinü Assyria Yangthsaba nyüm yacho ko abi chah mülüpcho.

⁸Abinü Filistinrü kohcho ko Gaza ko mükangmüshü lih zeh, yangdi azikyah chahnü dikeh adiuba chii mahcheh khyücho.

⁹Hezekia yangthsathsaba kang amüyüu la, Israel michah Yangthsaba Hoshea yangthsacho kang dhünyeh-u thsade Assyria Yangthsaba Shalmanesernü Israel mahcho ko Samaria khyücho.

¹⁰Kang asang lipü Samaria khülucho; hi Hezekia yangthsacho kang adhüroh-u ko Hoshea yangthsathsacho kang adüku-u tikehcho.

¹¹Assyria Yangthsabanü Israelrü tsü kümwü khürü Hala la, khürü Habor Yongkhi shündhün Gozan district la ko khürü Media yangditi la lisohcho.

¹²Samaria khüluba tsü, Israelrünü ABÜDONGBA, arüh Tsingrang yocho münyi, Mosa khu jücho yuzeng münyi ko azengtacho thsangnyangcho khunü licho. Arühnü hütsüri münyicho ko mübichicho.

¹³Yangthsaba Hezekia yangthsathsaba kang dhüre-müyüu la, Assyria Yangthsaba Senacheribnü atbüticho Juda yangditi mahcho.

¹⁴Hütsüde Lakish la liba Senacherib yang Hezekianü yu jücho: “Ihnü thsamehko; yanglilüm Ih tümah ko nühnü tu chingnang Ihnü jünung.” Yangthsabanü Hezekia te taripi süreh hajar dhüre ko hon süreh hajar khüdu chingcho.

¹⁵Hezekianü abi khyang Amübükuh ko Yangthsaba kuh lanü taripi apüm mühehcho;

¹⁶abinü kukhang chahnü ko apunü müshüti yohcho trahtridong chahnü hon apüm khahcho Senacherib yang mühehcho.

¹⁷Adesü Assyria Yangthsabanü Jerusalem la Hezekia benung rothsarü mülung amülah Lakish lanü müthehcho, hütsü abi pohki anüchirü nyüh asangnü nüpü wüsohcho. Khode arühnü ro Jerusalem chihcho, Shükyahrü liba athahlang kihkong lanü kih noroba yongkhi tsü chii mükangticho.

¹⁸Hütsüpü arühnü Yangthsaba Hezekia dsinung müthehcho ko abi pohki adirü nyüh asang arüh te shirütanung chüducho: Yangthsaba kuh xükümba Hilkia tsurü Eliakim; athrahba Shebna; ko athrahcho zahkehba Asaf tsurü Joa.

¹⁹Assyriarü yola adirü khüdunü yocho, “Tu chah dümpipü Yangthsaba Hezekia hidoi müsi mülahro? Hütsü Yangthsabanü müdhenyüre.”

²⁰Abinü yocho, “Khata nengdang yu tsünü kükyünung mah-o? Sü chah ngakehpü Assyria Yangthsaba te tohtaro?

²¹Ijip chah dümpirü mah-o? Ta hütsü thohnü Ja thsacho kyonung. Hütsü khyahsahnung ko nü kheh müsühnung. Ijip Yangthsaba chah dümpirü nengdang abi tsü hütsü kyole.”

²²Assyriaba tsünü mütozah yocho, “Mahkhang ABÜDONGBA nührü Tsingrang chah dümpirü mah-o? Hezekia apunü bholu ko müchiji apüm thsangnyangjo, Judarü ko Jerusalemrü te Jerusalem bholu te du mübünung yocho mahrü do?

²³Nührünü dusü hütsü doi chah pümxah nyitsarü ngunungekhang, Ihnü Yangthsaba nengla nührü te khyangchire. Ihnü nührü khyang kuri hajar anyüh jünung!

²⁴Assyriarü adirü azauba mii nührünü müchüro, ta nührünü Ijiprü chahnü kuri kari ko kuri longdire.

²⁵Ihnü nührü lih hi ABÜDONGBA arüku müzehpü changjüchoepü lümrü mah-o? ABÜDONGBA apunü hütsü mahnung ko changjünung yocho.”

²⁶Hütsüde Eliakim, Shebna ko Joanü adiba te tsü yocho, “Adirü, ihrü te Aramaik yu la chotaang. Ibri yu tücho; züdi jüp yarü apümnü nyiyale.”

²⁷Abinü lalingcho, “Nührü ko Yangthsaba te du yu hi yosohnung müthehchoepü nührünü lümrü mah-o? Mah, ta züdi jüp yarü nührü kyo palu pehyahcho tsunung ko müyongcho yongnung liba, hiri apüm te chotare.”

²⁸Hütsüpü adiba tsünü shemüsu Ibri yu la züde yocho, “Assyria Yangthsabanü nührü te tu yoro nyieng!

²⁹Hezekianü nührü mükihyochüsohnung abinü yore. Hezekianü nührü mükhümchonung.

³⁰Ko ABÜDONGBA chah dümpinung abi khyang nührü tükiyohchüsoh. ABÜDONGBAnü ihrü Assyriarü rothsarü nührü yangdi mahnung lanü yati abinü nührü khümchonungepü tülongdi.

³¹Hezekia yu tünyi. Assyria Yangthsabanü yangdi la tsünü chüro abi mübüng pü nührü te yore. Nührünü nührübürü shükusih yolanü tsunung, nührübürü kihkong lanü kih yongnung;

³²nührü lih kyoba lih khüdulang, tsang ko yongkha liba limih, shükusiluh liba limih, olive tuji ko thsakukih liba limih khüdu yang Ihnü nührü nowünung. Nührünü abi yu nyikhang, nührü müsünung, ta akang linung. ABÜDONGBAnü nührü khümchonungepü yo Hezekia khyang nührü tükiyohchüsoh.

³³Assyria Yangthsaba kheh lanü yucho khürü arüh tsingrangnü khümchocho mülio?

³⁴Hamath ko Arpad tsingrang, arüh ade khüde liro? Sefarvaim, Hena ko Ivva tsingrangti khüde liro? Khürünü Samaria khümchocho mah-o?

³⁵Khode ihrü Yangthsaba kheh lanü tsingrang khüdunü arüh yucho khümchocho? Khang, ABÜDONGBAnü khüta Jerusalem khümchonungepü nührünü lümro?”

³⁶Yangthsaba Hezekianü arüh te yocho kyo, müyurütinü sahmüthsacho; arühnü yu tpah-o mii müchocho.

³⁷Hütsüde Eliakim, Shebna ko Joa arüh asangnü awahchonü arüh jengki rehnahcho ko wü Yangthsaba te Assyriabanü tu yocho hütsü yocho.