Read Sangtam Naga 2 YANGTHSARÜTI 19 Bible Online

2 YANGTHSARÜTI 19 - Sangtam Naga bible

2 YANGTHSARÜTI 19

¹Yangthsaba Hazekianü hütsü yuchiyeng, abinü awahchonü ajengki rehnahcho, müyahshü müpicho ko Amübükuh yang wücho.

²Abinü Yangthsaba kuh xükümba Eliakim, athrahba Shebna ko bebürü azirüti müyahshü müpipü Amoz tsurü azikehba Isaya yanglang müthehcho.

³Isaya te yonung arüh te hiroh-i yocho: “Chünye chongcha nyümong lile; khingchire ko wahre. Ihrü azarü suronung chihpü suh müzehba khingkurü khüdu kyo lile.

⁴Assyriarü Yangthsabanü akang liba Tsingrang müthsamünyünung abi pohki adirü khüdu müthehcho. ABÜDONGBA nü Tsingrangnü hütsüta choba tsü yuchipü arüh khingching. Hütsüeko nying liba Ihsa nyitsarü nengdang dangkhidangnangjüng.”

⁵Khode Isayanü Yangthsaba Hezekia yusi tsü yuchicho,

⁶abinü alalingba hita müthehcho: “ABÜDONGBAnü nührü mükhümchonungepü Assyriarünü müthsamünyüba yu tsünü nührü dro tüli.

⁷ABÜDONGBAnü Yangthsaba khyang abinü abi lih lang shehlisohnungthsa tsupohyupoh yuva yuchisohnung ko abi hütsüla kyüsehsohnung.”

⁸Assyria adiba tsünü, Yangthsaba tsü Lakish pehjüpü shündhün liba Libna yangdi te khata yalepü yuchicho; achotsü abinü abi te shirütanung wücho.

⁹Hütsüde Ijiprü rothsarü Ethiopia Yangthsaba Tirhakanü nüpü arüh mahnung rolepü Assyriarünü yuchicho. Khode hütsü Yangthsabanü yuchicho, abinü Juda Yangthsaba ko Hezekia yang hita yo vathrah khüdu mühehcho:

¹⁰“Nühnü yudsiba Tsingrang tsünü nü te I khehla müjünung yoko, ta hütsünü nüh tükiyohchüsoh.

¹¹Assyria Yangthsabanü changjünung lümba yangdi chah khüta nguchiro hütsü nühnü yuchiko. Nühnü tsiphunung lümrü do?

¹²I jümürütinü Gozan, Haran ko Rezef yangditi changjücho ko Telasar la lirü Bathedenrü kyüsehcho ko arüh tsingrang sünüsü arüh mükhümcho.

¹³Hamath, Arpad, Sefarvaim, Hena ko Ivva yangditi la yangthsarüti khüde liro?”

¹⁴Yangthsaba Hezekianü vathrah tsü yuhirü kheh lanü khyo khicho. Hütsüpü abinü Amübükuh lang wücho, ABÜDONGBA bete vathrah tsü yohpüpü,

¹⁵dangkhidangnangcho, “O ABÜDONGBA, cherubim aqo anyüh kehba kanglungrü michah pümba, Israel Tsingrang, limih yanglih apüm michah Yangthsaba, Nüh du Tsingrang lile. Nühnü ning ko alih thricho.

¹⁶Ade, ABÜDONGBA, ihrü chah tu tikehro hi dhingdheng. Senacheribnü Nüh akang liba Tsingrang müthsamünyo choba tsü nyidheng.

¹⁷ABÜDONGBA, Assyria Yangthsabanü yucho adrong changjücho, alih thsangnyangjücho,

¹⁸arüh tsingrang singlungrü tsingrang, nyitsarü khehnü külüpcho apüm trüp-pehjücho, hiri apüm ihrünü müdhele.

¹⁹Ade, ABÜDONGBA ihrü Tsingrang, limih apümnü Nüh du tsü Tsingrangepü müdhenungthsa, Assyriarü kheh lanü ihrü khümchoung.”

²⁰Hütsüde Isayanü Yangthsaba Hezekia yang Yangthsaba dangkhidangnang laling,

²¹ABÜDONGBAnü hita yorepü yusi müthehcho, “Senacherib, Jerusalemnü nüh münyüjüre ko müthsamünyüre.

²²Nühnü sü müthsamünyüre pü lümro? Nühnü Israel Amüsa Tsingrang, I jengreng müdrüre.

²³Lebanon zong apüm kohba nü kuri kari nüpü nühnü nü dikehrü I bete tüzümükhümnung rosohcho. Nühnü cedar sing athsenguba ko cypres sing atsauba retsuko ko mürong asoh-uba mii chihkopü nühnü müthseh yocho.

²⁴Yangpirü lih la kihkong junü hütsü lanü yongcho ko nü rothsarüti jingnü Nile Yongkhi la dhrümkungchoepü nühnü müthseh yocho.

²⁵“Hütsü Ihnü papadenü chungcho ko hütsü chünye nguchirepü nühnü khodesü müyuchidheng ang? Atbüticho yangditi sehnyeh kyo münohnahsohnung Ihnü nü khyang tase jücho.

²⁶Hütsüla lirü tase mülipehcho ko arüh drümüyangpehcho. Arüh tsü nyübong adhsanü fücheh tsipehba kuhmung chah yaba ko luh la yaba za kyo lile.

²⁷“Ta nü nengdang lüpcho, nüh tu nguchiro ko khüde würo apüm Ihnü müdhele. Ko I te nü zichürocho Ihnü müdhele.

²⁸Nü rihlong chüroba ko nü müthseh Ihnü yuchiko ko ade nüh roba lang la tsünü nüh thali noronung nengdang Ihnü nü nabong la shumütsa ko nü be la laküm yohjünung.”

²⁹Hütsüde Isayanü Yangthsaba Hezekia te yocho, “Atikehnung amüdhethsa tsü hi linung. Chükang ko sekang nühnü rangmü singsih du tsunung, ta zihkanglü nühnü ma chiinung ko hütsü xanung ko shükusih khyümnung ko hütsü chahnü shükusih tsunung.

³⁰Juda la anyingchoti tsü alih la ara chirang singsih sihba kyo, suh linung.

³¹Jerusalem ko Zion zong la nyitsarü nying linung, tunüo ABÜDONGBAnü hi tikehsohnung.”

³²“Assyria Yangthsaba nengdang ABÜDONGBAnü hita yore: ‘Abinü hiba yangdi la müzürochehnung mahkhang hütsü chah tbüdeng khüdunüsü mükyachehnung. Rothsarütinü tsung bipü yangdi shündhün mürochehnung ko hütsü mükang threhju müjunung.

³³Abinü yangdi la tsü mümütrahyohpü, abi rocho lang tsünü thali tsinung, Ih ABÜDONGBAnü choko.

³⁴Ipu neng ko I dikehrü David te nyengchocho khyanglangnü, Ihnü hiba yangdi hi khümnung ko tsungtinung.’ ”

³⁵Hütsü romang, ABÜDONGBA riwürü khüdu Assyriarü müdongchah tsü wücho ko rothsarü lakh khüdu hajar qurepü münga kyüsehcho. Nyangnyü khüu mütoh, arüh apüm hütsüla sükhang jocho.

³⁶Hütsüde Yangthsaba Senacheribnü shehli Nineve lang thalicho.

³⁷Nyümong khüdu, abi tsingrang Nisrok müboyade, atsurü anyüh, Adramelek ko Sharezer nyühnü abi kyüsehcho ko Ararat lih lang rang tsicho. Atsurü yola apa khüdu Esaraddon tsü abi mülih Yangthsaba kangcho.