Read Sangtam Naga 2 YANGTHSARÜTI 2 Bible Online

2 YANGTHSARÜTI 2 - Sangtam Naga bible

2 YANGTHSARÜTI 2

¹ABÜDONGBAnü Elija nyübong la ninglang nükeh tsinung becho chihcho. Elija e Elisha nyüh Gilgal lanü shemüsucho,

²ko lang la Elijanü Elisha te yocho, “Nüh hila nyehlieng, ABÜDONGBAnü I te Bethel lang wünung yuzeng jüko.” Ta Elishanü yocho, “Ihnü nüh müpehjünung akang liba ABÜDONGBA ko nü te yuchümre.” Achotsü anyünü Bethel lang wücho.

³Hütsüla lirü azikehrü mülung khüdu ro Elisha te yocho, “Chünye ABÜDONGBAnü nü büdongba nü tenü notsinungepü nühnü mümüdheo?” Elishanü yocho, “Ho, Ihnü müdhele. Ta Ihsanü hütsü nengdang müchochinung.”

⁴Hütsüpü Elijanü Elisha te yocho, “ABÜDONGBAnü I te Jeriko lang wünung yuzeng jüko.” Ta Elishanü yocho, “Ihnü nüh müpehjünung ABÜDONGBA ko nü te yuchümre.” Achotsü anyünü Jeriko lang wücho.

⁵Hütsüla lirü azikehrü mülung khüdu ro Elisha te yocho, “Chünye ABÜDONGBAnü nü büdongba nü tenü notsinungepü nühnü mümüdheo?” Elishanü yocho, “Ho, Ihnü müdhele. Ta Ihsanü hütsü nengdang müchochinung.”

⁶Hütsüde Elijanü Elisha te yocho, “Nüh hila nyehlieng; ABÜDONGBAnü I te Jordan Yongkhi lang wünung yuzeng jüko.” Ta Elishanü yocho, “Ihnü nüh müpehjünung ABÜDONGBA ko nü nengla yuchümre.”

⁷Achotsü anyünü wücho ko anyüh khanglang azikehrü dhünyangnü Jordan lang iijowücho. Elija e Elisha nyühnü Yongkhi te tsü nyehlicho ko azikehrü dhünyang tsü khü ashu la yacho.

⁸Hütsüpü Elijanü afükhüm phungcheh lohpü hütsünü kih la tsü xüpcho; hütsüde kih tsü changsahcho ko anyüh kihkeh khüulang akunglang tsü chüducho.

⁹Hütsüla Elijanü Elisha te yocho, “Ih münotsiedenü nü nengdang I khyang tu nguchisohnyüro I te young.” Elishanü yocho, “Ihnü nü mülih nguchichehnungthsa nü chahnü nü zii khyünyüre.”

¹⁰Elijanü lalingcho, “Hütsü ajünung nguchi athsah-e, ta Ih nükeh tside nühnü Ih ngukhang, nühnü hütsü ngunung; ta nühnü Ih müngukhang, hütsü müngunung.”

¹¹Anyüh chota tsiyade; dhrongyengnü michang kari kurinü tphahpü michang kuri kari khüdu jüro anyüh kahla zürocho ko nyübong la Elija tsü ninglang nükeh tsicho.

¹²Elishanü hütsü ngucho ko Elija te züde, “Uwa, Uwa, Israel tsungtirü! Akohba! Nüh tsipehko!” Ko abinü thali Elija khodesü müngupehcho. Alongrichonü, Elishanü afükhüm anyüh kang rehnahcho.

¹³Hütsüpü abinü Elija chahnü shohjocho fükhüm throrocho ko thali wü Jordan bekhüm la tsü yacho.

¹⁴Abinü Yongkhi la tsü Elija fükhüm tsünü xüpnü yocho, “Elija Tsingrang, ABÜDONGBA khüde liro?” Hütsüpü abinü anyüpiu kih la tsü xüpcho ko hütsü changshocho ko abinü kihkeh khüulang tsü tseh küducho.

¹⁵Jeriko lanü azikehrü dhünyang tsünü abi ngu yocho, “Elija zii tsü Elisha chah lile!” Arühnü abi mütohnung wücho ko abi jingte mükhukeh yocho.

¹⁶“Hila ihrü nyüh dhünyang, atümung re zehdu lile. Ihrünü wü nü büdongba yangchinung. ABÜDONGBA nbünü abi hiwü azong mahkhang angah khürü la pehjo linung kohle.” Elishanü lalingcho, “Doh, tüwü”

¹⁷Ta abinü arüh khyang mümülade arühnü emüthsa khingcho. Arüh dhünyang tsünü wü nyümong asang akhang ko angah apüm la Elija yangchicho, ta arühnü abi müngucho.

¹⁸Hütsüpü arühnü Jeriko lang thali rocho, tunüo Elisha hütsüla arüh ying licho ko abinü arüh te yocho, “Ihnü nührü te tüwü pü müyo-o?”

¹⁹Jeriko lanü khürünü wü Elisha te yocho, “Adirü, hiba hi yangdi atsae, ta kih mütsachonü azarü longlanü thsangnyangkhangcho nühnü müdhele.”

²⁰Abinü yocho, “Mütpah-tbhü asi khüdu la mih yohpü I yanglang hirung.”

²¹Arühnü hütsüta hirojücho ko abinü kihnatung lang tsü wücho ko mih kih tsü kih la tsü tungyoh yocho, “ABÜDONGBAnü hita yore: ‘Ihnü hiba kih hi müthseng kangsohre ko adelü hinü asü mahkhang longlanü thsangnyangba mülinung.’ ”

²²Ko Elishanü yocho kyo, hütsütinü hiba kih tsü müthseng licho.

²³Elishanü Bethel lang wünung Jeriko pehjücho ko lang la yangdi khüdu lanü dhrezarü khürü chüro abi münyodhengcho. Arühnü yocho, “Akikhang riri, hilanü tsipehng!”

²⁴Elishanü ximüla arüh chah dhengcho ko ABÜDONGBA nengla arüh chokehcholacho. Hütsüde rangmü lanü shühmü atrüh anyüh chüro dhrezarüti tsü arüh yürepü anyüh rehnah mükahsehcho.

²⁵Elishanü Karmel zong lang wücho ko akhanglang Samaria lang thalicho.