Read Sangtam Naga 2 YANGTHSARÜTI 20 Bible Online

2 YANGTHSARÜTI 20 - Sangtam Naga bible

2 YANGTHSARÜTI 20

¹Hiba bekhyah Yangthsaba Hezekia sümüphoh thsangnangcho. Amoz tsurü azikehrü Isayanü abi xodhengnung wücho ko abi te yocho, “ABÜDONGBAnü nü te lüpcho achunglangnü yohpünung yore, tunüo nüh mükyangnung. Asünung rungnüm.”

²Hezekianü züdilang aromih ximülapü dangkhidangnangcho.

³“ABÜDONGBA, Ihnü Nü te yuje cho ko yochonyi dikehcho ko Nühnü lümcho du nguchicho, hütsü lümchehng.” Hütsüpü abinü longri tranung dikehcho.

⁴Isayanü Yangthsaba tsü pehjüpü tsicho, ta abi Yangthsaba kuh kekhüm tsü khu mütsiede,

⁵ABÜDONGBAnü abi te ABÜDONGBA müyurü michah yangthsarü Hezekia yanglang thali wünü hita yonung yocho, “Ih, ABÜDONGBA, nührü jümürü David Tsingrangnü nü dangkhidangnang yuchiko ko nü nahshükih nguko. Ihnü nüh kyangjünung ko nyümong asang la nühnü Amübükuh lang wünung.

⁶Ihnü adesü nüh kang dhüre-münga alaa lisohnung. Ihnü nüh ko hiba Jerusalem yangdi Assyriarü Yangthsaba kheh lanü khümchonung. Ihnü Ipu neng ko I dikehrü David te nyengchotacho khyanglangnü, hiba yangdi tsungtinung.”

⁷Achotsü Isayanü Yangthsaba dikehrüti te ngurüsihnü külüpcho atsütsüpnü abi kii michah tsü lüpjüng, khang abi kyangnungepü yocho.

⁸Yangthsaba Hezekianü tsingdhengcho, “ABÜDONGBAnü Ih kyangjünung ko nyümong asang lipü Ihnü Amübükuh lang wünung yoba amüdhethsa tu linung?”

⁹Isayanü lalingcho, “ABÜDONGBAnü nü te Abi anyengchocho yohpünung amüdhethsa Abinü nüh khyangjünung. Ade nühnü lang phaqu la nbükhüm tsü belang mütrah dhüre wüsohnyürü a mahkhang khanglang mütrah dhüre shehlisohnyüro?”

¹⁰Hezekianü lalingcho, “Nbükhüm tsü bekhu mütrah dhüre wüsohnung tsü amüla. Hütsü khanglang mütrah dhüre shehsohng.”

¹¹Isayanü ABÜDONGBA te dangkhidangnangcho, ko ABÜDONGBAnü Yangthsaba Ahaznü khengba phaqu la nbükhüm tsü mütrah dhüre shehlisohcho.

¹²Hütsü shikhe la tsü, Babylon Yangthsaba Baladan tsurü Merodak Baladan-nü Yangthsaba Hezekia thsangnanglepü yuchicho, achotsü abinü abi khyang vathrah ko jiyü mühehcho.

¹³Hezekianü yuhirü tsü khyüchocho ko arüh te abi kuthsi hon, taripi, axümlichi ko rothsa kohro lüpcho ngusohcho. Abinü kohro zahkehji la ko yanglih apüm la lüpcho ngusohcho.

¹⁴Hütsüde Isayanü wü Yangthsaba Hezekia te tsingdhengcho, “Hiri khüdenü rocho ko arühnü nü te tu yocho?” Hezekianü lalingcho, “Arüh khütang ashu limih, Babylon lanü rocho.”

¹⁵“Arühnü Yangthsaba kuhla tsü tu dhengcho? Arühnü lüpcho nguko. Ihnü azahkehji la tsü arüh te müngusohcho tusü müle.”

¹⁶Hütsüde Isayanü Yangthsaba te yocho,

¹⁷“Akohba ABÜDONGBAnü nü te yore, Yangthsaba kuhla, nührü jümürünü chünye yingcheh zahkehcho hiri apüm Babylon lang hitsinung shikhe khüdu tsehle.

¹⁸Nüpu chahnü trahchocho khürü mii notsinung ko xangmipü Babylon Yangthsaba kuhla dikehrü kangsohnung.”

¹⁹Yangthsaba Hezekianü hütsü abi akang lidelü yangtsa linungepü nyichehcho, achotsü abinü lalingcho, “ABÜDONGBA chahnü hiroba yusi tsü atsae.”

²⁰Hezekianü nguchicho lüpcho, abi kurahcho ko abinü khüta kihkong külüpcho ko yangdi la kih münyehyohcho, hiri apüm Juda yangthsarü Yukheh la thrah lile.

²¹Hezekia sücho ko atsurü Manase tsü abi mülih Yangthsaba kangcho.