Read Sangtam Naga 2 YANGTHSARÜTI 21 Bible Online

2 YANGTHSARÜTI 21 - Sangtam Naga bible

2 YANGTHSARÜTI 21

¹Juda la Manase Yangthsaba kangde abi kang dhüre-anyüh thsacho ko abinü Jerusalem la kang dhünyangpü münga yangthsacho. Atpa tsü Hefziba licho.

²Arüh rode ABÜDONGBAnü iipehjüba yuchoti kyo, Manasenü ABÜDONGBA nyüm athrünyinung amünyi shitpahcho.

³Abinü au Hezekianü thsangnyang pehjücho müyudsirü mübüji külüpchijücho; Israel la Yangthsaba Ahabnü nguchicho kyo, abinü Baal bholu külüpchijücho ko Ashera tsingranglatpü kyothri külüpjücho. Manasenü chenghitisü mübücho.

⁴ABÜDONGBAnü abi mübüsohnung jüba Amübükuh la tsü abinü müyudsirü bholu külüpcho.

⁵Amübükuh kekhüm anyüh la tsü, chenghiti mübünung bholu külüpcho.

⁶Abinü atsurü trüp-mübüthsa kangmübü jücho. Abinü zii thsadheng azi-amongrü te müchehcho. Abinü ABÜDONGBA nyüm amünyi arangcheh shitpahcho ko abi rihlong chürosohcho.

⁷Abinü Amübükuh khüi la David ko Solomon nyüh te ABÜDONGBAnü: “Jerusalem hila, hiba amübükuh la yucho apüm lanü Ihnü throchehba müdüm hila Ih mübüsohnung pü yoba la tsü Ashera tsingranglatpü kyothri külüp yohpücho.

⁸Ko Israelrünü I dikehrü Mosanü arüh khyang jüba yuzeng ko amülaba apüm bichikhang, Ihnü arüh jümürü khyang jüba lih la tsünü arüh mü-iipehsohnung.”

⁹Ta Judarünü ABÜDONGBA yocho münyicho ko arüh rode iipehjüba yuchotinü thsamehcho tenü Manasenü arüh khyang alaa amünyi shitpahsohcho.

¹⁰ABÜDONGBAnü abi dikehrü azikehrü khu yocho,

¹¹“Yangthsaba Manasenü Kananrünü nguchicho tenü alaa athrünyinung amütsa nguchiko; ko abi kyothrinü Judarü amünyi shitpahsohko.

¹²Hütsünü, hi yuchide atümungnü nyekanungthsa, Ih ABÜDONGBA, Israel Tsingrangnü Jerusalem ko Juda michah achangba hirojünung.

¹³Ihnü Samaria Yangthsaba Ahab ko abi shümtsurüti chah nguchicho kyo, Ihnü Jerusalem khingchinung. Tbhü thsüthoh mükhümpücho kyo, Ihnü Jerusalem ko abi nyitsarü thsüthohnung.

¹⁴Ihnü anyingcho nyitsarüti thrüchahchüpehnung ko arüh rorüh khehla arüh jünung ko arühnü arüh kohcheh arüh lih khyüjünung.

¹⁵Ihnü I müyurü chah hütsüta nguchinung, tunüo arühnü arüh jümürü Ijip lanü chüro nyümongtinü chünye chii amünyi nguchinü I rihlong chürosohre.”

¹⁶Manasenü achomükeh nyitsarü khütang kyüseh Jerusalem yanglong jeng ashüh pohsohcho; abinü hi Judarü khyang kyothri mübüsohchochah lahkeh ABÜDONGBA nyüm amünyi shitpahcho.

¹⁷Manasenü nguchicho lüpcho, abinü amünyi shitpahcho mii zeh, Juda Yangthsarü Yukheh la thrah lile.

¹⁸Manase sücho ko Uzza Yangthsaba tbü la dhrürangcho. Ko atsurü Amon tsü abi mülih yangthsaba kangcho.

¹⁹Juda la Amon Yangthsaba kangde abi kang mükyüpü anyüh thsacho ko abinü Jerusalem la kang anyüh yangthsacho. Atpa tsü Jotba yangdi lanü Haruz tsulatpü Meshulemet licho.

²⁰Au Manase kyo, abinü ABÜDONGBA nyüm amünyi shitpahcho;

²¹abinü au iithsa aunü mübüba kyothriti mübücho.

²²Abinü abi jümürü Tsingrang, ABÜDONGBA mükhyüchocho ko abi yuzeng mübichicho.

²³Amon pohki adirütinü rah külüp Yangthsaba kuh lanü abi mapsehcho.

²⁴Judarünü Amon mapsehrüti tsü süsohcho ko atsurü Josia tsü Yangthsarü kangsohcho.

²⁵Amon-nü nguchicho apüm tsü Juda Yangthsarü yukheh la thrah lile.

²⁶Amon tsü Uzza tbü la dhrürangcho ko abi tsurü Josia tsü au mülih Yangthsarü kangsohcho.