Read Sangtam Naga 2 YANGTHSARÜTI 22 Bible Online

2 YANGTHSARÜTI 22 - Sangtam Naga bible

2 YANGTHSARÜTI 22

¹Juda la Josia Yangthsaba kangde abi kang keh du thsacho ko abinü Jerusalem la kang sangrepü khüdu yangthsacho. Atpa tsü Bozkath yangdi lanü Adaia tsulatpü Jedida licho.

²Josianü ABÜDONGBAnü künyangnungthsa nguchicho; abinü amü Yangthsaba David adüzü khyo, Tsingrangba yuzeng apüm khah-khah bichicho.

³Yangthsaba Josia yangthsathsaba kang dhüre-keh-u la, abinü Meshulam shümtsurü ko Azalia tsurü Yangthsaba kuhla athrahba Shafan tsü yuzeng hi jüpü Amübükuh lang wüsohcho:

⁴“Amungthriba bebüba Hilkia yanglang wüng ko Amübükuh trahtri la müyurü chahnü dhribülungba thsi tsü khüdoi lirünang yusi khyüng.

⁵Abi te Amübükuh thsachiba anüchiba khyang thsi tsü jüngding.

⁶Tunüo mistri, kuthsarü, lung maprü khyang thsi jünung ko hütsüla khyünung singtpah ko lung lihnung lile.

⁷Nguchi dhengyehrüti tsü khütang yuje chorü du lile, tatsü thsi hümnung müdhsüdah.”

⁸Shafan-nü Hilkia khyang Yangthsaba chahnü yuzeng tsü jücho ko Hilkianü Amübükuh lanü yuzeng vakha tsü ngukopü abi te yocho. Hilkianü vakha tsü jücho ko Shafan-nü hütsü khicho.

⁹Hütsüpü abinü Yangthsaba yanglang thali wücho ko hütsü yocho: “Nü dikehrünü Amübükuh lanü thsi tsü khyo kuthsachiba dhengyehrü khehla jüko.”

¹⁰Hütsüpü abinü yocho, “Hila Hilkianü jücho vakha khüdu lile.” Ko abinü Yangthsaba te yuva chüro hütsü khi yocho.

¹¹Khode vakha khicho tsü Yangthsabanü yuchicho, abinü nyemüyang ajengki rehnahcho,

¹²ko bebüba Hilkia, Shafan tsurü Ahikam, Mika tsurü Akbor, Yangthsaba kuh athrahba Shafan ko Yangthsaba te trotarü Asaya, hiri khyang yuzeng hi jücho:

¹³“Wüng ko ABÜDONGBA te hiba vakha la yoba nengdang, I nengdang ko Judarü apüm nengdang chotaang. ABÜDONGBAnü Ihsa te zichürore, tunüo Ihsa jümürünü hiba vakhanü yocho kyo münguchi.”

¹⁴Hilkia, Ahikam, Akbor, Shefan ko Asayanü Jerusalem asiba la liba, azikehlarü khüdu anengnü Hulda te kihtanung wücho. (Anii, Harhas shümtsurü, Tikva tsurü Shalum tsü amübükuh la jengki xükümrü thsacho.)

¹⁵Arühnü abükyü te atikehcho tsü yocho ko arüh te wü Yangthsaba te ABÜDONGBA chahnü yusi hita yosohcho:

¹⁶“Yangthsabanü khiba vakha la yocho kyo, Ihnü Jerusalem ko hütsüla liba nyitsarüti apüm khinghchinung.

¹⁷Arühnü Ih mükhyücho ko apa tsingrang mübüre ko arühnü nguchiba khu I rihlong chürosohre. Jerusalem nyüm I rihlong chürore ko hütsü münyehlinung.

¹⁸Ko Yangthsaba apu nengdang, Ih, ABÜDONGBA, Israel Tsingrangnü hita yore, Hiba vakha la tu thrah liro hütsü nühnü nyiko.

¹⁹Ko Ihnü Jerusalem ko hütsüla müyurüti khingchinungepü yode, nühnü jengki rehnah, tranü I bete nü jangjang longlüm kang lasih thsamülako. Ihnü adhengnung adrünung ko chokehchola müdüm kang nyitsarünü bichinungthsa Ihnü külüpjünung.

²⁰Ta Ihnü nü dangkhidangnang yuchiko ko Jerusalem chah ronung liba akhingchi tsü nüh akang lide mütikehnung. Ihnü nüh atbachi la süsohnung.” Nyitsarüti tsünü Yangthsaba Josia yanglang hiba yusi hipü thalicho.